Желтоқсан оқиғаларының сипаты

Көрнекіліктер

Газет-журналдар, кітаптар, буклеттер, суреттер, қанатты сөздер, бейнематериалдар.

Ата-бабаларымыз сан ғасырлар бойы өз елінің, жерінің білімді, қайратты, ұлтжанды, намысшыл, иманды тұлғаларын тәрбиелеуді арман-мұрат еткен. Бүгінгі парызымыз да — рухани, идеологиялық-әлеуметтік, экономикалық және ғылыми-техникалық ілімдерден нәр алып, ел дамуына үлес қосатын жастарды тәрбиелеу.

Тәуелсіздіктің түп-тамыры Желтоқсан оқиғасымен тікелей байланысты екеніне ешкім дау айта алмас. «Түбін білмеген — тексіз» деген қазақтың нақыл сөзі де осындайда еске түседі: тәуелсіздікке бастау болған рух сонау бабалардың ар-намысынан нәр алады.

Бейбіт шеруге шыққан жастардың бір бөлігі қанды қақтығыста қаза тапты, ал аман қалғандары өздері аңсаған азаттықтың таңын көріп, бүгінде арамызда жүр. «Уақыт — емші» деп өзімізді жұбатқанымызбен, қыршын кеткен бауырларымыз еске түскенде жан жарасы қайта қозып, жүрек сыздап қоя береді.

Д. Қонаевтың қызметтен босатылып, республика тізгінінің жергілікті жағдайды жетік білмейтін өзге ұлт өкілі — Г. В. Колбинге тапсырылуына наразылық білдірген жастар алаңға шықты. Олар бірінші хатшылыққа лайықты қазақ азаматтарының Мәскеу тарапынан ескерілмеуінің себебін түсінбей, өз талап-тілектерін бейбіт түрде жеткізгісі келді. Алайда бұл қадамның осыншалықты аласапыранға ұласарын көпшілігі болжаған жоқ.

1986 жылғы Желтоқсан көтерілісі — халқымыздың қасіреті мен ар-намысына, сонымен бірге мақтанышына айналған тарихи белес. Бұл оқиға қазақ халқын дүниежүзіне танытты. Желтоқсан — тек қаралы күндер ғана емес, ел санасын оятқан, тәуелсіздікке ұмтылысқа серпін берген, тарих шежіресіне алтын әріптермен жазылған кезең.