Қазақша рефераттар

Танысу жаттығуы

Тренинг туралы

Бұл психологиялық тренинг ата-аналардың бала тәрбиесіндегі қарым-қатынас туралы түсінігін кеңейтіп, практикалық ойлануға және тәжірибе алмасуға бағытталған.

Психологиялық тренинг
Тақырыбы
Менің отбасым — сыйластық пен жарастық орнаған ортам
Мақсаты
Ата-ананың бала тәрбиесіндегі қарым-қатынасы туралы түсінік беру арқылы ата-аналардың білімін арттыруға көмектесу.
Қатысушылар
Ата-аналар
Құрылымы
5 бөлім: танысу, сұрақтар, шығармашылық жұмыс, сергіту, ой-толғаныс

Кіріспе сөз

Қош келдіңіздер, құрметті ата-аналар! Бүгінгі отырысымыздың мазмұнды әрі пайдалы өтетініне сенім білдіре отырып, тренингімізді бастаймыз.

Отбасы — адам баласының алтын діңгегі. Адам дүниеге келген сәтінен бастап ер жетіп, тұлға болып қалыптасқанға дейін ең алдымен отбасынан тәрбие алады. Сондықтан отбасы — аса қажетті әрі қасиетті алтын бесік.

Бала балабақша мен мектептен қанша білім мен тәлім алса да, өмірінің ең үлкен бөлігі ата-анасының жанында өтеді. Сол себепті ата-ана ретінде балаңыздың жанындағы ең жақын тірек, ең сенімді қорған болу — ең маңызды міндеттердің бірі.

Көбіміз өмірде балабақшаға немесе мектепке «үш рет» баратынымызды байқай бермейміз: алғаш рет — өзіміз, екінші рет — баламыз, үшінші рет — немереміз үшін. Ендеше, балаңызға бүгін қолдау көрсетіп, ертең немере сүйіп, қуана-қуана келетін күндеріңіз көп болсын.

Барысы

1) «Танысу» жаттығуы

Мақсаты: топ ішінде жылы атмосфера қалыптастыру және өзара жақынырақ танысу.

Ата-аналар өз есімдерін және балаларының есімдерін таныстырады. Сонымен бірге баласының бойындағы жақсы қасиеттерді атап өтеді.

2) Ситуациялық сұрақтар

«Баланы жастан бақпасаң, жамандықтан қақпасаң…» деген ой — тәрбиенің үздіксіз екенін еске салады. Бүгінгі ұл — ертеңгі әке, бүгінгі қыз — ертеңгі ана. Демек, тәрбиенің бастауы — отбасы.

Талқылауға арналған сұрақтар:

  • Үйде бала тәрбиесіне кім көбірек көңіл бөледі деп ойлайсыз?
  • «Отбасы бақыты» ұғымын қалай түсінесіз?
  • Отбасыңызда балаңызға қатысты болған қызықты бір оқиғаны айтып беріңіз.
  • Сіз асығыс қонаққа жиналып жатырсыз, ал балаңыз ертегі оқып беруді өтінді. Не істейсіз?
  • Үйде балаңызға қандай ертегілер оқып немесе айтып бересіз?
  • Балаңыз байқамай ең қымбат затыңызды сындырып алды. Сіздің әрекетіңіз қандай болады?
  • Қазіргі өмір қарқынына байланысты ата-аналардың уақыты азаяды: сіз таңертеңнен кешке дейін жұмыста болып, үйге шаршап келесіз. Балаңыздың сұрақтарына жауап беруге де шамаңыз келмей қалса, бұл жағдайға қатысты не айтар едіңіз?
  • Баламның бойынан мені не қуантады, не ренжітеді?
  • Балаңыздың тәртібіне қатысты жиі ескерту алсаңыз, қалай әрекет етесіз?
  • Үйде балаңызбен қандай ойындар ойнайсыздар?

3) Шығармашылық жұмыс: «Отбасылық құндылық ағашы»

Нұсқау:

  1. 1 Үлкен ағаштың суретін салыңыз. Бұл — сіздің «отбасылық құндылық ағашыңыз».
  2. 2 Берілген отбасылық құндылықтарды ағаштың тамырына, діңіне және бұтақтарына орналастырып жазыңыз.
  3. 3 Тамыры — ең негізгі құндылықтар.
  4. 4 Діңі — күнделікті өмірде жиі қолданылатын, орташа деңгейдегі құндылықтар.
  5. 5 Бұтақтары — маңызды болғанымен, сирек қолданылатын немесе аз көңіл бөлінетін құндылықтар.

Уақыт

5 минут

Соңында ортақ талқылауда әр қатысушы өз «бәйтерегін» таныстырып, ойын ашық жеткізеді.

4) Сергіту жаттығуы

Қысқа белсенді тапсырмалар:

  • Егер бүгінгі тренингте көңіл-күйіңіз көтерілсе — аяғыңызды еденге жеңіл соғыңыз.
  • Адамгершілігі мол адамдар — орнымыздан тұрайық.
  • Тренинг туралы ойыңыз жағымды болса — «бәрі керемет!» деп айтыңыз.
  • Бүгінгі кездесуге қуанышты болсаңыз — ду қол шапалақтайық.

5) Ой-толғаныс және қорытынды

Қатысқандарыңыз үшін көп рақмет. Отбасыңызда әрқашан сыйластық пен татулық орнасын. Балаларыңызды мейірімге, махаббатқа және қуанышты сәттерге бөлей жүріңіздер.

Тілегіміз:

Балаңызға уақыт, жылы сөз және түсіністік сыйлау — оның өз-өзіне сенімін өсіретін ең берік тірек.

Автор туралы мәлімет

Ұйым: Батыс Қазақстан облысы, Бөрлі ауданы әкімдігінің білім беру бөлімі

Мекеме: Ақсай қаласының №8 «Өркен» бөбекжайы

Психолог: Купешева Г. С.