Қазақша рефераттар

Бақытты отбасы суреті

Сабақтың тақырыбы

Өнеге отбасынан

Мақсаты

  • Бала тәрбиесінде отбасы мен ата-ананың орны ерекше екенін түсіндіру.
  • Мектеп–ұстаз–ата-ана ынтымақтастығын нығайту.
  • Отбасы мүшелері арасындағы бауырмалдық, қайырымдылық, достық қарым-қатынасты қалыптастыру.
  • Үлкенді сыйлауға, сыпайы әрі ілтипатты болуға тәрбиелеу.

Көрнекіліктер мен әдістер

Көрнекілігі

  • Қанатты сөздер
  • «Бала тәрбиесі — бесіктен»
  • «Ата — бәйтерек, бала — жапырағы»
  • Карточкалар, слайдтар

Түрі

  • Викториналық сұрақтар
  • Жағдаятты шешу
  • Тіл өнері: мақал-мәтел
  • Бейнематериал

Сабақ барысы

  1. IҰйымдастыру
  2. IIВикториналық сұрақтар
  3. III«Бақытты отбасы» суреті
  4. IV«Тығырықтан шығу»
  5. V«Сөз тапқанға — қолқа жоқ»
  6. VIБейнематериал көрсету
  7. VIIҚорытындылау

Кіріспе сөз

Құрметті ұстаздар, оқушылар! Бүгін «Өнеге отбасынан» тақырыбындағы ашық тәрбие сағатында бала тәрбиесі мен оның жан-жақты дамуы туралы ой бөлісеміз. Халқымыздың сан ғасырлық даналығына құлақ ассақ, «Адамның бақыты — балада» деген сөз бекер айтылмаған.

Біреулер бақытты байлықтан тапқысы келсе, енді біреулер даңқ пен атақтан, мансап пен қызметтен іздейді. Алайда адамға нағыз бақытты тәрбиелі ұрпақ қана сыйлай алады. «Адам ұрпағымен мың жасайды» деген тәмсіл де осыны меңзейді.

Сәби дүниеге келген сәттен бастап ата-ананың алдында нәзік те күрделі, қыр-сыры мол үлкен қоғамдық міндет тұрады. Ол — бала тәрбиесі. Бала үшін үй ішінен, ата-анадан артық тәрбиеші жоқ.

Негізгі ой

Тәртіпті әрі тәрбиелі ұрпақ — отбасынан және мектептен алған үлгі-өнегенің біріккен жемісі.

Ендеше, бүгінгі сайысымызды бастайық.

I бөлім — Таныстыру

Қатысушылар 3 топқа бөлінеді:

1-топ

Алтын ұя

2-топ

Берекелі отбасы

3-топ

Бақытты отбасы

II бөлім — «Білімдіге дүние жарық» (викторина)

Бұл кезеңде топтардың шапшаңдығы мен білім деңгейі байқалады. Әр топқа төмендегі сұрақтар қойылады.

1-топ: «Алтын ұя»

1) Балдан тәтті не?
Бала.
2) Қара шаңырақ иесі кім?
Кенже ұл.
3) Әкеден балаға берілетін зат?
Мұра.
4) Үйдегі «алтын адам» кім?
Ана.
5) Үш арсызды ата.
Ұйқы, тамақ, күлкі.

2-топ: «Берекелі отбасы»

1) Бес дұшпанды атаңдар.
Өсек, өтірік, мақтаншақ, еріншек, бекер мал шашпақ.
2) «Ұл атадан көрмейінше сапар шекпес» — кімнің нақыл сөзі?
Қорқыт ата.
3) Жасөспірім бала неше жастан бастап қылмыстық жауапкершілікке тартылады?
14 жас.
4) Тәрбие мен білімнің ордасы.
Мектеп.
5) Мемлекеттік рәміздерді ата.
Елтаңба, Ту, Әнұран.

3-топ: «Бақытты отбасы»

1) 18 жасқа толмаған адам.
Бала.
2) «Өзін-өзі тану» бағдарламасының авторы кім?
С. Назарбаева.
3) Екі адамның бір-біріне деген адалдығы.
Достық.
4) Бес асылды ата.
Талап, еңбек, терең ой, қанағат, рақым.
5) Жеті атаны ата.
Ата, әке, бала, немере, шөбере, шөпшек, немене.

III бөлім — «Бақытты отбасы» суреті

Әр топ «Бақытты отбасы» тақырыбында сурет салып, өз жұмысының идеясын қорғап шығады. Негізгі назар — отбасы бірлігі, сыйластық, қамқорлық және өзара қолдауға аударылады.

IV бөлім — «Тығырықтан шығу» (жағдаяттық сұрақтар)

Қатысушылар берілген жағдайларға байланысты ой қорытып, өз шешімін ұсынады.

  1. Жағдаят 1

    Сенің жақын, адал досың бар, бірақ ата-анаң онымен дос болуға қарсы. Не істейсің?

  2. Жағдаят 2

    Тоқсан ұзаққа созылды, досың сабаққа аз дайындалып, үлгерімі төмендеп кетті. Сен не істейсің?

  3. Жағдаят 3

    Сенің үлгерімің орташа. Сыныптастарың сені тек бағаң арқылы бағалап, адамгершілік қасиеттеріңді байқамайды. Не істейсің?

  4. Жағдаят 4

    Мұғалімдер ертеңге тапсырма берді. Белгілі себептермен орындап үлгермедің. Қандай әрекет жасайсың?

  5. Жағдаят 5

    Сыныпта себепсіз көп сабақтан қалатын оқушы бар. Ол оқушыға деген көзқарасың қандай?

V бөлім — Тіл өнері: мақал-мәтелді жалғастыру

Мақал-мәтелдің жалғасын тауып, мәнін ашып айту ұсынылады.

1) Ананың көңілі балада,

баланың көңілі далада.

2) Ұяда не көрсең,

ұшқанда соны ілерсің.

3) Ананың сүті — бал,

баланың тілі — бал.

4) Туған үйдің түтіні жылы,

туған ананың күтімі жылы.

5) Анаңа ауыр сөз айтпа,

артыңа ауыр жүк артпа.

6) Бала — бақшадағы гүлің,

оны тәрбиелеу — үлкен ғылым.

7) Құс балапаны үшін

тұзаққа түседі.

8) Ана сүтін ақтамағанды

ешкім жақтамайды.

9) Әдепті бала ата-анасын мақтар,

әдепсіз бала ата-анасын қақсатар.

10) Атаның баласы болма,

халықтың баласы бол.

11) Балалы үй — базар,

баласыз үй — қу мазар.

12) Әке — асқар тау,

ана — шалқар көл.

13) Жеті атасын білмеген —

жетесіз.

VI бөлім — Бейнематериал

Тақырыпты тереңдету үшін тәрбиелік мәні бар қысқа бейнематериал көрсетіледі. Көргеннен кейін қысқаша пікір алмасу ұйымдастырылады.

VII бөлім — Қорытынды

Ой салатын сөз

Халқымыздың аяулы ұлы Бауыржан Момышұлы кезінде былай деген екен: «Жаудан да, даудан да қорықпаған қазақ едім. Енді қорқынышым көбейіп жүр. Балаларын бесікке бөлей алмаған, бесігі жоқ елден қорқам. Немересіне ертегі айтып беретін әжелердің азаюынан қорқам. Дәмді, дәстүрді сыйламайтын балалар өсіп келе жатыр. Оның қолына қылыш берсе, кісі де болса шауып тастауға даяр. Қолына кітап алмайды. Үйреніп жатқан бала жоқ, үйретіп жатқан әке-шеше жоқ».

Бауыржан атамыз бүгінде арамызда жоқ. Бірақ ол көтерген мәселе бәрімізді алаңдатуы тиіс. Бұл ой ата-анаға да, ұстазға да, балаға да жауапкершілік жүктейді.

Түйін

  • Тәрбие — ортақ іс.
  • Отбасы мен мектеп бірлікте болғанда нәтиже нығаяды.
  • Дәстүр, тіл, кітап, мейірім — ұрпақтың тірегі.

«Жұмыла көтерген жүк жеңіл» демекші, балаларды бірлесе тәрбиелейік: ойнайық, күлейік, қолдайық.

Құрметті ұстаздар, ата-аналар, оқушылар! Бүгінгі тәрбие сағатымызды қорытындылай келе, белсене қатысқан оқушыларға алғыс айтамыз. Балаларымыз бізді әрдайым жақсылық пен қуанышқа бөлей берсін!

Өзін-өзі тану пәні мұғалімі: Жасұлан М. Ж.