Кітап - сарқылмас рухани қазына дей келе, білімнің кітап арқылы берілетінін ұғындыру
23 сәуір — Халықаралық кітап күні
Кітап — сарқылмас рухани қазына. Білімнің кітап арқылы берілетінін терең ұғындыру, кітаптың адам өміріндегі маңызын түсіндіру және ғылым мен білімнің пайдасын дәріптеу — осы күннің өзекті мәні.
Мақсат — оқушылардың кітапқа қызығушылығын арттыру, көркем әдебиетке құштарлықты күшейту, сондай-ақ оқулықты күтіп ұстау мәдениетін қалыптастыру.
Көрнекіліктер
- Оқу мен білім туралы нақыл сөздер жазылған плакаттар
- Кітап көрмесі
- Слайд/таныстырылым
Негізгі ой
Ақпарат көздері қарыштап дамыған жаһандану дәуірінде де кітап оқу мәдениеті бәсеңдемеуі керек. Кітап — адамды тәрбиелейтін, ойды өсіретін, рухты байытатын сенімді серік.
Іс-шараның барысы
І жүргізуші — Әсел
Қуан, кітап, қуанатын күн бүгін,
Серпіп таста мұңды жүрек түндігін.
Кел, оқырман, тойын тойла кітаптың,
Шаттанатын мерекелі күн бүгін.
ІІ жүргізуші — Ербол
Қош келдіңіздер, құрметті кітапсүйер қауым! Кітап күні мерекесімен құттықтаймыз!
Осы мерекеге орай 4 «В» сынып оқушыларының «Кітап — білім бұлағы» атты ашық тәрбие сағатын тамашалаңыздар.
Кітап туралы толғаныс
Кітап — нәзік те тұнық әлем. Кітап — білімнің түпсіз аспаны, терең бастауы. Ұлтымыздың мерейі мен деңгейін көтеріп, қоғам мен мемлекетіміздің өркендеуіне қыруар пайда әкелетін рухани қазына — кітап.
О, кітап, бас иемін мәртебеңе,
Игілік-қазынасың бар адамға.
Сен берер жақсылықтың есебі жоқ,
Жеткізіп, жолын тауып, айта алам ба?
Тарихи дерек
1972 жылы ЮНЕСКО шешімімен «Халықаралық кітап жылы» жарияланды. Ал 1995 жылдан бастап 23 сәуір — Халықаралық кітап күні ретінде аталып өтеді. Содан бері бұл мереке Ресей, Германия, Америка сияқты елдерде және өзге де мемлекеттерде жоғары деңгейде ұйымдастырылып келеді.
Жаңа ақпарат көздері жылдам дамығанымен, кітап оқу, кітапты пайдалану және көркем шығармаларға деген ықылас бәсеңдемеуі тиіс.
Кітап — білім көзі
Кітап та алма ағашы,
Жемісін біздер теретін.
Тәтті алмаға балашы,
Кітабыңның әр бетін,
Мұзафар Әлімбаев жырлағандай, әдеби кітаптар мен оқулықтар — білімнің көзі, рухани қазына. Біз кітап арқылы бастауыш мектептен-ақ бүкіл адамзат өмірімен танысамыз. Кітап білімімізді молайтады, үлгі-өнеге мен тәрбие береді.
«Оқыған-тоқығаның көп болса, жеңбейтін жау, алынбайтын қамал жоқ» дейді дана халқымыз. «Батыр бірді жығады, білімді мыңды жығады» деген сөз де бекер айтылмаған.
Сағындық
Кітап — шебер ұстаз, тілсіз мұғалім.
Кітап — адал пейіл, асыл дос.
Кітап — мұхит. Сол мұхиттан не терем?
Мен біліммен ылғи дос боп өтер ем!
Жансая
Кітап (арабша «жазба») — мерзімсіз баспасөз басылымы; көркем-әдеби, қоғамдық-саяси, ғылыми-практикалық мазмұндағы туынды.
Кітаптың алғашқы түрлері Ежелгі Шығыс елдерінде, Грекияда, Римде қыш тақташаларға сына жазуымен түсірілді. Біздің заманымызға дейінгі XXV ғасырда Мысырда қыш тақташалардың орнына қамыс (папирус) қолданылды. Біздің заманымызға дейінгі VII ғасырда папирусқа жазу ісі Грекия мен Римде кең өріс алды. Осы кезеңде кітап көшіретін көшірушілер және қолжазбаны көркемдейтін суретшілер пайда болды.
Баглан
Кіші Азиядағы Пергам патшалығының шеберлері жануарлар терісінен жазуға арналған жаңа материал әзірледі. Патшалықтың атымен ол «пергамент» деп аталды. Осылайша біздің заманымызға дейінгі II ғасырда папирустың орнына тері жарғақ кең қолданыла бастады. Ежелгі Рим мәдениеті мен ғылымы өкілдерінің туындылары жарғақ кітаптарға жазылып таралды.
Камила
105 жылы қытай шебері Цай Лунь қағазды ойлап тапты. XIII ғасырда қағаз жасау өнері Шығыстан Батысқа тарай бастады. Осыған орай Еуропада қолжазба кітап ісі қарқынды дамып, түрлі қаріптер мен бас тақырыптар (айдарлар) қолданысқа енді. Кітап мұқабалары алтын, күміс және басқа да металмен өрнектелді.
Дәуірбек
XV ғасырдың ортасында неміс өнертапқышы Иоганн Гутенберг баспа қалыбын ойлап тауып, жылжымалы құйма қаріппен басылатын кітаптың пайда болуына жол ашты. Қазіргі кітап — мұқабаға дәптерлер түрінде өзара тіркестіріліп бекітілген кітап блогі үлгісінде жасалады.
Қазақ кітап баспасының бастауы
Алғашқы баспа құрылғылары ағаштан жасалды. Қазақ кітап баспасы Ресейге қосылғаннан кейін қалыптаса бастады. Тұңғыш қазақ кітаптары 1800 жылдан бастап жарық көрді.
Кітапты қадірлеу
Саған білім жемісін
Оқулығың береді.
Талай адам сол үшін
Маңдай терін төгеді.
Орманшының аялы
Алақаны өсірген.
Сонау ағаш саялы
Қағаз үшін кесілген.
Түйін
Кітап — еңбектің нәтижесі әрі ұрпаққа қалатын аманат. Оны күтіп ұстау, таза сақтау, уақытында орнына қою — оқырман мәдениетінің маңызды бөлігі.