Қазақша рефераттар

Тәуелсіздік шежіресіне көз тоқтатып қарайықшы

Сабақтың тақырыбы

Туым – намыс, ұраным – бірлік, рәміздерім – мақтанышым

Сабақтың мақсаты

  • Оқушыларды Отанды сүюге, мемлекеттік рәміздерді қастерлеуге тәрбиелеу, туған жерге сүйіспеншілігін ояту.
  • Елін, жерін, тілін, тарихын құрметтейтін, жаны таза, адамгершілігі мол азамат қалыптастыру.
  • Желтоқсан оқиғасы негізінде патриоттық тәрбие беру.
  • Тәуелсіздік жылдарындағы жетістіктермен таныстырып, білім көкжиегін кеңейту.

Көрнекіліктер

  • Компьютерлік слайдтар
  • Мемлекеттік рәміздер
  • Елбасының суреттері
  • Қосымша материалдар

Қатысушылар

Жүргізушілер: Нұржан, Жансая
Сынып: №46 А.С. Пушкин атындағы мектеп-лицейі, 5 «В»

Кіріспе: Тәуелсіздікке тағзым

Жүргізушілердің сөзі

Нұржан: Тәуелсіздік күніне арналған тәрбие сағатымызды бастаймыз.

Жансая: Алдымен амандасайық. Сәлеметсіздер ме, құрметті ата-аналар, оқушылар, ұстаздар!

Нұржан: Бүгін Қазақстан Республикасының Тәуелсіздік күніне орай «Туым – намыс, ұраным – бірлік, рәміздерім – мақтанышым» атты тәрбие сағатына қош келдіңіздер!

Жансая: Азаттық, теңдік, тәуелсіздік. Осы ұғымдардың салтанат құруы үшін қаншама жан құрбан болды.

Тәуелсіздік шежіресінен

  • Ел мен жер үшін өткен батырлар дәуірі: найзаның ұшымен, қылыштың жүзімен сақталған аманат.
  • Қуғын-сүргін жылдарындағы «ақтаңдақ» кезең: ұлт үшін жанын қиған қайраткерлер.
  • Ұлы Отан соғысы жылдары: ел намысын қорғаған ерлік дәстүрі.
  • 1986 жылғы 16 желтоқсан: Желтоқсан оқиғасы — тәуелсіздіктің оянған үні.

«ТӘУЕЛСІЗДІК» сөзінің мәні

Т

Теңдікті білдіреді.

Ә

Әдептілік пен әлдікті меңзейді.

У

Уайымсыздық пен уақыттың қадірін ұқтырады.

Е

Егемендік пен елдікті танытады.

Л

Лақапқа ермей, лепірмей, ізгі жолды ұстануға шақырады.

С

Сенімділікке баулиды.

І

Ілтипат пен ізетті дәріптейді.

З

Зиялылық пен ізгі тілекті алға қояды.

Д

Достыққа шақырады.

І

Ізгілікті ниетті бекемдейді.

К

Күндей жарқырап, көктегі биіктікте болуға үндейді; көршіге қол сұқпауға үйретеді.

Мұғалімнің сөзі: Тарихтан тағылым

Қазақ елінің жүріп өткен жолы — алмағайып та айбынды тарих. Ел басына күн туған шақта да, береке қонған бейбіт заманда да халқымыз өз болмысын жоғалтпай, рухын сақтап қалды. Ұлы Абай «Қайран елім, қазағым, қайран жұртым» деп күйзелсе, Жұбан Молдағалиев «Мен қазақпын — мың өліп, мың тірілген» деп ұлттың қайсарлығын жырға қосты.

Ұлан-байтақ даламызға көз салушылар көп болды. Жоңғар шапқыншылығы, «Ақтабан шұбырынды» зұлматы, кейінгі ғасырлардағы бодандық қамыты — бәрі де елдің жүрегіне жара салды. ХХ ғасырдағы лениндік саясаттың салмағы, сталиндік қуғын-сүргін, тоқырау кезеңінің тұманы, қайта құрудың ауыр өткелі — мұның бәрінен халқымыз қажымай өтті.

Егемендік сағаты соғып, Тәуелсіздіктің нұрлы таңы атты. Қазақстанның тәуелсіз мемлекет құру жолындағы маңызды белесінің бірі — Қазақстан Республикасының мемлекеттік егемендігі туралы Декларацияны қабылдау. Ал 1991 жылғы 16 желтоқсанда «Қазақстан Республикасының Мемлекеттік тәуелсіздігі туралы» Заң қабылданып, тәуелсіздік толық рәсімделді.

Тәуелсіздіктің қасиетті нышандары — аспан түстес көк Ту, айшықты Елтаңба, асқақ Әнұран. «Жері бардың — елі бар; елі бардың — ері бар». Ерлердің арқасында Қазақстан бүгін егемен ел болды.

120-дан аса ұлт өкілі тату-тәтті өмір сүретін ортақ шаңырақта әр азамат өз Отанын жанындай сүйіп, көк байрағымыздың көкте желбіреуін мақтаныш тұтады.

Отан туралы оқушылардың жыр-шумақтары

Өлең жолдары

Отан — тарих, Отан — тіл,
Жасаған елің, өз халқың.
Отан — өлең, Отан — жыр,
Көтер көкке ел даңқын.

Отан — осы, достарым,
Көңілге мұны түйе біл.
Отан деп өскен жас ұлан,
Оны ардақтап сүйе біл.

Отан — сенің ата-анаң,
Отан — досың, бауырың.
Отан — аудан, ауылың,
Отан — өлкең, астанаң.

Отан дейміз от жаққан жерімізді,
Жасыл жайлау, жаңа жолдар, жас қаланы.
Отанның шеті де жоқ, шегі де жоқ,
Ол бірақ өз үйімнен басталады.

Отанға арналған ант-лебіз

Мен оның түнін сүйем, күнін сүйем,
Ағынды өзен, асқар тау, гүлін сүйем.
Мен оның қасиетті тілін сүйем,
Мен оның құдіретті үнін сүйем.

Бар жәндігін сүйемін қыбырлаған,
Бәрі маған «Отан!» деп сыбырлаған.
Жаным менің, кеудемді жарып шық та,
Бозторғайы бол оның шырылдаған!

Отан! Отан! Бәрінен де биік екен,
Мен оны мәңгілікке сүйіп өтем.

Музыкалық үзіліс

«Туған жер» әні

Мемлекеттік рәміздер: мәні мен мағынасы

Мемлекеттік Ту

Қазақстан Республикасының мемлекеттік Туы — негізгі рәміздердің бірі. Ту көгілдір түсті тікбұрышты мата: ортасында арайлы күн, күннің астында қалықтаған қыран, сабы жағында ұлттық өрнек орналасқан. Күн, қыран және өрнек — алтын түсті. Тудың ені ұзындығының жартысына тең. Автор — Шәкен Ниязбеков.

  • Көгілдір түс — ашық аспан, бейбітшілік, бірлік пен адалдықтың нышаны.
  • Алтын күн — тыныштық пен береке, даму мен өмірдің белгісі.
  • Қыран — еркіндік сүйгіш рух, кеңдік пен асқақ мұраттың бейнесі.

Мемлекеттік Елтаңба

Елтаңба — Қазақстан Республикасының негізгі мемлекеттік рәміздерінің бірі. Рәміздік тұрғыдан елтаңбаның жүрегі — шаңырақ. Ол — ортақ үй, отбасы, бірлік ұғымын білдіреді. Қанатты тұлпарлар — еркіндікке ұмтылыс, жеңіске деген жігер мен рухтың символы. Жоғарыдағы бес бұрышты жұлдыз — бағдар, биік арман, жарқын болашаққа жол.

Авторлары — Ж. Мәлібеков пен Ш. Уәлиханов.

Мемлекеттік Әнұран

«Гимн» сөзі «ұран салу» ұғымын білдіреді. Әнұран — елдің бірлігі мен рухының айнасы, жүректі көтеретін ортақ үн. «Менің Қазақстаным» Әнұранының әуені — Ш. Қалдаяқов, сөзін жазуға үлес қосқан авторлар — Ж. Нәжімеденов және Н. Назарбаев.

Хор

«Менің Қазақстаным!» (Әнұран)

Тарихи ескертпе

Ту бейбіт кезде құрметпен сақталып, ал жаугершілік шақта ғана көтерілген. Тудан айырылу — елдік үшін өліммен тең саналған. Қиын кезеңде үш бидің ақылдасуынан соң Абылай хан үш жүздің басын қосып, Бөгенбай батырға қазақ туын ұстатқан деген дерек бар.

Тәуелсіздік туралы жыр және ой

Оқушылардың өлеңдері

Мерейім — нұрлана бер, азат күнім,
Көрейін бақытымның азаттығын.
Тауымды тамылжытқан бостандықтан
Танылды бар әлемге қазақ бүгін.
Құттысың, тәуелсіздік — киелі күн!

Кең далам, көл-дариям, сеңгір тауым,
Бабалар жеңді ерлікпен небір жауын.
Байрағым желбіреп тұр биіктерде,
Байладым тәуелсіздік — өмір бауын!

Елбасы сөзінен үзінді

«Уақыт қарқыны зымыран. Күні кеше өткен сияқты уақиғалар бүгінде тарих беттеріне айналып та үлгерді. Бұл — жаңа мемлекет пен жаңа қоғамның дүниеге келуінің азапты толғаққа толы, сонымен бірге ғаламат сәті еді. Сол сәт әлі аяқталған жоқ, бірақ ең қиын белестерден аса білдік. Ең қиын жылдар дәл қазір артымызда қалды, сондықтан да мен еліміздің еңсесі биіктей беретініне сенемін».

— Н.Ә. Назарбаев

Музыкалық үзіліс

«Елім менің» әні

Түйін сөз

Ендігі жеңіс те, ерлік те — білім мен бірлікте. Егемен Қазақстанды көркейтетін, шаңырағын биіктететін, абыройын асыратын — өз бақытының иесі болуға ұмтылған жас ұрпақ. XXI ғасырда қазақтың қасіреті аз болып, қуанышы көп болсын; елдің арманы мен мүддесі баянды болсын.

Қорытынды: Аманат пен жауапкершілік

Мұғалімнің қорытынды сөзі

Бүгін сіздер өздеріңіздің Тәуелсіз еліміздің болашағы екендеріңізді көрсете білдіңіздер. Жұбан Молдағалиев:

Өткеніңді еске алсаң — өскеніңнің белгісі,
Өткеніңді ұмытсаң — өшкеніңнің белгісі.

Сондықтан халқымыздың жеткен жетістіктері — сіздерге аманат. Еліміздің егемендігін танытатын ресми нышандарды бойтұмардай сақтап, жеріміздің еркіндігін қорғайтын мықты ұрпақ боларыңызға сенім мол.

Есте сақтайтын құндылықтар

  • Ана тілі — ұлттық рухтың өзегі.
  • Ту, Елтаңба, Әнұран — елдіктің айқын нышандары.
  • Ата Заң — тәуелсіздіктің берік тұғыры.
  • Бірлік пен еңбек — жарқын болашақтың кепілі.

Тілек

Жолдарыңыз ашық, жарқын болсын — Тәуелсіз елдің азаматтары!

Қазақстан — Туымен тұғырлы, Елтаңбасымен еңселі, Әнұранмен айбатты.