Сен сүйкімдісің
Сабақтың тақырыбы
Отбасым – бақыт мекені
Мақсаты
Отбасындағы сүйіспеншілік пен сыйластық құндылықтары туралы түсінікті кеңейту.
Әдіс-тәсілдер
Түсіндіру, сұрақ-жауап, дидактикалық ойындар.
Көрнекіліктер
- Отбасы мүшелерінің суреттері
- Мақал-мәтелдер
- «Біздің отбасы» тақырыбындағы мазмұнды суреттер
- Нақыл сөздер
Сабақтың барысы
1) «Шаттық шеңбері»
Тәрбиеші балаларды шаттық шеңберіне шақырып, бір-біріне жылы тілек айтуға бағыттайды. Балалар бір-біріне жақсы сөздер айтып амандасады:
- Сен қайырымдысың.
- Сен ақылдысың.
- Сен сүйкімдісің.
- Сен мейірімдісің.
Кейін тәрбиеші ата-аналарды да шаттық шеңберіне шақырып, ортақ тілектер айтады:
- Аспанымыз ашық болсын.
- Деніміз сау болсын.
- Әр таңымыз арайлы болсын.
2) Отбасы туралы әңгіме және сұрақ-жауап
Тәрбиеші бүгінгі әңгіме өзек болатын тақырыпты айқындайды: әркімнің өз отбасы бар, ал отбасы — адам өміріндегі ең қымбат орта.
Талқылауға арналған сұрақтар
- Отбасы мүшелеріне кімдер жатады?
- Отбасымыздағы басшы кім? (әке)
- Жер бетіндегі ең әдемі, ең ақылды әрі ең қымбат адам кім? (ана)
- Ата мен әжеге сендер кім болып келесіңдер? (немере)
- Отбасындағы адамдар бір-біріне қандай болуы керек? (адал, мейірімді, қайырымды)
Негізгі ой
Отбасы — сыйластық пен сүйіспеншілік орны. Бір-біріне мейірім таныту, қолдау көрсету және қамқор болу — отбасылық қарым-қатынастың тірегі.
3) Көрініс: «Әжесін қайсысы жақсы көреді?»
Тәрбиеші балаларды шағын көріністі тамашалауға шақырады. Көрініс арқылы үлкенге құрмет, мейірім мен ықылас тақырыбы тереңдетіледі.
4) «Еркелету сөздері» — жылы қарым-қатынас мәдениеті
Тәрбиеші ата-әже, әке-шеше баланы еркелетіп «айым», «күнім», «жұлдызым» секілді жылы сөздер айтатынын еске салады. Осыдан кейін ата-аналар өз баласын қалай еркелететінін айтып береді.
Отбасылық ән
«Ертегілер елінде»
5) Ойын: «Көзі байлаулы ата-ана өз баласын табады»
Тәрбиеші ата-аналармен бірге ойын ұйымдастырады. Ойынның шарты: ортаға 7–8 бала шығады; 1–2 ата-ана көздері байлаулы күйде балалардың ішінен өз баласын табады. Содан кейін баласын қандай ерекшеліктері арқылы танығанын ауызша айтып береді.
6) «Мен отбасымды жақсы көремін…» — жүректен шыққан сөз
Тәрбиеші әр отбасы мүшелері бір-бірін жақсы көріп, сыйлайтынын атап өтеді. Осы тұста балалар өз отбасындағы ең жақсы көретін адамға деген сүйіспеншілігін айтып береді. Әр бала сөзін мына үлгіде бастайды:
«Мен отбасымды жақсы көремін…»
7) «Күн шуағы» — жақсы қасиеттерді бекіту
«Күннен жылу тарайды, анадан мейірім тарайды» деген сөздің мәні түсіндіріледі. Ата-аналар балаларындағы жақсы қасиеттерді бір ауыз сөзбен «күн шуағына» жазып, күн бейнесіне жапсырады.
Отбасылық ән
«Айгөлек»
Тәрбиеші күн шуағындағы сөздер арқылы балалардың бойындағы жақсы қасиеттерді ата-аналары жеткізгенін қорытындылайды.
8) Қорытынды ой
Бүгін балалар өздеріне ең жақын жандар — аяулы ана, қамқор әке, мейірімді ата-әже, сүйікті аға-әпке мен іні-қарындас туралы әңгімелесті. Отбасын жақсы көруді, сыйлауды және бір-біріне құрмет көрсетуді үйренді.
Отбасы — қуаныш пен шаттықтың, мейірім мен қамқорлықтың, сүйіспеншілік пен сенімнің ортасы.
Ата-ана баласының нағыз адам болып өскенін қалайды. Сондықтан біз де бізді жақсы көретін жандардың сенімі мен еңбегін ақтауға тырысайық. Отбасы мүшелерін әрдайым сыйлап, құрметтеуді ұмытпайық.
9) Жылы тілек арқылы байланыс орнату
Балалар әрқайсысы бір суреттен алып, ата-анасына апарып береді. Ата-аналар суретке сүйене отырып, баласына жылы сөздерін айтады:
- Күндей жылы бол!
- Алмадай тәтті бол!
- Айдай жарық бол!
- Жүзіктей әдемі бол!
10) Қоштасу шеңбері
Ортаға келіп тұрайық,
Шеңберді біз құрайық.
Көріскенше күн жақсы,
Сау-саламат болайық!
Тәрбиеші ата-аналарға алғыс айтып, «Отбасым – бақыт мекені» атты тәрбие сағатының аяқталғанын хабарлайды. Белсенді қатысқан ата-аналарды марапаттауға рұқсат сұрайды.