Менің сүйікті ойыншықтарым

Білім саласы: Қатынас
Бөлімі: Тіл дамыту
Тақырыбы: Менің сүйікті ойыншықтарым.
Мақсаты: Балаларды ойыншықтардың түрімен, түсімен таныстыру, тақпақтар айтқызу, сөздік қорын молайту, тіл байлығын дамыту, қабылдау есте сақтау қабілетін жетілдіру, ойын арқылы қызығушылығын артыру мақсатында өткізілетін сабақ түрлі түсті ойыншықтар, көрнекілікке алынып көрсету, түсіндіру, әңгімелеу, сұрақ - жауап, ойын, көркем сөз пайдалану.
Көрнекіліктері: Резеңкеден жасалған, темірден жасалған, ағаштан жасалған, матадан жасалған ойыншықтар және суреттері, ойынға байланысты маскалар, аңдар киімдері, көбелек.
Тәрбиеші: Балалар қараңдаршы бүгін бізге көптеген қонақтар келіпті. Қане қонақтармен жақсылап амандасып алайық.
Шаттық шеңбері.
Кішіге де сіз,
Үлкенге де сіз
Баршаңызды құрметтеп,
Бас иеміз біз.
Сәлем күн - анамыз,
Бүгін бәріміз қуанамыз.
Қайырлы таң!
Қайырлы күн!
Күліп шыққан бүгін Күн!
Көбелек гүлге қонады ойыны
Ойынның шарты: Сендер гүлдерсіңдер, сол гүлге көбелек ұшып келіп қонады.
Көбелек қонған бала менің сұрағыма жауап береді.
1 Қазір жылдың қай мезгілі?
2 Қыс мезгілінде неше ай бар?
3 Ауа - райы қандай болады?
4 Сүйікті ойыншығың қандай?
Тәрбиеші: Балалар енді Ненің суреті жасырылған? ойын ойнап алайық. Ойын шарты бойынша өздеріңе ұнаған пішіндерді таңдап алыңдар, олардың артында аяқталмай қалған суреттер бар сол ненің суреті екен табыңдар.
Жасырылған суреттер: доп, қуыршақ, машина, ит т. б
- Балалар, сонда бұлар ненің суреттері?
- Ойыншықтардың
- Жарайсыңдар, дұрыс. Осы ойыншықтарымыз қандай пішіндердің артына жасырылған?
Балалар сендер үйде, балабақшада не істейсіңдер? Немен ойнайсыңдар? Иә, балалар бүгін біз сіздермен сүйікті ойыншықтарымыз туралы айтамыз!
Ойыншықтармен қалай ойнау керек екенін білеміз бе? (балалардың жауабы)
Мына керемет ойыншықтар барлығы балалар үшін жасалған. Олар үлкендердің еңбегінің арқасында жасалады.
Күнделікті ойыншықтарымыздың неден жасалатынын білеміз бе? Иә, онда мына ойыншықтарымызға мұқият қарайықшы. Ойыншықтардың мынадай түрлері бар екен. Ойыншықтардың түрлерімен таныстырып кетейін.
1. пластмассалы
2. резиналы
3. матадан
4. ағаштан
5. темірден
Балалар сендер енді өздеріңнің ойыншықтарыңды неден жасалатынын білдіңдер ме?
Балалар енді сендер өздерінің сүйікті ойыншықтарың туралы тақпақ білесіңдер ме?
Нұрхан
Үлкенмін ғой міне мен,
Ойыншықтарды жинаймын.
Машинаға мінер ем,
Кабинаға сыймаймын.
Меруерт
Добым менің домалақ,
Тоқтамайсың домалап.
Үстел үстін бүлдірдің,
Тәрелкені сындырдың.
Қобылан
Рельстің жолы ұзын,
Мынау менің пойызым.
Тақ - тұқ жолға шықтық,
Тақ - тұқ шамды жақтық.
Нұрасыл
Кесе - шыны пияла,
Оларсыз шәй құя ма.
Қасықсыз тамақ жемейміз,
Бәрінің атын не дейміз.
Дидактикалық ойын: Кім жылдам?
Балалар мен енді жұмбақ жасырамын егер жауабын дұрыс тапсаңдар сандық ішінен сол ойыншық шығады.
Кезікті бір жануар,
Үстінде екі тауы бар.(түйе)
Үрлесең жеп - жеңіл,
Елпілдеп кетеді.
Ұшырсаң, Көк – теңбіл.
Бұлтқа да жетеді. (Шар)
Тиіп кетсе жылаған,
Дауысы көпке ұнаған.(домбыра)
Қане балалар сендерге ойыншықтар туралы тақпақ айтып берейін.
Бізде де бар қуыршақ,
Бұзау, қозы, құлыншақ.
Ойыншықтар тыңдайды,
Ақыл айтсақ бұйырсақ.

Сергіту сәті
Тікірейіп екі құлағы,
Менен бұрын тұрады.
Бойын жазып керіліп,
Беті қолын жуады.
Секірем деп үстелден,
Құлап жүрме мысығым.
(Осы кезде есік қағылады, Сайқымазақ өзінің достарын ертіп келеді.)
Балалар мені таныдыңдар ма?
Менің достарым сендерге өз ойларын айтқысы келеді, оны есту үшін менің сыйқырлы сөздерімді қайталаңдар Рэкс, Пэкс, Фукс Ойыншықтарға тіл бітеді
Аю: Мен бал құмар аюмын, қорбаңдаймын ол рас ойнауды мен ұнатамын, тек өтінемін құлағымнан тартпаңдар.
Күшік: Мен күшікпін аф - аф мен сендерді қорғаймын, тек құйрығымнан тартпаңдар.
Қуыршақ: Мен әдемі қуыршақпын қыздарды жақсы көремін, тек шашымнан тартпаңдар.
Балалар ойыншықтарына ұқыпты қарауға, бәрімен дос болуға уәде береді.
Сайқымазақ ойыны: Балалар мен сендермен бірге ойын ойнағым келеді Ойнайсыңдар ма? Ойыншықты сипатта ойынның шарты бойынша ортаға шыққан баланың көзін байлап қолына ойыншық ұстату, оның қандай ойыншық екенін қолымен сипап көру арқылы атау.
Балалар мен де өзіммен бірге сүйікті ойыншығымды алып келдім. Мен де сендер сияқты кішкентай кезімде осы ойыншықпен ойнағанмын. Мен де ойыншығымды ұқыпты, таза, кірлетпей ойнадым. Қараңдаршы әлі де жап - жаңа, тап - таза. Сендер де ойыншықтарыңды таза, ұқыпты ұстаңдар. Осы менің ойыншығымды қазір бәріңе беремін, қолдарыңа алғанда осы ойыншыққа жақсы тілектерімізді айтайықшы.
Тілектер тізбегі
- Нанымыз көп болсын!
- Еліміз аман болсын!
- Досымыз көп болсын!
- Деніміз сау болсын!
- Әке - анамыз аман болсын!
- Аспанымыз ашық болсын!
- Елбасымыз аман болсын!
- Бақытты ел болайық!
Сайқымазақ: Мына шарларды сыйға тартамын.
Балаларды мадақтау
Орнымыздан тұрайық,
Түзу сызық құрайық.
Көріскенше күн жақсы,
Сау - саламат болайық!