Жаттығу қаласы
Ұйымдастырылған ашық оқу іс-әрекетінің технологиялық картасы
Тақырыбы
«Кім аяздан қорықпайды?»
Кіріктірілген білім салалары
- Денсаулық
- Шығармашылық
Мақсаты
- Табиғаттың сауықтыру күшін пайдалана отырып, балалардың денсаулығын сақтауға және нығайтуға ықпал ету.
- Қимыл-қозғалыс қабілеттерін жетілдіру; сергек, көтеріңкі көңіл-күйде, белсенді болуға, ептілікке, жылдамдыққа, батылдық пен төзімділікке баулу.
- Досқа көмектесу, сыйластық, мейірімділік және адамгершілік қасиеттерге тәрбиелеу.
Қажетті құрал-жабдықтар
- 2 шана
- Әр балаға ойыншық
- Қар жапалақтары (бала санына қарай)
Кейіпкерлер және орын
- Кейіпкер: Қар-Адам
- Өткізілетін орын: балабақша ауласы
Мотивациялық-қозғаушылық кезең
Тәрбиеші:
— Сәлеметсіңдер ме, балалар!
— «Амандасу» дегеніміз не?
— «Аман-саулық» немесе «денсаулық» деген не?
— Бүгін сендерді шынығып, шымыр болып, аязға қарсы тұру үшін батырлар мен батылдардың еліне саяхатқа шақырамын.
— Аяздан қорықпай, қызықты саяхатқа аттануға дайынсыңдар ма?
— Ендеше, сиқырлы пойызға отырып, саяхатымызды бастайық!
1-аялдама
Жаттығу қаласы
Балалар аялдамада Қар-Адамды көреді.
Ұйымдастырушылық-ізденістік бөлім
Қар-Адаммен танысу
Қар-Адам: — Амансыңдар ма, балалар! Денсаулық мықты, бой шымыр болу үшін әр күнді неден бастау керек?
Балалардың жауаптары (өлең жолдары)
Әдемі: Таңертеңгі жаттығуды орындаймыз күнде біз.
Кәусар: Нығайтамыз денсаулықты, болу үшін бізде күш.
Нұрағат: Қыстың суық күндерінен, аяз соққан желдерінен қорықпайды бүлдіршіндер, шұғылданған спортпенен!
Музыка сүйемелдеуімен балалар көңілді жаттығулар орындайды.
1-жаттығу: «Қарлы мүсіндер»
- Аяқтарыңды топылдат!
- Қолыңды соқ — шапалақ!
- Бастарыңды шайқалтып,
- Қолдарыңды аспанға соз.
- Отыр, тізеңді бүк,
- Қайта түзеліп секір.
- Шеңбер бойымен жүгір!
Үшке дейін санаймыз, қарлы мүсін жасаймыз: бір, екі, үш!
2-жаттығу: «Спортшы қоян»
Құлақтарын шошайтып, отыр аппақ қояным.
Басын бұрып жан-жаққа, қайта-қайта қарайды.
Тоңып қалды қояным — жылдам ойын ойнайық!
- Соқ-соқ, шапалақты соқ!
- Топ-топ, аяғыңды соқ!
- Секек-секек қозғалып, шеңберде жүгір айналып!
Қар-Адам: — Жарайсыңдар! Мені де өздеріңмен бірге саяхатқа алыңдаршы!
2-аялдама: Спорттық қала
Қар-Адам: — Спорттық қалада жарыстар өтеді. Сендер жарысқа дайынсыңдар ма?
— Менің жолдастарым аю мен қоян бір-бірімен жарысқанды ұнатады.
Эстафета
«Аңдар жарысы»
— Саяхатымызды жалғастыру үшін сиқырлы пойызға отырыңдар.
3-аялдама: Ойын қаласы
Балалар бір тізбекке тұрып, жүріп келеді.
Қар-Адам: — Мен сендерге бірнеше жұмбақ жасырамын. Шешуін тапсаңдар, қызықты ойын ойнаймыз.
Жұмбақтар
-
Шанамен сырғанап келемін,
Шаңғы, коньки тебемін,
Аққала жасап ойнаймын.
Қай мезгіл деп ойлайсың? -
Шелек қалпақ басында,
Сәбіз екен танауы.
Қыста қардан тұрады,
Танып көрші сен оны. -
Мамықтай ұлпа,
Қанттай ақ.
Қыста жер бетін басады,
Жазда сайға қашады.
Ойын: «Қар қиыршықтары»
Шарты: Екі топ екі жаққа бөлінеді. Әр бала алдарындағы қар қиыршықтарын бір-бірден алып, межелі жерге тасиды. Қай топ көбірек жинаса — сол жеңімпаз.
Ойын: «Кім тапқыр?»
Шарты: Екі топтың алдында шырша тұрады. Бала қоянша секіріп барып, сәбізді шыршаның артына тығады. Келесі бала барып, тығылған сәбізді тауып әкелуі керек.
— Сиқырлы пойызға отырып, келесі аялдамаға аттанайық!
4-аялдама: Музыка қаласы
Қар-Адам:
- Қазір жылдың қай мезгілі?
- Далада жерде не жатыр?
Музыка қаласында ән айтылады, би биленеді. Мен сендерді би билеуге шақырамын.
Би: «Қар жапалақтары»
Балалар музыка ырғағымен «қар жапалақтары» биін орындайды.
Қорытынды
Келесі аялдама — «Балапан» балабақшасы. Бұл жерде саяхат аяқталып, Қар-Адам әрі қарай суық жаққа сапарын жалғастырады.
Өңір
Қызылорда облысы
Қазалы ауданы, Әйтеке би кенті
Мекеме
№11 «Балапан» бөбекжай-балабақшасы
Тәрбиеші
Исаева Кигаш Нагашыбаевна