Қазақша рефераттар

Дауысты дыбыстарды жазып шық

Сабақ туралы мәлімет

Білім беру ұйымы
Оңтүстік Қазақстан облысы, Арыс ауданы, М. Шаханов атындағы жалпы орта мектебі
Пән мұғалімі
Қазақ тілі мен әдебиеті пәнінің мұғалімі — Полатова Айнұр Мүслімбекқызы
Сабақтың тақырыбы
Жаттығумен жұмыс
Сабақтың типі
Қайталау
Сабақтың түрі
Дәстүрлі
Әдіс-тәсілдер
Сұрақ-жауап, талдау
Көрнекілік
Деңгейлік тапсырмалар
Пәнаралық байланыс
Қазақ әдебиеті

Сабақтың мақсаты

  • Білімділік: дауысты дыбыстар бойынша алған білімдерін қорыту.
  • Тәрбиелік: оқушыларды адамгершілікке, ізгілікке тәрбиелеу.
  • Дамытушылық: кешенді талдау жасау дағдыларын дамыту, пәнге қызығушылықты арттыру.

Сабақтың барысы

I. Ұйымдастыру кезеңі

  1. 1 Оқушылармен сәлемдесу.
  2. 2 Оқушылардың сабаққа қатысуын тексеру.
  3. 3 Оқушылардың зейінін сабаққа шоғырландыру.

II. Деңгейлік тапсырмалармен жұмыс

Тақырып: Дауысты дыбыстар

1-нұсқа

Тапсырмалар

I деңгей

  1. Дауысты дыбыстар қалай жасалады?
  2. Дауысты дыбыстарды жазып шық.
  3. Мәтіндегі дауысты дыбыстардың астын сыз:
    Ұзақ жолды қысқарту үшін, айдалада жортқан Ақан Мөңкеге неше түрлі қызықты ертегі, дастандар айтып, ара-тұра ән салып, кішіпейіл ақын баламен тең құрбысындай сыр шерткен. Ақтоқты, Ұрқия, Жамалдардың қайғысын айтып, ара-тұра күрсініп, жапанның сары даласында ұзақ мұңды күйге түскен.
    С. Жүнісов

II деңгей

  1. Мәтіндегі жуан дауыстылардың астын бір, жіңішке дауыстылардың астын екі сызықпен сыз:
    Ағайдың биыл отыз жеті мүшеліне толып, кемеліне келген кезі. Алтын зерлі айыр қалпақ пен екі өңіріне, жаға-жеңіне зер тұтқан жібек шапан тал бойына құп жарасып, тақ үстінде айбындап отыр.
    Қ. Жұмаділов
  2. Мақал-мәтелдер жазып, мағынасын түсіндір; ашық және қысаң дауыстыларды көрсет.
  3. Мәтінде не туралы айтылған? Өз ойыңды жалғастырып жаз:
    Туған жердің қадірін туғалы түзге шықпаған кісі қайдан білсін? Туған жердің қадірін алыс жерге ұзатқан, ұзатқанына әлде талай жыл өткен қыз білмесе, кім білсін?

III деңгей

  1. Екі шумақ өлең жазып, ішіндегі еріндік дауыстылардың астын бір, езулік дауыстылардың астын екі сызықпен сыз.
  2. Дауысты дыбыстарға жұмбақ құрастыр:

    Үлгі: Көкте бар, жерде жоқ. Көзде бар, қолда жоқ. (Ө)

  3. «Жеті жарғы» ережелері туралы не білесіңдер?

2-нұсқа

Тапсырмалар

I деңгей

  1. Дауысты дыбыстар деген не?
  2. Жуан және жіңішке дауыстыларды жаз.
  3. Мәтіндегі сөздерді жақтың қатысына, сондай-ақ ерін мен езудің қатысына қарай топтастыр:
    Ісіңізге, еңбегіңізге, оқуыңызға нағыз адамгершілікпен кіріссең, сөз жоқ жеңіске жетесіздер. Сіздің мінез-қасиетіңізде адамгершілік бірінші орын алса, шыншыл, батыл, тиянақты, жігерлі әрі кішіпейіл адам болар едіңіз.
    Қ. Сәтбаев

II деңгей

  1. Ашық, қысаң, езулік, еріндік дауыстыларды жазып шық.
  2. (У) дыбысының ерекшелігін түсіндіріп, мысал келтір.
  3. Төмендегі кейіпкерлер қай шығармадан? Сол шығарма туралы білгеніңді жаз:

    Ұлжан, Зере, Барлас, Байкөкше.

III деңгей

  1. Дауысты дыбыстардың басты ерекшелігін түсіндіріп, мысалмен дәлелде.
  2. Тіл туралы айтылған ұлағатты ойларды жаз және сол сөздердегі дыбыстарды дауысты дыбыстардың түрлеріне қарай топтастыр:

    Үлгі: «Тіл жоқ жерде — ұлт жоқ» (Ш. Айтматов)

    Жуан

    о, ұ

    Жіңішке

    і, е

    Ашық

    о, е

    Қысаң

    і, ұ

    Езулік

    і, е

    Еріндік

    ұ, о

Үй тапсырмасы

1) Өлеңнің авторы кім?

«Отырардың күйреуі» тақырыбында әңгіме жаз.

Алты ай бойы ерлік салтқа орын берген Отырар,
Алты ай бойы алапатта жеңілмеген Отырар —
Алты-ақ күнде жермен-жексен қирады.
Ақыл-ойын жалындатқан,
Өнер, ғылым шамын жаққан
Ұлы қала Азияның маңдайына сыймады.

2) Фонетикадан өткенді қайталау.

Бағалау

Оқушылардың жауаптары мен тапсырмаларды орындау сапасына қарай бағалау жүргізіледі.