Қазақша рефераттар

Қуыршақ Айсұлудың балалардан көмек сұрай келгенін айту

Білім беру саласы: Таным • Бөлімі: Сенсорика

Мақсаты

Балалардың сенсорлық қабылдауын дамытуға бағытталған оқу іс-әрекеті барысында өткен тақырыптарды еске түсіріп, білімдерін ойын арқылы жетілдіру және бекіту.

Білімділік

  • Заттарды көлеміне, пішініне, түсіне қарай топтап ажырата білуге үйрету.
  • Өткен тақырыптарды еске түсіріп, білімді ойын арқылы бекіту.

Дамытушылық және тәрбиелік

  • Ойлау қабілетін арттыру, тілін дамыту, өздігінен жұмыс істеуге машықтандыру.
  • Қамқорлыққа, ұқыптылыққа, бастаған ісін соңына дейін жеткізуге тәрбиелеу.

Қолданылатын көрнекі құралдар

магнитті тақта түрлі-түсті магниттер әр түрлі ойыншықтар суреттер қуыршақ Айсұлу

Сабақ барысы

1) Мотивациялық-қозғаушылық кезеңі

Шаттық шеңбері:

Қане, шеңбер құрайық,
Алақанды ашайық.
Жүрекке жылу салайық,
Жиналған бар шуақты
Бір-бірімізге сыйлайық.

Қонақтармен амандасу.

2) Ұйымдастырушылық-ізденістік кезеңі

Ғажайып сәт

Бүгін бізге тағы бір қонақ келмек еді, бірақ көрінбейді. Қане, әйнек жаққа қарайықшы — бар ма? (Балалар әйнек жаққа мойындарын бұрады.) — Жоқ. Енді есік жаққа қараңдар. (Сол жақтан қуыршақты көреді.)

Балалар қуыршақпен амандасып, танысады. Қуыршақ Айсұлу балалардан көмек сұрап келгенін айтады:

«Мен шарларды әсемдеу үшін магниттерді дайындап қойған едім. Қатты жел соғып, магниттер араласып кетті. Енді қай магнитті қай шарға қоярымды білмей жылап отырмын».

Балалар Айсұлуға көмектесуге келіседі.

1-ойын: Шарларды сол түстес магнитпен әсемдеу

Түс

Магнитті тақтадағы шарларға сәйкес түстегі магниттерді жапсырады.

Сұрақ: Қызыл шарға қандай магнит орналастырдық?
Жауап: Қызыл магнит.
Сұрақ: Көк шарға ше?
Жауап: Көк магнит.
Сұрақ: Магниттер көп пе, аз ба?
Жауап: Магниттер көп.
Сұрақ: Ал шарлар ше?
Жауап: Шарлар аз.

2-ойын: Үлкен–кіші (көлемін ажырату)

Көлем

Үстел үстіне көлемдері әртүрлі ойыншықтар қойылады. Айсұлуға ең кішкентай ойыншық допты тауып беруді сұраймыз. Балалар ойыншықтардың атауын атап, санап, үлкені мен кішісін көрсетеді.

Билингвалды компонент

доп — мяч (балалар қайталайды)

Сөздік жұмыс

Доптың пішіні — домалақ.

Саусақ жаттығуы

(Балалар екі қолдың саусақ ұштарын біріктіріп, доптың пішінін жасайды; қол қимылымен домалаған доптың қозғалысын көрсетеді.)

Добым, добым домалақ,
Қайда кеттің домалап?
Тәрелкені сындырдың,
Үстел үстін бүлдірдің.

Дидактикалық ойын: «Ұқсас заттарды тауып бер»

Пішін

Мақсаты: балаларға бір затты көрсету, ал балалар өздерінің алдарындағы суреттерден соған ұқсас затты табады.

Мысалы, шар көрсетіледі. Балалар оған ұқсас суреттерді табады: доп, күн, алма және т.б.

Айсұлу балаларға ризашылығын білдіреді: балабақшада көп нәрсе үйренгендерін айтып, өзі де балабақшаға келгісі келетінін жеткізеді. Соңында балалар Айсұлумен қоштасады.

3) Рефлексиялық-түзетушілік кезең

Сұрақтар

  • Біз бүгін кімге көмектестік?
  • Айсұлуға көмектеспесек, не болар еді?

Қорытынды

Балаларға Айсұлуға көмектесу арқылы жақсы іс жасағандары айтылады. Әрқашан бір-біріне көмектесіп жүру керектігі түсіндіріліп, мадақтау жүргізіледі. Қонақтармен қоштасады.

Күтілетін нәтиже

Біледі

  • түстерді ажыратуды;
  • аз–көп ұғымдарын;
  • үлкен–кішкентай ұғымдарын;
  • салыстыруды.

Игереді

  • ойлай білуді;
  • қойылған сұраққа толық жауап беруді.

Меңгереді

  • қайырымдылық жасауды;
  • бір-біріне көмектесудің жақсы іс екенін.

Автор туралы

Шығыс Қазақстан облысы, Катонқарағай ауданы, Солоновка ауылы. «Балауса» балабақшасының тәрбиешісі — Гульбаршын Какановна Захарьянова.

Оқу іс-әрекетінің форматы

Көңілді ойындар арқылы сенсориканы дамыту