Биік өкшелі немесе табаны тегіс аяқ киім кию зиян

Буын ауруы
Буын ауруының пайда болу себебі әртүрлі. Көп жағдайда адамның аз қимылдауы, суық тию, экология, кальцийдің жетіспеуінен туындайды. Адам 25 жасқа дейін - ақ кальцийді өз ағзасынан шығара алады. Ал 25 жастан кейін міндетті түрде ағзаның кальций қорын толықтырып отыру керек. Мұндайда сүт, сүт өнімдерін мол пайдаланудың маңызы зор. Бұл ауру асқынып кетсе өмір сапасын нашарлатады. Тіпті мүгедектікке де алып келуі ықтимал. Сондықтан әр азамат өз денсаулығына аса үлкен жауапкершілікпен қарауы керек.

Буын ауырмас үшін не істеу керек?
Буын ауруынан құлан - таза айығып кету қиын. Бірақ сырқатқа шалдыққан адамдар мүмкіндігі келгенше 5 келіден артық салмақты зат көтермеуі керек. Затты екі қолына тең салмақта ұстағаны жөн. Биік өкшелі немесе табаны тегіс аяқ киім кию зиян. Аяқкиім өкшесінің биіктігі 3 - 4 сантиметрден аспағаны дұрыс. Тоқтамай ұзақ жүру, денедегі артық салмақ та буынға зиянын тигізеді. Дұрыс тамақтану маңызды. Тәтті бұрыш, сарымсақ пен пияз, саумалдық (шпинат) пен ақжелек (петрушка) секілді көкөніс түрлері буынға өте пайдалы.
Ауырып тұрған буындарды қыздыруға болмайды. Егер буын қабынып тұрған болса, кері әсерін тигізуі мүмкін. Сондай - ақ ыстық күнде аяқ шаршап ауырса, мұздай компресс жасаған дұрыс. Ал буын ауруының алдын алу үшін салауатты өмір салтын ұстану керек. Дене жаттығуларын жасап, құрамында дәрумендері мол табиғи тағамдарды пайдаланған дұрыс.

Мойын омыртқа буындары үшін жаттығу:

1 - жаттығу. Қолыңызды мықыныңызға қойып, кеудеңізді тік ұстап,- екі иықты шалқайтыңыз. Басыңызды еңкейтіп, иегіңізді төске таяңыз да дем шығарыңыз. Басыңызды мүмкіндігінше кейін шалқайтып, дем алыңыз. Мұны 6 — 10 ретке дейін қайталаңыз.
2 - жаттығу. Басты оңға, солға бұрғанда иек иыққа тиетін болсын, сонда деміңіз еркінше алынады. Мұны да екі жаққа 6 — 10 рет қайталаңыз.
3 - жаттығу. Құлақ иыққа тиетін етіп басты алма кезек оңға, солға бұрыңыз, (бірақ иықты қозғалтпаңыз). Мұны да 6 — 10 рет қайталаңыз.
Кеуде және бел омыртқалары үшін жаттығу:
1 - жаттығу. Екі аяқтың арасын екі иықтың тұсына келтіріп ашыңыз. Қолдарыңызды мүмкіндігінше жоғары көгеріп, шалқайтып барып беліңізді қайқайтыңыз. Енді еңкейіңіз, қолыңызды алға созып, тізені бүкпей, саусақтарыңызды жерге тигізуге тырысыңыз, дем шығарасыз. Жайлап тік тұрыңыз, дем алыңыз. Осылайша 6 — 10 рет қайталайсыз.
2 - жаттығу. Екі аяқтың арасын алшайта ашып тұрыңыз. Қолыңызды мықынға қойып, (желкеге немесе жоғары көтеріп ұстаңыз) шамаңыз жеткенше оңға қисайыңыз, дем алыңыз. Енді тұрыңыз, дем шығарыңыз. Солға қисайып, дем алыңыз, тік тұрып дем шығарыңыз. Мұны да 6 — 10 рет қайталайсыз.
3 - жаттығу. Шалқаңыздан жатып, алақаныңызды төмен жайып, қолыңызды екі жаққа созыңыз. Тізені бүгіп, төске жеткізіңіз. Бүгулі аяғыңызды оңға қисайтып, еденге жеткізіңіз, бірақ екі жауырынды еденнен көтермеуге тырысыңыз, әуелгі қалпыңызға келіңіз. Енді жаттығуды сол жаққа бұрып жасаңыз. Дем алу еркінше. Осыны 4 рет қайталаңыз.
4 - жаттығу. Шалқаңыздан жатыңыз, қолыңыз екі жағыңызда болсын, алақаныңыз төмен қарасын. Бас пен мойын астына жастық қойыңыз. Әуелі екі аяғыңызды, одан кейін бөксеңізді беліңізге дейін көтеріп, аяғыңызды басыңыздан асырып, башайларыңызды еденге тигізуге тырысыңыз. Аздап кідіріңіз. Енді әуелгі қалыпқа келіңіз. Осыны 4 — 10 рет қайталаңыз. Әрбір істегеннен кейін кідіріс — үзіліс уақытын соза түсіңіз. Дем алу еркінше.