СЫРҒАЛЫМ қыздар клубының мүшелері

СЫРҒАЛЫМ қыздар клубының бағдарламасы

Бүгінгі күні отбасылық құндылықтар айтарлықтай өзгерістерге ұшырап, отбасы ішіндегі қарым-қатынастың әлсіреуі жиі байқалады. Осындай кезеңде қыздардың өз әйел табиғатына тән жақсы қасиеттерін сақтап, өз орнын табуына қолдау көрсету, сырласу, бағыт-бағдар беру аса маңызды.

Мақсаты

Мектептегі әрбір қыз баланы инабаттылықты сақтауға баулу, адамгершілік, имандылық және эстетикалық тәрбие беру.

Тәрбиенің мазмұны мен бағыттары

Қыз баланы тәрбиелеудің маңызы — оны қоршаған орта, әртүрлі жастағы және жыныстағы адамдар арасындағы өзара қатынас мәдениетімен тығыз байланысты. Сондықтан мінез-құлықты қалыптастыру жұмыстары нәзіктікке баулуды, отбасындағы орнын ұғындыруды, ептілік пен шеберлікті дамытуды, сондай-ақ сұлулық, махаббат, сыйластық сияқты құндылықтарды дұрыс түсіндіруді көздейді.

Психологиялық және гигиеналық ағарту

Жыныстық жетілу кезеңінде болатын физиологиялық және психоэмоционалдық өзгерістерді түсіндіру, өзін-өзі тану мен қауіпсіздік мәдениетін қалыптастыру.

Жылы қарым-қатынас дағдылары

Қамқорлық, ниет білдіру, жан жылулығы, жанашырлық сияқты сезімдерді дамытуға мүмкіндік беретін орта құру.

Ұлттық тәрбие және қолөнер

Ұлттық киім үлгілерін тану, шаш өру, тігін тігу секілді практикалық дағдыларды үйрету және ұлттық талғамды қалыптастыру.

Әдеп пен эстетика

Ізетті сөйлеу, өзін ұстау мәдениеті, сыртқы көрініс пен ішкі тәрбие үйлесімін ұғындыру.

Табысты тәрбиенің шарттары

Оқу-үйрену процесінің ерекшелігі мен күрделілігін ескере отырып, қыздар тәрбиесінің нәтижелі болуы үшін төмендегі қолайлы жағдайлар қарастырылады.

Мектепте жаймашуақ орта қалыптастыру.
Мұғалімдер мен сынып жетекшілері тарапынан құрмет пен сенім көрсету.
Әрбір оқушының мүддесіне көңіл бөлу, жеке ерекшелігін ескеру.
Өзіндік пікір айтуға қолдау көрсету және айналадағы адамдардың мүддесін ескеруді үйрету.
Мәселе шешу тәсілдерін көрсету (жеке үлгі, өмірлік жағдайларды талдау).

Мектепте қыз балалардың тәрбиесіне, заманауи әйел идеалын қалыптастыруға және мінез-құлық өлшемдерін нақты айқындауға ерекше мән берілуі тиіс.

Тәрбие — отбасы, мектеп және қоғамның ортақ ісі

Бала тәрбиесі — игілікті іс: берері де, сұрауы да, жемісі де мол. Халық даналығында «Ағаш түзу өсуі үшін оған көшет кезінде көмектеседі, ал үлкен ағаш болғанда түзету қиын» делінуі тегін емес.

Баланың бойына жастайынан ізгілік, мейірімділік, адамгершілік құндылықтарды сіңіруде отбасы мен педагогтардың рөлі шешуші. Бүгінгі ұл — ертеңгі әке, бүгінгі қыз — ертеңгі ана: бала үйдегі үлгіні көріп өседі.

Білім мен тәрбиедегі негізгі тұлға — ұстаз, ал оны жалғастырушы әрі демеуші — ата-ана және қоғам. Мектеп өмірі оқушыны әлеуметтендіруді мақсат еткендіктен, ол серіктестік педагогиканы талап етеді. Тәрбие үрдісі мектеп, ата-ана және қоғам бірлесе әрекет еткенде ғана нәтижелі болады.

Қыз тәрбиесіне ортақ жауапкершілік

«Қызға қырық үйден тыйым, қала берсе қара күңнен тыйым» деген мақал қыз тәрбиесіне тек ана ғана емес, бүкіл орта жауапты екенін меңзейді. Қыз баланы құрметтеу, дөрекі сөйлемеу, ізетті болу — халқымыздың игі дәстүрі.

Қазіргі заманда балаға ықпал ететін ақпарат көздері көбейді: радио, теледидар, баспасөз, кітап, кино, ойын-сауық орындары. Бұл ықпалдың жағымды жақтарымен қатар, кері әсері де болуы мүмкін. Сонымен бірге ата-аналардың жұмыспен көп айналысуы бала тәрбиесіне бөлінетін уақыттың азаюына әкеліп отыр. Сондықтан мектептегі жүйелі қолдау ерекше қажет.

Мектеп жасындағы қыз тәрбиесінің үш кезеңі

1) Бастауыш сыныптар

Тәрбиенің мақсаты — тазалыққа, ұқыптылыққа, жинақылыққа үйрету, көп білуге құштарлығын арттыру және кітап оқу мәдениетін дамыту.

2) 5–8 сыныптар

Алдыңғы кезеңдегі дағдылар тереңдей түседі. Бұл жаста қыз бала анасына ашық болып, көп нәрсені бөлісуге бейім келеді. Осы сенімді пайдалана отырып, нәзіктік, ілтипат, үлкенді сыйлау, кішіге қамқор болу, тұрақтылық сияқты мінездерді қалыптастыру — маңызды міндет.

3) 9–11 сыныптар

Бұл кезең алдыңғылармен тығыз байланысты. Мейірім бала кезден, ең жақын адамды сүюден басталады. Қыз балаға ата-анасын, туыстарын, ұстазын сыйлап-қадірлеуді үйрету — болашақта елін, жерін сүйетін, шаңырағын ардақтайтын, баласын жанындай жақсы көретін қамқор ана болып қалыптасуына негіз болады.

Өзін-өзі күтетін қыздың 10 ережесі

Өзін күтетін, көркем әрі сәнді ару әрдайым назар аударады. Ал өзіне сенімділік пен жинақылық қарым-қатынаста да, оқуда да, жұмыста да нәтижеге жеткізеді.

1. Шаш күтімі

Әдемі, күтілген шаш — әйелдің көркі. Шаш саулығына мән беріп, әрдайым таза болуын қадағалаңыз.
2. Жарасымды шаш үлгісі

Күнделікті күрделі үлгі шарт емес: шашты реттеп, сәл түзеп немесе жеңіл бұйралап қоюдың өзі жинақы көрініс береді.
3. Бет терісінің саулығы

Тері күтіміне уақыт бөлсеңіз, макияж да әдемі әрі біркелкі жатады. Таза, сау тері — басты мақсат.
4. Қол күтімі

Маникюр қолдың жинақылығын көрсетеді. Жартылай өшкен лак ұқыпсыз көрінеді, сондықтан тырнақтың таза әрі күтімді болғаны маңызды.
5. Аяқ күтімі

Жылдың қай мезгілі болса да, педикюр мен жеке гигиенаны сақтау — міндет.
6. Тіс саулығы

Сау әрі күтімді тіс — әдемі күлкінің негізі. Қажет болса, тіс дәрігеріне баруды кейінге қалдырмаңыз.
7. Макияж

Өте қанық макияждан гөрі табиғиға жақын, ұқыпты макияж жарасымды. Екпінді не ерінге, не көзге түсірген дұрыс.
8. Қас күтімі

Қас бет әлпетінің сәнін кіргізеді. Пішінін үйлесімді етіп түзетіп отырыңыз. Трендке еру үшін өзіңізге жараспайтын өзгеріс жасау міндет емес.
9. Жүріс мәнері

Әсем жүріс — сенімділіктің белгісі. Еңсеңізді тік ұстап, асықпай, нық қадам жасаңыз.
10. Сырт келбет және киім таңдауы

Киімді баратын ортаға сай таңдаңыз. Талғамды дамыту үшін сән жөніндегі пайдалы материалдарды оқып, қарап, өзіңізге үйлесімді стиль қалыптастырыңыз.

Клуб құрамы және жауапты тұлғалар