Катюша әні

Сценарий: «Менің елім» әскери-патриоттық әндер байқауы

Ұлы Жеңістің 70 жылдығына арналған мерекелік іс-шара. Сахна мерекеге сай безендіріліп, әуен баяу ойнап тұрады.

Мұғалімнің кіріспе сөзі

Құрметті ата-аналар, ұстаздар, оқушылар! Бүгін Ұлы Жеңістің 70 жылдығына орай өтетін «Менің елім» атты әскери-патриоттық әндер байқауына қош келдіңіздер!

Жүректі тербеп, көңілде сөнбей, ешқашан өлмейтін құдірет не? Әрине, ол — ән. Ғұмырлы ән — халықтың жаны. Ұлан-ғайыр даланы әсем әуенімен тербеткен халқымыз қуанса да жыр төгіп, жабықса да әнмен өзін жұбатқан. Әннің құдіреті — жұртты жұмылдырып, рухты асқақтатуы.

Әр дәуірдің патриоттық әндері — өз уақытындағы ұрпақтың Отан үшін оққа да, отқа да түсуіне себепкер болған идеологиялық қуат. Бір кезеңде ата-әжелеріміз «Партия қайда болса, Жеңіс сонда!», «Алға, комсомол!» деп екпіндете шырқады. Мұндай әндер үгіт-насихат ықпалын күшейтіп, жастардың жігерін жандырып, азаматтық белсенділікті арттырды.

Әскери-патриоттық әндер кеше де, бүгін де, ертең де ерекше бағалы. Байқаудың мақсаты — өскелең ұрпақтың бойында патриоттық сезім қалыптастыру, аталарымыздың ерлігін насихаттау, Отанға құрметті күшейту, өнерлі оқушыларды анықтап, сахна мәдениетіне баулу.

Жүргізушілер шығады

1-жүргізуші

Иә, біз — бейбіт елде, байтақ жерде өмір сүріп жатқан бақытты ұрпақпыз. Бірақ осы күнге жеткізу үшін ата-бабаларымыздың «Ақтабан шұбырынды» зобалаңын көргенін, ашаршылықта қынадай қырылғанын, зиялылардың жазықсыз репрессияға ұшырағанын, Ұлы Отан соғысында кеудесін оққа тосқанын ұмытпауымыз керек.

2-жүргізуші

Азаттық жолындағы тарихымыз «Елім-ай», «Атамекен», «Жас қазақ» секілді әндер арқылы да бізге жетті. Бүгінгі міндет — егемен елдің ертеңін сеніп тапсырар намысты, қайсар, ұлтжанды ұрпақ тәрбиелеу. Сондықтан патриоттық әндеріміздің көбейе түсуі аса маңызды.

1-жүргізуші: «Ер елсіз болмайды, ел ерсіз болмайды» демей ме дана халқымыз. Бұл сайыс қан майданда қол бастап, ел намысын жауға таптатпаған батырларға арналады.

2-жүргізуші: Олай болса, Ұлы Жеңістің 70 жылдығына орай өтетін «Менің елім» атты әскери-патриоттық әндер байқауын ашық деп жариялауға рұқсат етіңіздер!

1-жүргізуші: Шарамызды бастамас бұрын байқауға қатысушы үміткерлерімізді ортаға шақырамыз. (Үміткерлер ортаға шығады.)

2-жүргізуші: Осы байқауға төрелік жасайтын қазылар алқасымен таныстырып өтейік. (Қазылар құрамы жарияланады.)

Бағалау тәртібі

Қазылар алқасы орындау шеберлігі мен сахна мәдениетіне қарай бағалайды.
Ең жоғары ұпай — 10 балл.
Жүлделі орын алған 3 оқушы аудандық сайысқа жолдама алады.