Психологиялық сағаттың кезеңдері
Жақсы көңіл күй – жан азығы
Адам көңілінің тазалығы да, көңіл күйінің жақсы не нашар болуы да көбіне өзіне байланысты. Дегенмен көңілге әсер ететін, көңілді түсіретін немесе көтеретін жағдайларда сыртқы ортаның ықпалы да зор.
Адамның денсаулығы жақсы болып, жұмысы алға басып, отбасында, ұжымда және қоғамда күрделі қиындықтар аз болса, көңіл күйі де жеңіл, көтеріңкі болады. Сол себепті бүгінгі кездесудің өзегі – өзімізге құрметпен қарап, бір-бірімізбен сыйластықта болу арқылы ішкі ресурсты күшейту.
Мақсаты
- Ата-аналардың психологиялық көңіл күйін көтеру.
- Шығармашылық қабілеттерін байқату және бағалату.
- Өзіне құрметпен қарауға, сыйластық қарым-қатынасқа шақыру.
- Мектепке жағымды көзқарас қалыптастыру.
Психологиялық сағаттың кезеңдері
1-кезең
Менің есімім
2-кезең
Жағдаяттар шешу
3-кезең
Фигуралық тест
4-кезең
Сергіту сәті: «Үрленген қуыршақ»
5-кезең
Менің бойымдағы қасиеттер
6-кезең
Қолтаңба
7-кезең
Мен өз баламды қаншалықты танимын
8-кезең
Релаксация
9-кезең
Рефлексия
Ортақ ережелер
Жұмысымыз нәтижелі әрі жайлы өтуі үшін төмендегі келісімдерді сақтауды ұсынамыз:
- 1 Бір-бірімізді мұқият тыңдаймыз.
- 2 Жанымыздағы адамдармен сыйластықта, жылы қарым-қатынаста боламыз.
- 3 Уақытты үнемдейміз.
- 4 Белсенділік көрсетеміз.
- 5 Маңызды ойларды ғана айтамыз.
- 6 Өз ойымызды ашық әрі мәдениетті түрде жеткізуге үйренеміз.
1-кезең: «Менің есімім» (сәлемдесу және танысу)
Мақсаты – танысу рәсімін қызықты өткізу, топ ішінде жағымды байланыс орнату және қатысушылардың көңіл күйін көтеру.
Құрметті ата-аналар, алдымен танысып, сәлемдесейік. Алдарыңыздағы қағаздан жасалған маңдайшаға бүгінгі сабақта өзіңізді қалай атауды қалайтыныңызды жазып қойыңыз.
Барлығымыз маңдайшамызды алып, ортаға шығып, шеңбер құрайық. Енді сол есімдермен бір-бірімізге бүгінгі күнге арнап қысқа әрі шынайы тілек айтайық.
Неліктен бұл маңызды?
Жылы сөз есту – көңілді бір сәтте көтеретін күш. Көңіл күйдің жақсаруы денсаулыққа да пайдалы, шаршауды азайтып, ішкі серпінді арттырады.
2-кезең: Жағдаяттар шешу
Мақсаты – кез келген қиын жағдайдан жол табуға үйрету, баланың құқығын сақтауға назар аударту және балаға дұрыс көңіл бөлу мәдениетін қалыптастыру.
1-жағдаят
Отбасы ішіндегі шекараОн жасар баласының бөлмесін жинап жүрген анасы баласының кейбір заттарын «қажетсіз» деп лақтырып жіберді. Бала мектептен келген соң, жағдайды көріп қатты ренжіді. Анасы болса, «үйді реттейтін менмін, сондықтан қалай жинасам солай болады» деп есептейді.
Талқылау сұрақтары
- Анасының әрекеті дұрыс па? Неліктен?
- Қандай қателік жіберілді?
- Баланың қандай құқығы бұзылды?
2-жағдаят
Мінез-құлық және себепБаланың күнделігінде үнемі мектепте жанжал шығарғаны туралы ескертулер жазылады. Осы үшін ата-ана «тәрбиелеу» мақсатында жүйелі түрде күш қолданған.
Талқылау сұрақтары
- Бала неге жиі жанжал шығарады деп ойлайсыз?
- Бұл жағдайда ата-ана қандай қадам жасауы керек?
3-жағдаят
Эмоциялық жақындықБала өте қатал отбасында өседі: ойыншық та, тәтті де алынбайды, кино, концерт, спектакльге де бармайды. Ол тек бұйрықты орындаушы ретінде тәрбиеленген. Барлығын мүлтіксіз орындаса да, ата-анасынан бір ауыз жылы сөз естімейді.
Талқылау сұрақтары
- Мұндай отбасы туралы не айтар едіңіз?
- Өз балаңыздың осылай өскенін қалар ма едіңіз? Неліктен?
4-жағдаят
Таңдау еркіндігіСымбаттың тәрбиесіне қатысты отбасында екі түрлі көзқарас бар. Әкесі оны шығыс жекпе-жегі үйірмесіне бергісі келеді: «өзіңді қорғауды үйренеді» дейді. Анасы қарсы: «бұл қыз балаға лайық емес» деп санайды. Сымбат үйірмеге қатысқысы келеді, бірақ анасының көңілін де қалдырғысы келмейді.
Талқылау сұрақтары
- Мұндай жағдайда ата-ана не істеуі керек?
- Сіз кімнің көзқарасын жақтайсыз: әкенікі ме, ананікі ме? Неге?
5-жағдаят
Сыйлық мәдениетіОн екі жасар Әсемге қонаққа келген Айгүл апасы жақсы кітап пен үлкен шоколад сыйлайды. Әсем анасы үйреткендей алғыс айтып, ризашылығын білдіреді де: «Менде мұндай кітап бар, ал шоколадты жемеймін» деп сыйлықты қабылдамайды.
Талқылау сұрақтары
- Мұндай жағдайда сіз балаңызға не айтар едіңіз?
- Сыйлықты қалай дұрыс қабылдауға үйретесіз?