Сендердің көршілерің қандай ұлттың азаматы
Тату доспыз бәріміз
Бұл сабақтың негізгі мақсаты — балаларды достыққа, татулыққа, бауырмашыл болуға тәрбиелеу, бір-біріне құрметпен қарап, ортақ ортада келісіммен өмір сүру құндылықтарын нығайту.
Көрнекіліктер
- Сурет үлгілері
- Мақал-мәтелдер
- Бейнетаспа
Әдіс-тәсілдер
- Сұрақ-жауап
- Әңгімелеу, түсіндіру
Негізгі ой
Бірлік бар жерде — береке, татулық бар жерде — бақыт.
Сабақ барысы
Ұйымдастыру кезеңі
Мұғалім: «Сәлеметсіңдер ме, балалар?»
Оқушылар: «Сәлеметпіз.»
Бүгін көркем әдебиет сабағы өтеді. Оқушылар сабаққа қажетті құрал-жабдықтарын дайындап, ережеге сай отырады.
Психологиялық сәт
Қайырлы күн!
Әрқашан күн сөнбесін.
Күн нұрындай жылуын төге берсін.
Күндей жарық, көңілді күй кешейік.
Бәріміз тату дос болып өсейік.
Кіріспе әңгіме
«Алтау ала болса — ауыздағы кетеді,
Төртеу түгел болса — төбедегі келеді»
Бұл нақыл адамдар арасындағы берік бірлік, ынтымақ, сыйластық бір-біріне қамқорлық танытудан басталатынын білдіреді. Татулық пен өзара түсіністік — достық қарым-қатынастың негізі.
Қазақстан — көпұлтты мемлекет. Мұнда түрлі халықтар мен ұлт өкілдері бір шаңырақ астында өмір сүреді: олар — көрші, дос, бауыр, жолдас. Елімізде 1 мамыр — ынтымақтастық, достық және бейбітшілік мерекесі ретінде аталып өтеді.
Ынтымақ бар жерде — бақыт бар.
Әр ұлттың өз тілі — ана тілі. Адам өмірге келген күннен бастап анасының әлдиін, мейірімді үнін естіп, жақсы қасиеттерді бойына сіңіреді. Сол себепті анамыз сөйлеген тілді ана тілі деп атаймыз.
Сурет бойынша әңгіме құрастыру
Оқушылар сурет мазмұнына сүйеніп, достық пен татулық тақырыбында қысқа әңгіме құрастырады: ортақ ойын, бір-біріне көмектесу, құрмет көрсету, сыныптағы ынтымақ сияқты көріністерге назар аударады.
Өлең оқу
С. Оспанов — «Тілегіміз — бейбіт күн»
Тілегіміз — бейбіт күн.
Сары, ақпыз, қарамыз,
Бәріміз де баламыз.
Бір қалада тұрамыз,
Бір мектепке барамыз.
Ақ, қара деп бөлмейміз,
Бір жыл туған төлдейміз.
Туысқанбыз, татумыз,
Биіктерге өрлейміз.
Сұрақ-жауап
- Өлеңде не туралы айтылған?
- Сендер өзге ұлт балаларынымен бірге ойнайсыңдар ма?
- Бір қалада, бір көшеде бірге тұрып, үйлеріңе бірге қайтасыңдар ма?
- Көршілерің қандай ұлттың азаматтары?
- Қаламызда қандай ұлт өкілдері тұрады? Атап бере аласыңдар ма?
- Біздің басқа ұлттармен қарым-қатынасымыз қандай болуы керек?
- Мектебімізде қандай шет тілін меңгеріп жүрміз?
- Осы меңгеріп жүрген тілімізде өлең немесе тақпақ айтып бере аласыңдар ма?
Оқушылар ағылшын тілінде қысқа тақпақтар айтып береді. Сонымен қатар төмендегі ән мәтіні арқылы «дос-бауыр» ұғымы бекітіледі.
Сөзі: Ә. Дүйсенбаев · Әні: М. Әубәкіров
Жақсылыққа, бақытқа,
Талпынған әр уақытта.
Бала біткен — дос-бауыр,
Болмасын еш тосқауыл.
Ақпыз, қара, сарымыз,
Ағайынбыз бәріміз.
Қорытынды
Сабақ қорытындысында оқушылар татулықтың мәнін түсінеді: бір-бірін ұлтқа, түр-түске бөліп қарамай, ортақ мақсатқа бірге ұмтылу, сыйластық пен қамқорлық таныту — шынайы достықтың белгісі.