Қазақша рефераттар

Бисквит қамырының негізі - жұмыртқа

Сабақ туралы мәлімет

Мекеме
Қызылорда қаласы, №197 қазақ орта мектебі
Пән
Технология
Мұғалім
Әлжанова Роза Зейнуллақызы
Сабақтың тақырыбы
Бисквит қамырын дайындау
Сабақтың түрі
Аралас
Оқыту әдістері
Түсіндіру, сұрақ-жауап, өз бетінше сарамандық жұмыс
Көрнекіліктер
Дайын пирог, торт түрлері
Пәнаралық байланыс
Бейнелеу өнері, биология

Сабақтың мақсаты

Білімділік

Оқушыларға бисквит қамыры және одан қандай өнімдер пісірілетіні туралы толық мәлімет беру.

Дамытушылық

Теориялық білімді сарамандық жұмыста қолдануға үйрету, өз бетінше ізденуге дағдыландыру, ой-өрісті дамыту.

Тәрбиелік

Әсем бұйымдар жасауға баулу, ұқыптылыққа, еңбексүйгіштікке, іскерлікке тәрбиелеу.

Сабақ барысы

I. Ұйымдастыру кезеңі

  • Оқушылармен амандасу.
  • Оқушыларды түгендеу.
  • Құрал-жабдықтарын тексеру.
  • Зейінді сабаққа аударту.

II. Үй тапсырмасын тексеру

Өткен тақырыпты қайталау мақсатында тақырып бойынша сұрақтар қойылады және қысқаша талқылау жүргізіледі.

III. Жаңа сабақ: бисквит қамырын дайындау

Негізгі қағида

Бисквит қамырының негізі — жұмыртқа. Әдетте жоғары сортты ұн қолданылады. Қамырды бидай және картоп ұнының қоспасымен де әзірлеуге болады, бірақ картоп ұны бисквитті құрғатып жібереді.

Қант пен дәмдеуіштер

Қант ұнтағын қолданбаған дұрыс: ол қамырды сұйылтып жібереді. Ең қолайлысы — ұсақ құмшекер. Хош иіс пен дәм беру үшін лимон шырыны мен цедра қосылады. Шоколадты бисквитке какао ұнтағы пайдаланылады.

Қалыпты алдын ала әзірлеу

Бисквитті дайындамас бұрын, оны пісіретін қалыпты әзірлеу қажет. Арнайы алынбалы қалып болмаса, қаңылтыр табаны немесе аласа алюминий кастрөл қолдануға болады. Қалыпқа алдын ала таза қағаз төселеді (аздап сары май жағылған). Қағаз қалыптың түбі мен ішкі қабырғасына жақсы жабысып тұруы керек. Қағаз болмаса, қалыпқа май жағып, үстіне еленген кепкен нан ұнтағын немесе ұн себуге болады.

Жұмыртқаны бөлу және көпірту

Жұмыртқаның ақуызын сарыуыздан мұқият ажыратады. Ақуызды тоңазытқышқа қояды: салқын ақуыз тез әрі жақсы көпіршиді.

Кейде көпіртер алдында әр 1 ақуызға 1–2 ас қасық су қосады — бұл көлемін арттырады. Дегенмен көпіршіген ақуызды ұзақ ұстап қалуға болмайды: ол басылып қалады.

Қамырды араластыру реті

  1. 1 Сарыуызды құмшекермен ағарғанға дейін үгіп езеді. Үгу ұзақ болған сайын масса ағарып, көлемі ұлғаяды, ал бисквит сапалырақ шығады.
  2. 2 Сарыуыз-қант қоспасын ұнмен араластырады.
  3. 3 Соңында мұқият араластыра отырып, көпіршіген ақуызды қосады.
  4. 4 Дайын массаны кідірмей қалыпқа құйып, бірден пешке қояды.

Пісіру шарттары

Бисквитті 200°C-тан аспайтын тұрақты температурада пісіреді.

Температураны дәл анықтау қиын болса, қалыптың бетін бисквитке тимейтіндей етіп дымқыл қағазбен жабады да, шамамен 10 минуттан кейін тексереді.

Бисквит салынған қалыпты толық піскенше қозғамау керек. Қалай пісіп жатқанын 30 минуттан соң ғана абайлап бақылауға болады.

Даяр бисквитті алдымен қалыптан алмай, бөлме температурасында салқындатады. Егер бисквит аздап күйіп кетсе, толық салқындағаннан кейін күйген жерін үккішпен тазартқан дұрыс.

Бисквиттен жасалатын өнімдер

Бисквиттен рулет, торт, пирожный және печенье дайындалады.

Рулет

  • Рулетке арналған бисквитті салқындатпайды: ыстық күйінде жайып, орайды.
  • Қалыңдығы: 2–2,5 см.
  • Пісіру уақыты: 25–30 минут.
  • Піскен соң қағазын алып, майлыққа салып, алдын ала дайындалған начинканы жағып, ыстық күйінде орайды.
  • Начинка: джем, қайнатпа, алма салмасы.

Торт

  • Қалып өлшемі: биіктігі 8–10 см, диаметрі 22–25 см.
  • Пісіру уақыты: 50–60 минут.
  • Толық салқындаған соң ғана қабаттап кесуге және әрлеуге ыңғайлы болады.

Қорытынды және бекіту сұрақтары

Бүгінгі сабақта бисквит қамырының құрылымы, дайындалу жолдары және пісіру талаптары туралы толық мәлімет алынды.

Сұрақтар

  • Бисквит қамырының негізі неден тұрады?
  • Бисквит қамырына қандай ұн қолданылады?
  • Лимон бисквит қамырына не үшін қосылады?
  • Қалыпқа алдын ала қағаз не үшін төселеді?
  • Бисквит қандай температурада пісіріледі?

Үй тапсырмасы

Бисквит қамырын дайындаудың технологиялық схемасын сызып келу.