Оқушыларға арналған дереккөздер тапсырмалар
Қысқа мерзімді сабақ жоспары (Дүниетану, 4-сынып)
Сабақ жоспары оқушылардың еңбек туралы түсінігін кеңейтіп, табиғат пен адам байланысын дәлелдеуге бағытталған. Тапсырмалар жеке, жұптық және топтық форматта ұйымдастырылып, практикалық әрекет арқылы білім бекітіледі.
Сабақтың тақырыбы
Адамды адам еткен еңбек
Мақсаты
- «Адамды адам еткен еңбек» ұғымының мағынасын ашу.
- Еңбек ету арқылы жасалған бұйымды қорғауға және бағалауға үйрету.
Күтілетін нәтиже
- Оқушылар жануарлардың тіршілігін бақылауды үйренеді.
- «Адам — табиғаттың бір бөлігі» деген тұжырымды дәлелдей алады.
- Топта жұмыс істеп, өз ойын айтады, сұрақ қойып, жауап береді.
- Әртістік қабілеттері дамиды, шығармашылық жұмыс орындай алады.
Тапсырмалар мен жұмыс түрлері
Тапсырма негіздері
- Оқулықтағы практикалық жұмыс (7–8-бет).
- Ізденіс сипатындағы тапсырмалар.
- Топта талқылау: ой бөлісу, топқа бейімделу.
- Оқулықпен және дәптермен жұмыс.
Оқушыларға арналған дереккөздер
Ғаламтордан мәлімет қарастыру: проектор арқылы www.google.com сайтына кіру.
Көрнекілік пен бағалау
Сабақтың көрнекілігі
- Постерлер, бағалау парақшалары, критерийлер.
- Кері байланыс парақшасы.
- Бор, тақта, маркер, плакат, түсті суреттер.
Қолданылатын тәсілдер
Жеке, жұптық және топтық жұмыс; оқулықпен және дәптермен жұмыс; сергіту сәті; практикалық жұмыс; кестемен жұмыс; «Галереяға саяхат» стратегиясы; топтық бағалау; өзін-өзі бағалау; өткенге шолу; өмірмен байланыстыру; көңіл күйді көтеру сәті.
Сабақтың барысы
Ұйымдастыру кезеңі
Мұғалімнің бағыттаушы сұрақтары:
- Балалар, көңіл күйлерің қалай?
- Қазір қандай сабақ?
- Жақсы оқушы, білімді екенімізді қалай көрсете аламыз?
Үй тапсырмасын тексеру
Мәтінді оқып, энциклопедиядан ежелгі адамдардың тіршілігі туралы мәлімет іздеп, шағын зерттеу жұмысын дайындау тапсырылған еді. Кім дайын?
Топқа бөлу
Оқушылар геометриялық фигуралар арқылы 3 топқа бөлінеді.
Кіріспе: табиғат туралы өлең
Табиғат аялаған жан аясын,
Аямай төгер бізге сан саясын.
Аяла табиғатты өз көзіңдей,
Сүйеді тірліктегі әр баласын.
Сабақтың тақырыпқа шығуы
Бүгін адамның табиғаттан нені үйренгенін оқып білеміз.
Сұрақ: Адам табиғаттан нені үйренді деп ойлайсыңдар? (Оқушылардың жауабы тыңдалады.)
Сонымен қатар, өткен өмірге «саяхат» жасап, адамның үздіксіз еңбек ету нәтижесінде ғана дамитынына көз жеткіземіз. Яғни, адамды адам еткен — еңбек екенін түсінеміз.
Түсініктеме: тарихи дереккөздер
Адамдардың өткен өмірі туралы мәліметтер тарихи дереккөз деп аталады.
Тарихи дереккөздер үшке бөлінеді:
- Жазбаша дереккөздер
- Ауызекі дереккөздер
- Заттық дереккөздер
Топтық жұмыс: әр топ «Тарихи дереккөздер» кестесін толтырады.