Қазақша рефераттар

Ақуыз құрамына кіретін аминқышқылдар деңгейі емшек сүтінде үйлесімді

Емшек сүті — алғашқы айлардағы ең мінсіз қорек

Емшек сүті — табиғат берген ғажайып, сәби өмірінің алғашқы айларындағы ең мінсіз қорек. Оның құрамында өсу мен даму үшін қажетті барлық компоненттер бар: қоректік заттар, қарсы денелер, ферменттер және ең маңыздысы — ақуыздық байланыстар.

Ақуыз — негізгі құрылыс материалы. Жасушалар, ферменттер мен гормондардың едәуір бөлігі ақуыздан тұрады, сондықтан оның сапасы мен мөлшері сәби дамуы үшін ерекше маңызды.

Сәби өзін қауіпсіз сезінуі үшін анасымен тығыз байланыс орнату маңызды, ал емізу — шақалақпен байланыс қалыптастырудың ең табиғи әрі тиімді жолы.

Ана + бала: қайталанбайтын формула

Табиғат бәрін үйлесіммен жаратқан: әр ана өз баласына ең үздігін бере алады. Емшек сүтінің «формуласы» әрбір ана мен бала жұбы үшін бірегей және баланың үнемі өзгеріп отыратын жеке қажеттіліктеріне дәл бейімделеді. Мұндай композицияны қайта ойлап табу да, дәл қайталау да мүмкін емес.

Сәбидің әлі толық қалыптаспаған ас қорыту жүйесі жақсы сіңіре алатын ақуыздың мол болуы — емшек сүтінің басты артықшылықтарының бірі.

Неліктен алғашқы жылда жоғары сапалы ақуыз маңызды?

Теңгерімді өсу

Тым тез де, тым баяу да емес — балаға керегі тұрақты өсу. Сүтпен бірге түсетін ақуыз сәбиінің физикалық дамуына және салмақ қосуына әсер етеді.

Ас қорытуға жұмсақ әсер

Жоғары сапалы ақуыздар ас қорыту жүйесін шамадан тыс жүктемей, жетілмеген мүшелерге түсетін салмақты азайтуға көмектеседі.

Аллергия қаупін төмендетуге ықпал

Медициналық зерттеулер кейбір жоғары сапалы ақуыздардың аллергия даму қаупін төмендетуге көмектесуі мүмкін екенін көрсетеді.

Иммундық жүйені қолдау

Жоғары сапалы ақуыздар сәбидің табиғи иммундық жүйесін нығайтуға ықпал етеді және ішектегі бифидобактериялар үшін қолайлы орта қалыптастыруға көмектеседі.

Болашақ денсаулықпен байланысы

Сарапшылар ақуыз мөлшері баланың болашақ денсаулығына әсер етуі мүмкін екенін атап өтеді: қажетті деңгей мектеп жасында семіру қаупін төмендетуге көмектеседі.

Емшек сүтіндегі ақуыздың ерекшелігі

1

Емшек сүтінде сарысу ақуызы көп, казеин аз, сондай-ақ қорытуды жеңілдететін жартылай ыдыратылған ақуыздар мен ферменттер болады.

2

Сарысу ақуызы асқазанда жақсы қорытылады, ал оның емшек сүтіндегі казеинмен арақатынасы шамамен 70/30.

3

Ақуыз құрамына кіретін аминқышқылдардың деңгейі үйлесімді, сондықтан емшек сүтінің ақуызы сәби үшін әрі мөлшері жағынан теңгерімді, әрі сапасы жоғары.

Осы себепті сәби үшін ана сүтінен асқан нәрлі тағам жоқ.

Емшек сүті жеткіліксіз болғанда не болады?

Кейде емшек сүті жеткіліксіз болуы немесе тартылып қалуы мүмкін. Мұндайда сәби қарны тоймай мазасызданады, ал салмақ қоспау және дамуда кенже қалу қаупі артады.

Кейбір жас аналар емшек сүтін сиыр сүтімен алмастырып жатады, екі сүттің құрамы бірдей деп ойлайды. Алайда бұл — қате түсінік.

Сиыр сүті: сәби ағзасына әсері қандай?

Табиғи сиыр сүті — өсіп келе жатқан бала үшін пайдалы әрі нәрлі заттардың көзі деп есептеледі. Расында да, оның құрамында құнды заттар көп. Бірақ бұл құрам туа салысымен тез өсіп, аяққа тұруы керек бұзауға бейімделген. Ал сәбидің нәзік ас қорыту жүйесі үшін мұндай сүт тым күрделі болуы мүмкін.

Екі жасқа дейін неге қауіпті болуы мүмкін?

  • Сиыр сүтінде сарысу ақуызы мен казеиннің арақатынасы шамамен 20/80, ал ақуыз мөлшері емшек сүтінен 3 есе артық. Бұл сәби асқорытуы үшін өте ауыр жүктеме.

  • Рациондағы ақуыздың шамадан тыс мөлшері зат алмасудың бұзылуына, тым тез өсуге және семіруге әкелуі мүмкін.

  • Минералды заттардың мөлшері сәби қажеттілігінен айтарлықтай көп болуы мүмкін: бұл бүйрекке түсетін салмақты арттырады, ал ақуыздың артықтығы қандағы инсулин деңгейін көтеруі ықтимал.

  • Сиыр сүтінің ақуызы — ең күшті аллергендердің бірі, сондықтан емшек сүтін сиыр сүтімен алмастыру және қаймағы алынбаған сиыр сүтімен 2 жасқа дейін тамақтандыру ұсынылмайды.

Қорытынды ой

Анасы сәбиіне бере алатын ең үздік азық — емшек сүті.