Бауыржан Момышұлының нақыл сөздеріЕрдің туы - намыс

Ердің туы — намыс.

Ерлік — ердің қасиеті, жүректілік — жігіттің қасиеті.

Қырағының өзі де, көзі де батыр.

Айбындана шапқаннан ажал да сескенеді.

Қарабет болып қашқанша, қайрат көрсетіп өлген артық!

Сен жаудан қашсаң, өмір сенен қашады.

Жаныңнан күдер үзе соғыспасаң, жауды күйрете алмайсың.

Жауды өлтірсең — өлімнен құтылдың, өлтірмесең — өлімге тұтылдың.

Таяқтан тайсалмасаң, семсерден сескенбесең — жеңдім дей бер.

Айқаймен ала алмайсың, ақылмен, айламен ал.

Әдіссіздік — әлсіздік, ептілік те — ерлік.

Белдескеннің белін сындыр, тірескеннің тізесін бүктір. Қайратыңа әдісіңді жолдас ет, әдісіңе ақылыңды жолдас ет.

Сабырлылық алдында дұшпан сасады, сабырсыздан береке қашады.

Екі сөзді — ер емес; серт — ер серігі.

Ту сыртыңнан түсірген дұшпанды торға түсір, өршеленген жаудың үнін өшір.

Ерді ел үшін, жігітті жұрт үшін мақта.

Ежелден ел тілегі — ер тірегі; адал ұл ер болып туса — ел тілегі.

Өз қадірін білмеген — ер қадірін білмейді; ер қадірін білмеген — ел қадірін білмейді.

Именіп жүріп көрген игіліктен, қарсыласып жүріп көрген бейнет артық.

Қой бастаған арыстан тобынан, арыстан бастаған қой тобы артық.

Екі жақ қанға батып таласса, қарақұсқа жем болады.