Аудандарды салыстыр

Қызылорда облысы, Қазалы ауданы, Қазалы ауылы, №100 орта мектебі

Бастауыш сынып мұғалімі: Темірбаева Гүлмира Құлымжанқызы

Сабақтың тақырыбы: Аудан. Фигуралардың аудандарын салыстыру

Сабақтың міндеттері

Оқушыларды аудан ұғымымен таныстыру және аудандарды салыстырудың қарапайым тәсілдерін меңгерту.
Көбейту амалына байланысты есептерді шығару дағдысын бекіту.
Салыстыру, қатар қою және қорытынды жасау біліктілігін дамыту.

Сабақтың жоспары

I. Ұйымдастыру кезеңі

Сабақты бір-бірімізге жақсылық тілеуден бастайық. Балалар, жүрек тұстарыңды ұстап, қолдарыңды кеуделеріңе қойыңдар. Жүректеріңнің соғысын тыңдаңдар: дүрс-дүрс. Жүректеріңнің орнында мейірімді күннің бір бөлшегі тұр деп елестетіңдер: оның жылы да жарқын сәулесі денелеріңе, қолдарың мен аяқтарыңа тарайды. Жылу мен жарық бойымызға сыймайтындай мол. Ендеше, сол жылу мен жарықтың бір бөлігін бір-бірімізге сыйлайық. Күлімсіреу арқылы өзара ізгі тілегімізді жеткізейік.

II. Өткен сабақты қорытындылау

1) Ауызша санау

Естеріңде болсын: ауызша санаусыз кез келген жұмыс алға баспайды.

Чебурашка қонаққа келді. Ол хайуанаттар бағының жанында билет сатып отыр. Билеттерде нөмірдің орнына санды өрнектер берілген. Әр билет «нөмірін» анықтап, қалай есептегендеріңді түсіндіріңдер.

1) 5 × 3
2) 2 × 2
3) 4 × 2
4) 6 × 2
5) 7 × 3
6) 5 × 4
7) 33 + 250

2) Өрнек құрастыру және мәнін әртүрлі тәсілмен табу

3 саны бойынша

3 + 3 + 3 = 9
3 × 3 = 9
3 × 2 = 6

2 саны бойынша

2 + 2 + 2 = 6
2 × 3 = 6

Талқылауға арналған сұрақтар:

Неше табақша көріп тұрсыңдар?
Алмалар неше табақшада орналасқан?
Шешудің қандай тәсілдерін ұсына аласыңдар?
Ең қолайлы тәсіл қайсысы? Неліктен?

3) Жаңа материалға дайындық (өлшем бірліктері)

10 см = ___ дм

2 м 5 см = ____ см

2 ц 50 кг = _____ кг

3 дм 2 см = _____ см

3 дм 5 см = _____ см

3 м 2 дм 5 см = ____ см

32 дм = ____ м ____ дм

Сұрақ: Сендер қандай шамалардың бірліктерімен жұмыс істедіңдер? (ұзындық, масса)

III. Жаңа материалды түсіндіру

Бүгін біз тағы бір шамамен танысамыз. Оның атауы — аудан. Аудан — фигураның жазықтықта алатын орнын (алып жатқан бөлігін) сипаттайтын шама.

Мысал: үстелдің ауданы оқулықтың ауданынан үлкен.

Мысал: дәптердің ауданы тақтаның ауданынан кіші.

Талқылау: Мұны қалай дәлелдеуге болады? Өздерің де мысал келтіріңдер.

Оқулықпен жұмыс: №1

Суретке қараңдар. Аудандарды салыстырып, сұрақтарға жауап беріңдер.

Екінші фигураның үстіне толықтай қоюға болатын фигураның ауданы туралы не айтуға болады? Қорытынды жасаңдар және оны оқулықтағы жауаппен салыстырыңдар.
Аудандарды басқа тәсілмен де салыстыруға болады: 1 және 2-суреттердегі бірдей фигуралар санын санаңдар. Аудандар туралы қандай тұжырым жасайсыңдар?
2-суреттегі екі фигураның аудандары тең деп айтуға бола ма? Неліктен?

IV. Бастапқы бекіту

№2, №3, №4 тапсырмаларының негізінде практикалық жұмыс орындалады.

Практикалық жұмысты жұппен орындайсыңдар. Әр жұпқа геометриялық фигуралар беріледі.

«Бүгін геометриялық фигуралар сендерді нағыз сынақтан өткізеді: салыстырыңдар және бір-біріңе дәлелдеңдер — қай фигураның ауданы үлкен, қайсысы кіші?»

Ескерту: кейбір жұптарға бірдей фигуралар беріледі.

V. Сергіту сәті

Көбелек тұрып ертемен, Күлімсіреп керілді. Бір — шықпен бетін жуынды, Екі — шыр айналып бұрылды, Үш — еңкейіп жерге жетті, Төрт дегенде ұшып кетті.

VI. Өтілген материалды қайталау

1) №6 тапсырма: теңдеуді шешу.

2) Есептерді шығару:

№5 есептің қысқаша шартын жазу.
Шығармашылық тапсырманы орындау.
Өз бетінше жұмыс: №9.

№9: Алтыбұрыштың периметрін есепте. Қай тәсіл ең қолайлы? Неліктен?

Қосу тәсілі

2 + 2 + 2 + 2 + 2 + 2 = 12 (см)

Көбейту тәсілі

2 × 6 = 12 (см)

VII. Сабақты қорытындылау

Сабақта қандай көңіл күймен жұмыс істедіңдер?
Қандай жаңа білім алдыңдар?

Егер сабақ ұнаса, көңілді күнді таңдаңдар — ол бізге жылу сыйлағанын ұмытпайық. Ал көңілсіз болсаңдар, көңілсіз күнді таңдаңдар.

Жақсы жұмыс істегендерің үшін және бір-бірімізге қуаныш сыйлағанымыз үшін рақмет!

VIII. Үй тапсырмасы

№7, №8(2), №11.