Қазақша рефераттар

Компьюшаның ертегісі

Сабақтың тақырыбы

Компьютерде жұмыс істеу тәртібі мен қауіпсіздік ережелері.

Мақсаты

  1. Есептеу техникасымен (ЕТ) жұмыс істеу кезіндегі қауіпсіздік ережелерімен танысу және оларды меңгеру.
  2. Компьютермен жұмыс барысында қауіпсіздік талаптарын үнемі есте сақтау дағдысын қалыптастыру.
  3. Оқушы мәдениетін, ұқыптылық пен жауапкершілікті тәрбиелеу.

Ұйымдастыру деректері

Сабақтың түрі
Жаңа сабақ
Сабақтың әдісі
Топпен жұмыс
Көрнекіліктер
MS PowerPoint презентациясы, таратпа материалдар, плакаттар

Сабақтың барысы

Бұл сабақта қауіпсіздік ережелерін тек тыңдап қана қоймай, ойын, әңгіме және тапсырмалар арқылы бекітеміз. Сабақтың басты кейіпкері — Компьюша: ол жаңа білімге жол ашатын «кереметке толы қоржынын» ала келеді.

Негізгі қағида

Ережелерді дұрыс орындау — қауіпсіз жұмыс пен сапалы нәтиженің кепілі.

I. Ұйымдастыру

  • Оқушылармен амандасу.
  • Жақсы көңіл күй қалыптастыру.

II. Жаңа сабаққа дайындық

Бүгін бізге қонаққа Компьюша келді. Оның «кереметке толы қоржыны» бар. Информатика сабағында қоржыннан шыққан тапсырмалар мен кеңестерді оқып-үйреніп, Компьюшаның айтқандарын дәл орындасақ, ол бізбен жақсы дос болады және сыйлықтарын таратады.

1) Жаңа материалды түсіндіру

Қоржыннан шыққан алғашқы «керемет»: компьютерде жұмыс істеу кезінде арнайы ережелерді міндетті түрде есте сақтау керек. Бұл бөлім MS PowerPoint презентациясы арқылы түсіндіріледі.

2) Көзге арналған жаттығулар

Компьюша сұрайды: «Көбелек қанатын қалай қағады?» Көзімізбен көрсетіп көрейік.

  1. Көзді жиі-жиі ашып-жұму.
  2. Басты бұрмай, көзбен оңға, солға, жоғары, төмен қарау — көбелектің ұшу бағытын «сызу».
  3. Жаттығуды 3–4 рет қайталау.

3) Алғашқы түсінікті тексеру: «Миға шабуыл»

Суретке қарап, компьютермен жұмыс істеу кезінде қандай әрекеттерге тыйым салынатынын анықтап, айтып беру.

4) Бекіту: Компьюшаның ертегісі

Күз айы еді. Ауа райы қолайсыз: жел соғып, жаңбыр жауып тұрды. Асан асығып мектепке келсе, бірінші сабақ — информатика. Ол су болған сырт киімін шешпестен, информатика кабинетіне жүгіріп кірді. Мұғалімге назар аудармай, компьютерді қосты.

Қоңырау даусын ести салысымен асығыс сөмкесінен кітап, қалам, дәптерлерін және анасы салып берген тоқашын да шығарып, бәрін пернетақтаның үстіне қойды.

Сабақ ортасында Асан келесі математика сабағына есеп шығармай келгенін есіне түсірді. Ол тынымсыз қозғалып отырып, байқамай электр тогына қосылған сымды аяғымен қозғап, компьютерді өшіріп алды.

Талқылауға арналған сұрақтар

  • Асан қанша қате жіберді?
  • Неліктен информатика кабинетіне сырт киіммен кіруге болмайды?
  • Неліктен мұғалімнің рұқсатынсыз кабинетке кіруге болмайды?
  • Неліктен пернетақтаның үстіне зат қоюға болмайды?
  • Неліктен жалғанған электр сымдарына жақындауға болмайды?

5) Сергіту сәті: «Ой ашар»

Егер сендер шаршасаңдар,

Көбелек болып ұшайық,

Секірейік қоян болып,

Суда жүзіп балықтай,

Отырайық асықпай.

6) Дәптермен жұмыс: «Түртіп алу» стратегиясы

Төмендегі әрекеттердің орындауға болатынын жасыл қарындашпен, болмайтынын қызыл қарындашпен белгілеңдер. Сөйлемдердің мағынасына қарай «болады» немесе «болмайды» сөздерін қосып жазыңдар.

  • Мұғалімнің рұқсатынсыз информатика кабинетіне кіруге …
  • Компьютер сыныбына сабырмен кіріп, өз жұмыс орнына отыруға …
  • Информатика кабинетіне сырт киіммен кіруге …
  • Компьютер сыныбына кірерде бір-біріңді есік алдында итермелеуге …
  • Компьютердің көзге көрінетін ақауын байқасаң, мұғалімге хабарлауға …
  • Байланыстырушы сымдардың ажыратылатын жеріне тиюге …
  • Компьютерде жұмысты тек мұғалімнің рұқсатымен бастауға …
  • Электр тогына жалғанған сымдарға тиюге …
  • Компьютерде су қолмен жұмыс істеуге …

7) Қорытындылау

Не білдік?

Компьютерде жұмыс істеудің негізгі қауіпсіздік талаптарын.

Не үйрендік?

Ережені практикада қолдануды: дұрыс отыру, тәртіп сақтау, сымдарға тимеу.

Не білгіміз келеді?

Қауіпсіз және тиімді жұмыс істеудің қосымша тәсілдерін.

Суретпен жұмыс арқылы негізгі ережелерді тағы бір рет нақтылау.

8) Бағалау

Компьюшаның сыйлықтары: жауап берген оқушыларға баға жазылған Компьюша суреттері таратылады.

9) Үй тапсырмасы

Төмендегі әрекеттердің орындауға болатынын жасыл, болмайтынын қызыл қарындашпен белгілеңдер. Сөйлемдерге мағынасына қарай «болады» немесе «болмайды» сөздерін қосып жазыңдар.

  • Пернетақтаны тоқпақтамай, жай басуға …
  • Экранға және монитордың артқы қабырғасына тиюге …
  • Басқа бағдарламаларды рұқсатсыз ашуға …
  • Көз бен монитор экранының арақашықтығы шамамен 70 см болуына …
  • Жұмысты аяқтағаннан кейін жұмыс орнын ретке келтіруге …
  • Компьютерде жұмыс істеп отырып орныңнан тұруға …