Желтоқсан - тәуелсіздіктің бастауы
Желтоқсан – тәуелсіздіктің бастауы
Бұл әдеби-музыкалық ертеңгіліктің мақсаты — тәуелсіздік туралы терең мағлұмат беру, ата-бабамыздың ерлік жолын үлгі ете отырып, оқушыларды Отанды сүюге, еліне қызмет етуге тәрбиелеу. Тәуелсіздік мерекесі қарсаңында ел тарихына шолу жасап, тәуелсіз Қазақстанның жетістіктерімен таныстыру арқылы білімді тереңдету көзделеді.
Іс-шараның барысы
Әнұран орындалады.
1-жүргізуші
Құрметті қонақтар, ұлағатты ұстаздар мен шәкірттер! «Желтоқсан – тәуелсіздіктің бастауы» атты ертеңгілігімізге қош келдіңіздер! Биыл еліміздің сан мың жылдар бойы аңсаған тәуелсіздік алғанына 22 жыл толып отыр.
2-жүргізуші
Егемен еліміздің ең ұлық, ең қастерлі мерекесі — Тәуелсіздік күні. Тәуелсіздіктің тал бесігінде тербелген ардақты ағайындар, мереке құтты болсын!
1-жүргізуші
Тәуелсіздіктің түп-тамыры Желтоқсан оқиғасымен тікелей байланысты екеніне ешкім дау айта қоймас. Дегенмен, 1986 жылдың қасіретті желтоқсаны бір күндік немесе бір жылдық наразылықтың ғана көрінісі емес еді.
2-жүргізуші
Тәуелсіз ел болу — өзіңнің өзгелермен тең екеніңді сезіну және ана тіліңде емін-еркін сөйлеу деп түсінемін.
1-жүргізуші
Ендеше, біздің оқушылар тәуелсіздік туралы не айтады екен?
Өлең жолдары: тәуелсіздік туралы үн
Тәуелсіздік — менің байтақ Отаным,
Бір өзіңсің Мұхтар, Абай, Шоқаным.
Тәуелсіздік — сәбилердің шаттығы,
Тәуелсіздік, тәуелсіздік — жыр-әнім.
Тәуелсіздік таңы атты,
Азаттықтың күні атты.
Тәуелсіздік алған ел —
Егемен қазақ халқы.
Тарихқа тағзым: азаттық жолының белестері
1-жүргізуші: Бостандық деп аталатын асқақ арман жолында қаншама қан төгілді, қаншама батыр мерт болды. Бұл арпалыс бір күннің, бір жылдың, бір мезеттің ғана оқиғасы емес — талай ғасырларға созылған күрес. Осы күрестің жиынтық атауы — тарих. Ендеше, тәуелсіздік жолындағы тарихи беттерге тағы бір зер салайық.
Көрініс
Бөгенбай батырдың қазақтарды жоңғарларға қарсы шабуылға шақыруы.
Қалса да қайда көлің, қайда жерің,
Қасқайып хақ жолынан таймап едің.
Айрылып күндіз — күлкі, түнде — ұйқыдан,
Күткенің осы еді ғой, қайран елім!
Республика! Ерікті ел — Қазақстан!
Келді ақыры көп күткен жаз алыстан.
Келді алыстан аңсатып, армандатып,
Торды бұзған мен де бір мәз арыстан.
Өр едің өліссең де беріспеген,
Ел едің еншісін де бөліспеген.
Зар-мұңның әні бар ма сен айтпаған,
Тағдырдың зәрі бар ма сен ішпеген?
2-жүргізуші
1931–1933 жылдары қоғам құру шаралары бүкіл елді тығырыққа тіреді. Аштықтан және түрлі індеттерден халықтың шамамен 40%-ы қырылды. 1 578 000 адам атамекенін тастап кетуге мәжбүр болды. Тек арада қырық жылдай уақыт өткен соң ғана жағдай біртіндеп қалпына келді.
Тарихи сабақ
Ұлтты ұйыстыру, тілді қадірлеу, зиялылар мұрасын ұмытпау — тәуелсіздікті нығайтудың темірқазығы.
Хандардың қайталама қателерін,
Ұлт бол деген нығайтып қатарларын.
Мағжан мен Мұхтар, Жүсіпбектің —
Ұмытпа ешқашан баталарын.
Біз намыскер — қазақ елі ұланымыз,
Қорғайтын жерді Отан — қыранымыз.
Талап, еңбек, терең ой, қанағат қыл,
Рақым ет — дер Абай айтқан ұранымыз.
Бізге де кез келді ғой көктем шығар,
Зілзала, құйын заман өткен шығар.
Күндіз-түні шырылдаған құлын даусың —
Құдайдың құлағына жеткен шығар.
Бейнебаян
Қазақ елінің дамуы туралы бейнематериал көрсетіледі.
Қара мына ғажапқа,
Теңдік тиді қазаққа.
Езгідегі ұрпағың
Енді айналмас мазаққа.
Өзіңдікі туың да,
От пен ауа, суың да.
Жаса, Қазақстаным!
Белді бекем буын да.
Ұраның да жасасын!
Құраның да жасасын!
Қасиет-кие дарыған,
Ұланың да жасасын!
Қанатынан қайрылып, қыл арқаннан майрылып,
Қонақ — тәуелсіздіктен қала көрме айрылып.
1-жүргізуші
1937–1938 жылдары қуғын-сүргін жаппай сипат алды. Сол жылдары Кеңес өкіметін нығайтуға қатысқан 27 мыңнан астам көрнекті қайраткер атылды.
2-жүргізуші
1941–1945 жылдары 4 жылға созылған Ұлы Отан соғысы болды. 1418 күн ішінде 20 млн-ға жуық адам қаза тапты. Ендеше, ерлік көрсеткен батырларды еске алайық.
Желтоқсан жаңғырығы: 1986
1-жүргізуші: 1986 жылы Алматының бас алаңында Желтоқсан оқиғасы болды. Бұл оқиға дүниені дүр сілкіндірді. Көтеріліске Қайрат Рысқұлбеков, Ербол Сыпатаев, Ләззат Асанова және басқа да аға-апаларымыз қатысты. Желтоқсандағы жастардың талабы — бейбіт түрде тәуелсіздікке жету еді.
Ағалардың алып берген биігін
Абыроймен асқақ ұстап, жастарың.
Қазақстан деген алып мемлекет
Қарыштап тек алға қадам бастаң.
Атағыңа ғашық болсын жер-жаһан,
Азат елім, ашық болсын аспаның!
Би
«Қазақ елі» биі орындалады.
Тәуелсіздік шежіресі: маңызды даталар
2-жүргізуші
Енді еліміздің тәуелсіздік шежіресіне қысқаша тоқталайық:
- 1991 жыл, 1 желтоқсан: Қазақстан Республикасының тұңғыш Президенті Нұрсұлтан Назарбаев сайланды.
- 1991 жыл, 16 желтоқсан: Қазақстан Республикасы өз тәуелсіздігін жариялады.
- 1992 жыл, 4 маусым: Мемлекеттік рәміздер қабылданды. Сол жылы қазан айында тұңғыш ғарышкер Т. Әубәкіров ғарышқа самғады.
- 1993 жыл, 15 қазан: Ұлттық валюта — төл теңгеміз айналымға енді.
- 1995 жыл, 30 тамыз: Ата Заң қабылданды. Жаңа Конституциямен еліміздің жаңа тарихы бастау алды.
1-жүргізуші
Иә, достар, 1 желтоқсан алғаш рет Президент күні ретінде аталып өте бастады.
Хор
«Көк тудың желбірегені» әні орындалады.
Тәуелсіз елдің тілегі
1-жүргізуші: Тәуелсіздіктің туын желбіреткен ұлтжанды аға-әпкелеріміздің арқасында егемен ел болдық. Ендеше, осындай бейбіт елде ата-анамызбен, бауырларымызбен тату-тәтті өмір сүрейік!
Би
«Әке мен ана»
Би
«Көңілді күн»
Хор
«Қазақстаным менің»
2-жүргізуші
Осымен Тәуелсіздік мерекесіне арналған «Желтоқсан — тәуелсіздіктің бастауы» атты әдеби-музыкалық ертеңгілігіміз аяқталды. Көріп, тамашалағандарыңызға рақмет. Сау болыңыздар!