Қазақша рефераттар

Ана тілім - дана тілім, бақ тілім

Ана тілі — ұлттың рухы мен тірегі

Қазақ тілі — Қазақстан Республикасының мемлекеттік тілі. Қазақстан көпұлтты мемлекет болғандықтан, ел бірлігін нығайтатын, ортақ құндылықтарды ұйыстыратын мемлекеттік тілдің орны айрықша. Мемлекетімізде қазақ тілінің мәртебесін көтеруге, оны құрметтеп-қастерлеуге бағытталған көптеген іс-шаралар тұрақты түрде өткізіліп келеді.

Тіл — ұрпаққа аманат

Қазақстанда 100-ден астам ұлт өкілдері өмір сүреді. Әр халық үшін ең қымбат қазына — ана тілі. Ана тілі — ұлттың мақтанышы, көзінің қарашығындай сақтайтын асыл мұрасы.

Ұлағатты ой

Елбасымыз Нұрсұлтан Назарбаев: «Ұлттық тіл — қазақ ұлтының рухани, мәдени байлығын ұрпақтан ұрпаққа жеткізуші қасиетті құрал», — деп атап көрсеткен.

Жүректегі жыр: ана тілін ардақтау

Тілді құрметтеу — сөзді дұрыс қолдану ғана емес, ойды анық жеткізу, мәдениетті сөйлеу, әдеби мұраға сүйену. Төмендегі өлең жолдары ана тілінің қадір-қасиетін терең сезіндіреді.

Нұркен — «Сүйем өз тілімді» (Ә. Табылды)

Сүйсем өз тілімді, Боламын білімді: Өз тілім үйретер, Өнерді, ғылымды. Сүйем өз тілімді.

Әсемгүл — «Ана тілі сабағында» (Ә. Табылды)

— Ана тілі тым оңай! — деп, Күлдірген тыңдамай Терезеге қарады, Теректерді санады. Оны көріп мұғалім, Қойды кенет сұрағын: — Айтшы, тұрып сен енді Анықтауыш дегенді. — Анықтауыш... әрине... Анықтайды бәрін де... Күбір сөзі ұзарып, Күлдірген тұр қызарып. Ана тілін білмесең, Аһ ұрасың күнде сен.

Санат — «Ана тілің — арың бұл» (Қ. Мырзалиев)

Ана тілің — біліп қой, Еркіндігің, теңдігің. Ана тілің — біліп қой, Мақтанышың, елдігің. Ана тілің — арың бұл, Ұятың боп тұр бетте. Өзге тілдің бәрін біл, Өз тіліңді құрметте!

Әлинұр — «Ана тіліне тағзым» (М. Әлімбаев)

Ана тілі — біздің туған анамыз! Анамыздай сыйлап, бағып-қағамыз. Ана тілін бағаласақ, қалай біз Өзіміздің сондай болмақ бағамыз. Ана тілін кім аялай білмесе, «Анасынан безген ұл!» — деп қараңыз.

Ақарыс — «Ана тілі» (Ә. Табылды)

Ақыл-ойын адамның Ана тілден аламын. Ана тілім ардақты, Ақ сүтіндей анамның. Өсірген ой-білімді, Сүйем туған тілімді. Мақсат етем әр сөздің Мәнін терең білуді.

Қанат — «Ана тілім» (С. Кәттебайұлы)

Ана тілім — ұраным, Ана тілім — құралым, Ана тілім — болмаса, Мықты болмас тұрағым. Ана тілім — елдігім, Ана тілім — ерлігім. Ана тілім — болмаса, Бүтінделмес кемдігім.

Нұрлыхан — «Ана тілі» (Ш. Сариев)

Мейірі мол балаға, Барлық, барлық анаға, Басымызды иеміз, Бабамыздың тілі деп. Даламыздың үні деп, Ана тілін, ана тілін, Ана тілін сүйеміз.

Азамат — (Д. Әбілев)

Туған тілім — бабам тілі — өз тілім. Туған тілім — анам тілі — өз тілім. Туған тілім — далам тілі — өз тілім. Туған тілім — адам тілі — өз тілім.

Динара — «Ана тілім, күмбірле сарайымда!»

Тілін білген Абылай, Абайым да, Құдірет берген ана тіл талай ұлға. Қасиетті сол тілдің арқасында Ерікті ел боп алысқа қарайын да. Ана тілім, күмбірле сарайымда! Ана тілім — дана тілім, бақ тілім!

Қорытынды ой

Ана тілі — ұлттың жаны. Оны құрметтеу — өзіңді құрметтеу, тарихыңды тану, болашағыңды бекемдеу. Өзге тілдерді меңгеру — білімнің кеңдігі, ал өз ана тіліңді ардақтау — азаматтық парыз.

Түйін: Тілімізді қадірлейік, таза сөйлейік, ұрпаққа аманат етейік.