Бір - біріңізді құрметтей біліңіздер

Жаңадан бас қосқан жұптарға арналған кеңес

Неке — екі адамның қуаныш пен қайғыны бөлісіп, күнделікті тұрмыстық мәселелерді бірге шешіп, бір мақсатқа ұмтылатын ортақ өмірі. Бірге өмір сүру туралы шешім қабылдаған соң, кез келген жағдайда сабыр сақтап, даулы сәттерде ымыраға келуге ұмтылған маңызды.

Некенің негізгі құрамдас бөліктерінің бірі — әйел мен ер адамның арасындағы жақын қарым-қатынас. Алғашқы кездегідей құмарлық мәңгі тұрақты болмауы мүмкін: бірде күшейіп, бірде бәсеңдейді. Дегенмен, жұптар бір-бірінің арасында салқындық пайда болуына жол бермеуге тырысқаны жөн.

Көптеген ерлі-зайыптылар басқа жұптарға қарап: «Қандай жарасымды!» — деп ойлайды. Алайда шын мәнінде кез келген отбасында қиындық та, түсінбеушілік те кездеседі. Бірі мәселені өз шаңырағының ішінде шешуді қалайды, ал енді бірі оны ашық жария етеді. Өзіңізді өзгелермен салыстырудың қажеті жоқ — ең дұрыс жолы: кез келген қиындықты өз отбасыңызда ақылдаса отырып шешу.

Үйде сыйластық пен жылы атмосфераны сақтауға көмектесетін кеңестер

1. 1) Көңіл-күйдің әсерін ескеріңіз

   Сіздің көңіл-күйіңіз бен мінез-құлқыңыз жұбайыңызға тікелей әсер етеді. Күніңіз сәтсіз өтсе, соның салмағын жұбайыңызға артып, оның да көңіл-күйін түсірудің қажеті жоқ. Бір-біріңізді құрметтеңіздер.

2. 2) Қателіктермен бірге жұмыс істеңіз

   Неке сәтті болуы үшін өзіңізбен және жіберген қателіктеріңізбен жұмыс істеуге тура келеді. Ренжіскен жағдайда апта бойы үндемей жүру мәселені ушықтырады. Сөйлесіп, ортақ шешім табыңыздар.

3. 3) Сырт келбетке ұқыпты болыңыз

   Тұрмыс құрғаннан кейін өз келбетіне көңіл бөлуді азайтып жіберетіндер болады (бұл ер азаматтарға да қатысты). Бұл — қате. Себебі ең алдымен жұбайыңыз үшін әдемі әрі тартымды болуға ұмтылу маңызды.

4. 4) Бір-біріңіздің қызығушылығыңызды сыйлаңыз

   Бір-біріңіздің хоббиіңізді құрметтеңіздер. Тұрмыстық ұстанымдарыңызды, кеңестеріңізді немесе өз талғамыңызды жұбайыңызға күштеп таңбаңыз. Егер оған ұнамаса немесе орындауға құлықсыз болса, ренжімеңіз.

5. 5) Кішкентай еңбекті де бағалаңыз

   Үй шаруасындағы қарапайым істер үшін де мақтауды ұмытпаңыз: ыдыс жуылғанда, үй жинастырылғанда, қоқыс шығарылғанда. Бұл жұбайыңызға жағымды әсер береді және ынталандырады.

6. 6) Мәселені уақытында шешіңіз

   Туындаған мәселені дер кезінде талқылап, кейінге қалдырмаңыз.

7. 7) Кешіруді үйреніңіз

   Бір-біріңіздің қателіктеріңізді кешіруге тырысыңыз. Кешіруге екеуіңіздің де қақыңыз бар. Бір нәрсе дұрыс болмай жатса, бірден кінә артудан сақ болыңыз.

8. 8) Айыптаудан гөрі қолдау көрсетіңіз

   Қарым-қатынас жақсы болмай жатса, жұбайыңызды бірден кінәламаңыз. Ол сізден айыптау емес, қолдау мен қамқорлық күтіп жүрген болуы мүмкін.

9. 9) Сүйіспеншілік әркімде әртүрлі көрінеді

   Кейде жұбайыңыз сүйіспеншілігін білдіргісі келеді, бірақ оны сізге ұнайтын тәсілмен жеткізе алмауы мүмкін. Нені қалай қабылдайтыңызды жұмсақ түрде түсіндіріңіз.

10. 10) Махаббатты еске салып отырыңыз

    Жұбайыңыз сізді жақсы көретінін ұмытпаңыз: сүймесе, сізбен отбасы құрмас еді. Көп ер азамат эмоция мен сезімді білдіруде ұстамды келеді. Оған ойы мен қалауын жасырмай, ашық айтуға мүмкіндік беріңіз.

11. 11) Күрделі мәселеден қашпаңыз

    Отбасында күрделі мәселе туындаса, оны кейінге қалдырмай, бір-біріңізге сілтемей бірге шешімін табыңыздар. Егер нақты жолын білмесеңіз, осындай жағдайдан өткен сенімді достарыңызбен ақылдасып көріңіз.

12. 12) Мінез ерекшелігін құрметтеңіз

    Әр адамның өзіне тән мінезі мен ерекшелігі бар. Көбіне ұрыс-керіс мінезі ауыр жұптар арасында жиі туындайды да, татуласуға көп уақыт кетеді. Кейде ұрысқа себеп болған адамның өзі татуласқысы келмей жатады. Отбасы мүшелерінің әрқайсысының пікірін, тілегін құрметтеңіздер. Үйдегі жайлы әрі тыныш атмосфера сізге де, балаларыңызға да қуаныш сыйлайды.

13. 13) Қанағат пен жауапкершілікті ұмытпаңыз

    Бұл өмірде әр адамның барлық қалауы орындала бермейді: бір нәрсе артық, бір нәрсе кем болады. Қолыңызда барға қанағат етуді үйреніңіз. Ажырасып кету — мәселенің шешімі емес. Бұл балалар үшін өте ауыр процесс, олардың психикасына кері әсер етуі мүмкін. Ажырасу туралы шешім қабылдамас бұрын, мұқият ойланыңыз.