Өзім ақтарған кітаптардың бірінде
Эпиграф
Сен шыққан биік жоқ әлі,
Сен шықпақ биік жоғары.
Қайралмай жатқан жас талант,
Қиып түссем деп соғады.
Т. Айбергенов
Бүгін кімбіз, ертең кім боламыз?
Бұл — кең тынысты, мол мазмұнды талап ететін, бәрімізге ортақ әрі ешкімді бейжай қалдырмайтын тақырып. Менің ой-санамда бірде жалындап, бірде үнсіз арпалысқан сұрақтарға жауап іздеп, талай рет шарқ ұрған кездерім болды. Қазір де мен болашақтың іргесін бірге қалауға бет алған, алдына биік мақсат қойған саналы ұланның бірімін.
Қазақ деген елімнің дала көшіндей ұзақ тарихын тануға талпынған түлегімін. Барыс мінезді Қазақстанның ертеңіне ел сенімін ұластыра білген парасатты Президент Нұрсұлтан Әбішұлы Назарбаев басқарған мемлекеттің өкілімін.
Болашақты Жолдаудан тану
Елін сүйген азаматтар Елбасының сарабдал саясаты халық таразысында салмақты орын алып отырғанын аңғарып, бұл туралы баспасөз беттерінде де айтып келеді. Ендеше, болашақты Елбасының жыл сайынғы Жолдауларынан-ақ танып, бағамдауға болады.
«Қазақстан – 2030» және нақты нәтижелер
- Мектептерді компьютерлендіру бағыты кезең-кезеңімен жүзеге асқанына ел куә.
- Ел қызметкерлері мен зейнеткерлердің жалақысы мен зейнетақысын арттыру секілді әлеуметтік қадамдар халықтың көңілінен шықты.
- Дамыған мемлекеттермен тереземіз теңескен тұстар — ортақ жетістік ретінде жұрт назарында.
Сондықтан мен Елбасы сомдаған мемлекеттің болашағы біліммен жарқырап, шұғыла шашарына сенемін.
«Болашақ — білімде»
Өзім оқыған кітаптардың бірінде: «Болашақ — білімде», — деген қанатты сөзді кездестірген едім. Шындығында да солай. Адам өзін кіммін деп таныса, көбіне сол болмысты өміріне айналдырады.
Мырзагелді Кемелдің ой-толғамдарынан да осыған үндес пікірлерді оқыдым: «Ауырып тұрмын» деп жиі айтқан адамның ауруға беріліп кетуі де, «жетемін» деген адамның мақсатына жетуі де — сенім мен ішкі бағдарға байланысты.
Жастарға сенім
Әдебиет оқулығындағы қазақтың сыршыл ақыны Мағжан Жұмабаевтың «Мен жастарға сенемін» өлеңі арқылы мен ертеңіме көз жібере қараймын.
Арыстандай айбатты,
Жолбарыстай қайратты,
Қырандай күшті қанатты —
Мен жастарға сенемін!
Алғашқы шумақтың жалынды сөздері қуат береді, ал жастарға лайық теңеулер көңілді өсіреді. Мағжан сенген жастар өз дәуірінде қыруар іс атқарғанын тарих жоққа шығармайды. Бұл шумақ маған да дем беріп, ертеңге деген сенімді бекітеді.
Ертеңгі елдің тұтқасы — жастар
Ендеше, біз — жастар, ертең елдің тұтқасын ұстайтын азаматпыз. Біз — мемлекет айқындаған мақсаттарды негіз етіп, жігер желкенін көтеріп, алыс жағалауларға бет түзеген жолаушымыз; бір кезде Асан қайғы іздеген Жерұйықтай арманға ұмтылған ұрпақпыз.
Бүгінгі бағыт, ертеңгі жауапкершілік
Бүгін колледж қабырғасында келешектің келбетін көкірек көзімен танып, арман-қиялынан айнымаған жас болсақ, ертең сол қиялдың жемісін баптайтын бағбан боламыз.
Ұлттың төл жәдігерлері — ғасырлар қойнауынан жеткен қазына. Оны қастерлеп, келер ұрпаққа аманат ету — ортақ парыз. Бұл байлықтың баршамыздың игілігімізге айналары ақиқат.
Шет жұртта жүрген бауырларымыз бен қандастарымыздың ата-мекен — Қазақстанға аруанадай қазығын тауып қайта оралуы да біздің елдің кеңдігі мен бірлігінің белгісі.
Бүгін елеулілікті межелеген ел болсақ, ертең елеулілікті еңсеріп-ақ тастайтын елміз.
Қорытынды ой
Мезгілі келіп, ойларымның бір бөлігі осылайша қағазға түсті. Өткір болмаса да, өн бойымдағы өзекті жарып шыққан бүгінім мен ертеңім жайындағы толғанысым осы.
Алдағы күндерде биігімде қол бұлғаған армандарға дем беретін үмітім мен сенімім, ниетім мен тілегім — осы ойларды әрдайым қанаттандырып тұрады.
«Жоғары өрле немесе жолды босат. Сатыда тоқтама».
Пайдаланылған әдебиет
- Назарбаев Н. Ә. Қазақстан – 2030. Ел Президентінің Қазақстан халқына Жолдауы.