Түсті ажырату
Сабақтың тақырыбы
8 саны мен цифры
Сабақтың мақсаты
- 8 санымен таныстыру; 1-ден 8-ге дейін ауызша санауды және есептеуді меңгерту.
- Сандарды тура және кері санауға үйрету; артық, кем, тең ұғымдарын және белгілерін қолдандыру.
- Ойын тәсілдері арқылы баланың ой-өрісін, логикалық ойлауын және математикалық тілін дамыту.
- Еңбекке, ұқыптылыққа, сауатты және әдемі жазуға баулу.
Сабақтың түрі
«Ормандағы түлкі» желісіндегі сабақ.
Әдіс-тәсілдер
Түсіндіру, таныстыру, сұрақ-жауап, ойын, әңгімелеу.
Көрнекіліктер
- 1-ден 8-ге дейінгі тапсырмалар.
- Түсті ажырату ойыны.
- «Ормандағы түлкі»: 7 санының құрамы, 8 саны және салыстыру.
- Қораптағы 8 таяқшаны құрастыру.
- 1-ден 8-ге дейінгі «көңілді сандар» материалдары.
- №1 жұмыс дәптері.
Пәнаралық байланыс
Сабақтың жүру барысы
1) Ұйымдастыру кезеңі
Психологиялық дайындық: жылы лебіздер айту.
Балалар:
Амандасу — үлкенге,
Тәрбиенің басы ғой.
Ал кәнеки бәріміз,
«Сәлем» дейік үлкенге.
Сәлеметсіздер ме, қонақтар!
2) Өтілген сабақты тиянақтау
Алдыңғы тақырып бойынша сұрақ-жауап арқылы қайталау жүргізіледі.
3) Жаңа сабақ
Жетекші: Балалар, қазір жылдың қай мезгілі?
Балалар: Көктем.
Жетекші: Көктем айларында неше ай бар?
Балалар: 3 ай — наурыз, сәуір, мамыр.
Жетекші балаларға көзді жұмып, «Ормандағы түлкіні» елестетуді ұсынады. Сол сәтте топқа түлкі келеді.
Түлкі: Сәлеметсіздер ме, апайлар! Сәлеметсіздер ме, балалар! Мен орманнан келдім. Сендердің сандарыңды сиқырлап қойдым.
Егер менің тапсырмаларымды дұрыс орындасаңдар, сандар үйлеріне қайтады.
Жетекші: Балалар, сандарға көмектесеміз бе?
1-тапсырма: Ауызша жұмбақ есептер
Бестен төртті алайық,
Қанша қалды қарайық.
Қарайық та санайық,
Санайық та табайық.
Баспайда бар бес іні,
Естайда бар екі іні.
Қоссақ бес пен екіні,
Қанша болар шешуі?
2-тапсырма: Түсті ажырату
Балалар тақтадағы ағаш, қызғалдақ және сәбіз суреттері бойынша түстерді ажыратып, сәйкес бөліктерін жапсырады: ағаштың жасыл жапырағы, қызғалдақтың гүлі. Бұл құбылыстардың бәрі көктем мезгілінде болатыны түсіндіріледі.
Көктем туралы тақпақ:
Көктем нұрын төккен,
Жер жылып кеткен.
Тал бүршік сепкен,
Көңілді көктем.
Жібектей леппен,
Алмадай бетпен,
Біздерді өпкен —
Көңілді көктем.
3-тапсырма: 7 санының құрамы
Дидактикалық ойын: «Саңырауқұлақ теру».
Анар орманға саңырауқұлақ теруге барады. Анасы оған 7 саңырауқұлақ әкелуді тапсырды.
Анар 3 саңырауқұлақ жинады. Енді тағы неше саңырауқұлақ жинауы керек?
3 + 4 = 7
Жетекші: Балалар, біз өткен сабақтағы 7 санын қайталадық. Бүгінгі жаңа сабақта 8 санымен танысамыз.
Санау дағдысы
1-ден 8-ге дейін тура санау және 8-ден 1-ге дейін кері санау (тақтада көрсету).
Жазу дағдысы
8 санын ауада жазып көрсету және дәптерде бекіту.