Мақала тақырыбы
Биология пәнін ағылшын тілінде оқытудың әдіс-тәсілдері
Үштілділік — бәсекеге қабілетті елдер қатарына жетелейтін басты баспалдақтардың бірі. Қазақстан бүкіл әлемге халқы үш тілді пайдаланатын мәдениетті ел ретінде танылуға тиіс.
Үштілділіктің маңызын терең түсінген адамның еліміз үшін болашақта алары да, берері де мол. «Біз ағылшын тілін игеруде серпіліс жасауымыз керек. Қазіргі әлемнің осы lingua franca-сын меңгеру біздің еліміздің әрбір азаматына өмірде шексіз жаңа мүмкіндіктер ашады», — деген пікір бұл бағыттың өзектілігін айқындайды.
Осы мүмкіндіктерді тиімді іске асыру мақсатында бүгінгі білім ордалары үштілділікті енгізудің және оны нәтижелі жүргізудің тың жолдарын іздестіруде. Тәжірибеміз көрсеткендей, сабақ үдерісінде оқушылардың интеллектуалдық қабілетін ынталандыратын ойын технологияларын қолдану және сабақты үш тілде ұйымдастыру айтарлықтай тиімді нәтиже береді.
Нәтиже беретін іскерлік ойындар
Төмендегі форматтағы ойындар оқушылардың тілдік қорын кеңейтіп, биологиялық ұғымдарды үш тілде түсіндіру дағдысын дамытуға көмектеседі:
-
«Полиглот»
Терминдер мен негізгі анықтамаларды қазақ, орыс және ағылшын тілдерінде сәйкестендіру арқылы жылдам ойлау мен есте сақтауды күшейтеді.
-
«Кім тапқыр?»
Сұрақ-жауап және жағдаяттық тапсырмалар арқылы пәндік білім мен тілдік дағдыны қатар дамытады.
-
«Кел, сайысайық!»
Топтық жарыс форматы арқылы коммуникацияны жандандырып, терминдерді дұрыс қолдануға үйретеді.
Мұндай ойындардың үштілділікті меңгертудегі маңызы ерекше: оқушы пән мазмұнын түсініп қана қоймай, оны үш тілде жеткізуге дағдыланады.