Сабаққа оқушылардың назарын аудару
Сабақтың мақсаты
Оқушылардың Жамбыл Жабаевтың өмірі мен шығармашылығы бойынша алған білімдерін тексеру және тереңдету, зерттеу арқылы таным көкжиегін кеңейту.
Сабақтың міндеттері
- Оқушылардың өз бетінше іздену дағдыларын қалыптастыру; ақын туралы білімін кеңейту және толықтыру.
- Ауызекі сөйлеу мәдениетін дамыту; сөздік қорын байыту; есте сақтау қабілетін жетілдіру.
Әдіс-тәсілдер
Зерттеу жұмыстары, эссе стратегиялары.
Көрнекіліктер
Бәйтерек суреті, Жамбыл кесенесі, Жамбыл тауының суреті, бағдаршам, «Білім ағашы», бейнетаспа, маркер, плакат, стикер және т.б.
Сабақтың барысы
Ұйымдастыру кезеңі
Оқушылардың назарын сабаққа аудару.
Топқа бөлу: пазл әдісі.
I. Қызығушылықты ояту
«Балалар, бүгінгі сабағымыздың тақырыбына назар аударайық. Неліктен ол “Жүз жыл жырлаған жүрек” немесе “Жүз жасаған бәйтерек” деп аталады деп ойлайсыңдар?»
Дәптерлеріне күнін және тақырыбын жаздыру.
Сәкен Сейфуллин:
«Жамбыл жырлары теңіз түбінде шашылып жатқан маржан секілді. Оны жинап алып, халықтың қолына беру — әрқайсымыздың азаматтық борышымыз».
Жамбыл Жабаев туралы дерек мол: кітап қоры да бар, көркем және деректі фильмдер де түсірілген. Сабақта бейнетаспа көрсетіліп, ақынның екі дәуірдің жыршысы ретіндегі тұлғасы таныстырылады.
Бүгінгі мақсат: ақынның өмірі мен шығармашылығы бойынша алған білімді жинақтап, қосымша мәліметтер арқылы әр қырынан зерттеу.
II. Мағынаны ажырату
Сынып 3 топқа бөлінеді. Әр топ тапсырмасын конверттен таңдап алады. Бағалау парағы таратылады.
1-топ: «Өмірі — аңыз, өзі — абыз»
Жамбылдың өмірінен алынған тағылымды деректерге сүйеніп, суреттер мен фотоматериалдар арқылы зерттеу жұмысын жасайды.
2-топ: «Жамбыл — айтыскер ақын»
Айтыс өнерінің мәні мен түрлерін сипаттап, Жамбылдың суырыпсалма ақын екенін дәлелдейді. Құлмамбетпен айтысын талдайды.
3-топ: «Соғыс тақырыбындағы өлеңдері»
Соғыс жылдарындағы өлеңдерінің идеясы мен көркемдік ерекшелігін қарастырып, ақын үнінің қоғамдық мәнін ашады.
III. Ой толғаныс
«Жамбыл баба — мәңгі бірге қазақпен» тақырыбында шағын эссе жазу.
IV. Қорытынды
Сабақ барысында Жамбыл Жабаевтың өмірі мен шығармашылығы жан-жақты зерделенді. Қорытынды ретінде «Егеменді Қазақстан» газетінде жарияланған «Жүрегі жүз жыл жырлаған» мақаласынан үзінді келтіріледі.
Үзінді мазмұны:
1957 жылы Мұхтар Әуезов Үндістанға сапар шегеді. Онда оның «Абай жолы» романы кеңінен танылғанымен, Әуезовтің ұлты туралы жұрт толық біле бермеген екен. Қазақ екенін дәлелдеудің түрлі жолын іздегенде, ол Жамбылдың есімін атайды. Сол сәтте зал ду қол шапалақтап, орнынан тұрғандар көбейеді. Үнді ақындарының бірі мінбеге шығып, халықтар достығы туралы «Жаңа заң» өлеңін өз тілінде жатқа айтып береді. Сонда Мұхтар Әуезов: «Міне, мен сол Жамбылдың ұлтынанмын», — дейді.
Осы ой бізге бір нәрсені айқын ұқтырады: өз ұлтыңды сүю — өзгені кемсіту емес, керісінше өзге ұлтты құрметтеумен бірге жүретін адамдық ұстаным. ХХ ғасырдың Гомері атанған Жамбыл Жабаевтың даңқы әлемге жайылды, қазақ халқы барда оның есімі де мәңгі жасай береді.
Үй тапсырмасы
Жамбыл Жабаевтың өлеңдерін жаттау.