Қазақша рефераттар

Астана тобы

Сабақтың мақсаты мен көрнекіліктері

  • Мақсаты: Астана туралы мағлұмат беру, елордамыздың көрікті орындарымен таныстыру; отансүйгіштікке, Отанды қадірлеуге баулу; ұлттық патриотизм рухында тәрбиелеу.
  • Көрнекіліктер: Астанаға қатысты суреттер, слайдтар, буклеттер.

Сабақтың барысы

1) Ұйымдастыру: психологиялық дайындық

Сабақ басында мұғалім мен оқушылар арасында қысқа диалог жүргізіледі. Мақсат — жақсы құндылықтарды еске түсіріп, ортақ көңіл күй қалыптастыру.

Мұғалім

Екі көзің не үшін керек?

Оқушылар

Жақсылықты көру үшін керек.

Мұғалім

Екі құлақ не үшін керек?

Оқушылар

Ақыл-кеңес тыңдау үшін керек.

Мұғалім

Екі қолың не үшін керек?

Оқушылар

Елге көмек беру үшін керек.

Мұғалім

Екі аяғың не үшін керек?

Оқушылар

Жырақта жүрсең, туған жерге жету үшін керек.

Кейін оқушылар қима қағаздар арқылы екі топқа бөлінеді: «Алматы» және «Астана».

2) Топтардың таныстырылымы

1-топ

Алматы

Бұрынғы астана
  • Алматы — еліміздің бұрынғы астанасы.
  • Алатаудың етегінде орналасқан көрікті, сәулетті қала.
  • Әлемге апортымен танымал.
  • Өнеркәсіп орындары мен жоғары оқу орындары көп.
  • Қала тұрғындары Медеу спорт кешенін тамашалайды.

2-топ

Астана

Елорда
  • Астана — еліміздің жаңа астанасы, Отанымыздың жүрегі мен тірегі.
  • Есіл өзенінің оң жағалауында орналасқан.
  • Қала күн сайын көркейіп, гүлденіп келеді.
  • Көрікті орындары өте көп.

3) Ой қозғау: «Отан» ұғымы

«Дүниедегі ең жақсы мекен, жайлы қоныс — әркімнің өз туған жері» деген сөз бекер айтылмаған. Оқушылар «Отан» деген ұғымға өз түсініктерін береді.

Оқушы пікірлері

  • Отан — отбасы.
  • Отан — адамның туып-өскен жері.
  • Отан — жақындарымен бірге тұратын ата-мекен.

Өлең жолдары

Отан — жерім, Отан — суым, Отан қуат, нәр береді.
Отан — ұран, Отан — туым, Отан мәңгі гүлденеді!

4) Қызығушылықты ояту: «Сиқырлы қорапша» ойыны

Алматы тобына сұрақтар

  1. Біздің Отанымыз қалай аталады?
  2. Еліміздің тұңғыш Президенті кім?
  3. Қазақстан қай жылы тәуелсіздік алды?

Астана тобына сұрақтар

  1. Қазақстанның мемлекеттік рәміздерін ата.
  2. Астанада қандай халықаралық көрме өтті?
  3. Біздің мемлекеттік тіліміз қай тіл?

Оқушының қорытынды сөзі:

Біз — ұлтты мекенбіз, ортақ біздің үйіміз.
Ортақ біздің жеріміз, жаса, Қазақстаным!
Жасасын қазақ еліміз!

5) Топтық тапсырма: сөз құрастыру және ән тыңдау

Алматы тобы

Кеспе буындардан: «Бәйтерек», «Ақ Орда» сөздерін құрастырады.

Астана тобы

Кеспе буындардан: «Хан Шатыр», «ЭКСПО» сөздерін құрастырады.

Осы сөздерді естігенде көз алдыңызға қай қала елестейді? Оқушылар Астана туралы ән тыңдап, оның елорда ретіндегі мәнін талқылайды.

Түйін: Астана — еліміздің бас қаласы, жүрегі. Алдымызда елорда туралы айтулы мерекелік дата атап өтілетіні еске салынып, сабақтың мазмұны толықтай Астанаға арналады.

Мағынаны тану: Астана туралы деректер

Әр елдің баласы өз Отанын, туған жерін қадірлеуі керек. Астана — тәуелсіз Қазақстанның бас қаласы, Еуразия кеңістігінің дәл географиялық кіндігінде орналасқан.

Астана мәртебесі

1997 жылдан бері

Елорда мәртебесіне ие болды.

Тұсаукесер

1998 ж. 10 маусым

Астана ретінде тұсауы кесілген күн.

Халық саны

≈ 1 млн

Қалада 1 миллионға жуық адам тұрады.

Қала тарихында атауы бірнеше рет өзгерді: Ақмола (1932), Целиноград (1968), тарихи атауы қайтарылған кезең (1992), кейін елорда ретінде жаңа серпін алған Астана.

1998 жылы халықаралық тұсаукесер өтіп, сол жылы ЮНЕСКО шешімімен Астанаға «Бейбітшілік қаласы» атағы берілді. Елбасы Нұрсұлтан Назарбаевтың бастамасымен дамыған жас қала бүгінде әлемге танымал астаналардың қатарынан орын алды.

Елорда сәулеті: басты нысандар

Бәйтерек

Елорда символы

Бәйтерек — Астанадағы бірегей архитектуралық кешен, елорданың ең көрнекті нысандарының бірі. Металл, әйнек және бетоннан жасалған құрылымның жалпы биіктігі 105 метрге жуық. Есілдің сол жағалауында орналасқан мұнараның көрініс алаңы 97 метр биіктікте (елорданың 1997 жылдан басталған мәртебесіне байланысты белгіленген).

Ерекшелігі

Диаметрі 22 метрлік, салмағы шамамен 300 тонна болатын «хамелеон» әйнекті шар күн сәулесіне қарай реңкін өзгерте алады.

Символдық мәні

Нысан үш бөліктен тұрады: жер асты бөлігі — тамыр жаюды, жоғары бөлігі — өркендеуді білдіреді. Ең үстінде «Аялы алақан» композициясы орналасқан.

Ақ Орда резиденциясы

Ақ Орда — Қазақстан Республикасы Президентінің резиденциясы, елдің мемлекеттік басқару жүйесіндегі маңызды нысан.

Тәуелсіздік сарайы

Тәуелсіздік сарайы — мемлекеттік ресми іс-шаралар, форумдар, мәжілістер, кездесулер мен съездер өткізілетін орын.

«Хан Шатыр» ойын-сауық орталығы

Елордадағы айрықша сәулет шешімдерінің бірі — «Хан Шатыр». Ол қаланың сол жағалауындағы заманауи урбанистік келбетпен үйлескен, көпшілікке танымал демалыс және ойын-сауық кеңістігі.

Хазірет Сұлтан мешіті

Хазірет Сұлтан мешіті — дәстүрлі ислам стилінде салынған ірі ғибадат үйі. Ол Бейбітшілік және келісім сарайы, Тәуелсіздік сарайы, «Қазақ елі» монументі сияқты нысандарға жақын орналасқан. Кешен 13 гектар аумақты қамтиды, мешіттің жалпы ауданы шамамен 17,7 мың шаршы метр. Жобада қазақы ою-өрнек пен ұлттық нақыштағы сәндік элементтер кең қолданылған.

Нұр-Астана мешіті

Нұр-Астана орталық мешітінің құрылысы 2002 жылы басталып, 2005 жылы пайдалануға берілді. Шыны, бетон, болат, гранит және алюкобонд материалдары үйлесім тапқан. Төрт мұнарасының биіктігі 63 метр, күмбезі алтын түстес. Ішкі кеңістікте бір мезетте 5 мың адам намаз оқи алатын зал, ал екінші қабатта 2 мың әйелге арналған балкон бар. Жалпы ауданы шамамен 4000 шаршы метр.

Бейбітшілік пен келісім сарайы

Бұл ғимарат әлемдік және дәстүрлі діндер лидерлерінің съезін өткізуге арналған. Елордадағы маңызды халықаралық диалог алаңдарының бірі.

Цирк ғимараты

Цирк құрылысы 2001 жылдың желтоқсанында басталып, 2005 жылдың 14 желтоқсанында ашылды. Жобаны жүзеге асыру идеясы Қазақстанның тұңғыш Президенті Н. Назарбаевпен байланыстырылады.

«Астана Арена»

Сыйымдылығы

30 000 орын

Ерекшелігі

Жылжымалы жабын

Әлемдегі осындай 6 нысанның бірі.

Ашылған күні

2009 ж. 3 шілде

Стадион тарихындағы алғашқы матчтардың біріне танымал итальяндық төреші Пьерлуиджи Коллина қазылық еткені айтылады. Ашылу сәті ел спорты үшін есте қаларлық оқиға ретінде аталады.

Назарбаев Университеті

Назарбаев Университеті — Қазақстан Республикасы Президентінің бастамасымен ашылған жоғары оқу орны. Университеттің негізгі идеясы — бұрын «Болашақ» бағдарламасы арқылы шетелде білім алған студенттерге Қазақстанда да халықаралық деңгейдегі сапалы білім алуға мүмкіндік беру.

6) ЭКСПО туралы сұхбат

Сабақ барысында Астанада өткен ЭКСПО көрмесіне барып келген оқушымен шағын сұхбат ұйымдастырылып, әсерлері мен көрген жаңалықтары талқыланады.

7) Астанаға арналған өлеңдер

1-оқушы

Астанам — бағы биік асқарымсың,
Астанам — мәңгі жарық аспанымсың.
Астанам — пейіш қалам, ел арманы,
Астанам — қайда жүрсем мақтанышым.

2-оқушы

Астанам — шапағаттың шуағындай,
Астанам — махаббаттың тұрағындай.
Астанам — періштелер мекенісің,
Астанам — махаббаттың тұрағындай.

3-оқушы

Болашаққа бастаған,
Шарықтайды асқақ ән.
Елордасы Отанымның —
Мақтанышым Астанам!

4-оқушы

Астанам — бағым, баспанам,
Қарыштап алға бас қадам.
Отанымның жүрегі —
Елорда, менің Астанам!

Қорытынды

Сабақ соңында оқушылар Астанаға деген жылы лебіздері мен тілектерін білдіреді. Қорытынды ретінде «Атамекен» әні орындалады.

Негізгі ой: Отанды сүю — туған жердің тарихын танып-білу, елорда құндылығын түсіну және ел игілігіне қызмет етуге ұмтылу.