Әдеби кеш

1-жүргізуші

Биылғы жыл біздің өңір үшін айшықты жылдардың бірі. Наурыз айында жерлес қаламгер, сөз зергері Ғабит Мүсіреповтің 110 жылдық мерейтойын атап өтсек, 15 сәуірде тағы бір даңқты жерлесіміз — жазушы Сафуан Шаймерденовтің 90 жылдық мерейтойын атап өттік. Осыған орай мектепішілік және аудан көлемінде түрлі шаралар ұйымдастырылуда. Бүгін мектебімізде осы күнге арналған «Көркем сөздің жұлдызы» атты әдеби кештің шымылдығын ашамыз.

2-жүргізуші

Сафуан Шаймерденов 1922 жылы 15 сәуірде Солтүстік Қазақстан облысы, Преснов ауданында (қазіргі Жамбыл ауданы), Амангелді ауылында дүниеге келген. Орта мектепті тәмамдаған соң, өз ауылындағы орталау мектепте мұғалім болып қызмет атқарды. Әскер қатарында болды.

1942–1943 жылдары Преснов аудандық комсомол комитетінің хатшысы, 1942–1945 жылдары «Ленин туы» газетінде тілші әрі әдеби қызметкер болып еңбек етті. 1950 жылы ҚазМУ-дің филология факультетін үздік бітіріп, кейін республикалық жастар газетінің Қарағанды облысы бойынша тілшісі болды.

1952 жылы «Әдебиет және искусство» журналы бөлімінің меңгерушісі, Қазақстан Жазушылар одағында проза секциясының жетекшісі, 1955 жылы «Қазақ әдебиеті» газетінде бас редактордың орынбасары қызметтерін атқарды. 1958–1960 жылдары Қазақстан Жазушылар одағы басқармасының хатшысы болды. 1970–1975 жылдары Қазақ КСР Мәдениет министрлігі репертуарлық коллегиясын басқарды.

Бағдарламадағы үзіліс: «Ағажан» әні.

1-жүргізуші

«Болашаққа жол» атты алғашқы романы 1953 жылы жарық көрді. Кейін бұл туынды орыс тіліне «Инеш» атауымен аударылды. «Өмір нұры» атты хикаяттар цикліне бір тақырыптық-идеялық желіге бағындырылған алты хикаят — «Мезгіл», «Қарғаш», «Өмір нұры», «Ит ашуы», «Мәжнүн тал» және басқа да шығармалар кіреді. Бұл туындылар шетел тілдеріне бірнеше мәрте аударылған.

«Қайдасың, Зарина?», «Қыр гүлі», «Әнім сен едің», «Марғау», «Төрт бойдақ, бір қыз», «Өкіл әке», «Түйе көтерген», «Ару ана — дүние» пьесалары көптеген қазақ театрларының сахнасында қойылып келеді.

Аудармалары қатарында үнді жазушысы Р. Тагордың «Күйреу», «Гәуірмақан» романдары мен «Алтын сағым» атты әңгімелер жинағы, Л. Толстойдың «Альберт» хикаяты, беларус драматургі А. Макаёноктың «Трибунал» пьесасы, француз композиторы Эрве мен драматург А. Мильяждың «Түлкі бикеш» комедиясы бар.

2-жүргізуші

«Жыл құсы» хикаяты 1974 жылы ВЦСПС пен КСРО Жазушылар одағы ұйымдастырған жұмысшы тақырыбына арналған байқауда жүлделі орынға ие болды. Р. Тагордың «Күйреу» романының аудармасы үшін 1984 жылы Қазақстан Жазушылар одағының сыйлығы берілді.

«Ағалардың алақаны», «Әдеби толқындар» кітаптары үшін 1988 жылы Абай атындағы мемлекеттік сыйлыққа ие болды. 1992 жылы Қазақстан Республикасының «Халық жазушысы» құрметті атағы берілді. «Отан», «Құрмет белгісі» ордендерімен марапатталған. Петропавл (Қызылжар) қаласының Құрметті азаматы.

1-жүргізуші

Қазақ әдебиетінің көрнекті өкілдерінің қатарында Сафуан Шаймерденовтің орны бөлек. Оның романдары мен хикаяттары әдебиетіміздің алтын қорына енген. Жазушы шығармаларының эстетикалық талғамы мен көркемдік табиғаты туралы академик Зейнолла Қабдолов былай деген:

2-жүргізуші

Қазақ прозасындағы ең мәдениетті қаламгерлердің бірі ретінде Сафуан Шаймерденов оқырманын образдарының әсемдігімен, сыпайылығымен, әдептілігімен баурайды. «Инеш», «Әспет», «Қарғаш» секілді кейіпкерлер — жылылықтың, нәзіктіктің, көркем мінездің бейнесі.

Жазушы қазақтың жас әйеліне тән биязылық, әдеп, көркемдік, алғырлық пен өткірлікті шебер сюжеттік өріммен ұштастыра отырып, эстетикалық тұтастыққа айналдырады.

Бағдарламадағы үзіліс: «Арулар» әні.

1-жүргізуші

Халықтың қалаулысы атану — екінің біріне бұйырмайтын бақыт. Ұлттың көкейіндегісін көркем ойымен де, көсем сөзімен де қозғайтын күрескер тұлғаны жұртшылықтың ардақтау сыры — оның халықтың мұңын мұңдап, сөзін сөйлеуінде.

Бұл қасиет жерлесіміз, халық жазушысы, мемлекеттік сыйлықтың иегері, Петропавл қаласының Құрметті азаматы Сафуан Шаймерденовтің болмысынан айқын танылды. 1986 жылғы Желтоқсан оқиғасы, ұлттық тіл мәртебесін нығайту, дәстүр-салттарды ұлықтау жолындағы белсенді ұстанымы оның есімін ел жадында айрықша орнықтырды.

3-жүргізуші

Туған жерінде ұлттық мектептердің аздығы ағаны қатты алаңдататын. 1994 жылы Қызылжарда бірлі-екілі қазақ мектебінің іргесі қаланып жатқанын, алайда қаржы тапшылығынан құрылыс тұралап қалғанын жеткізгенімде, ол бұл мәселеге айрықша назар аударды.

Қаланың Құрметті азаматы ретінде, Қазақ тілі қоғамының өтінішін аяқсыз қалдырмай, журналист Мәлік Мұқановпен бірге сол кездегі Премьер-министр Сергей Терещенконың қабылдауында болып, қалалық классикалық гимназия құрылысына қаржы бөлдіртті. 1996 жылы гимназия қазақ балаларына есігін айқара ашты.

1997 жылы, 75 жас мерейтойы қарсаңында, гимназияда жазушының құрметіне арнайы сынып ашылып, оның есімі берілді.