Хан тәңірдің биік шоқтығындай болған Мұқағали аға
Әдеби-сазды кештің мазмұны
Бүгінгі кеш — Мұқағали Мақатаевтың туған күніне арналған «Жырлайды жүрек» атты поэзия кеші. Бұл шарада ақиық ақынның өмірі мен шығармашылығы таныстырылып, поэзияға қызығушылықты арттыру, өлеңді мәнерлеп оқуға дағдыландыру және жырларының тәрбиелік мәнін терең түсіндіру көзделеді.
Мақсаты
- Мұқағали Мақатаевтың өмірі мен шығармашылығымен таныстыру.
- Поэзияға қызығушылықты арттыру.
- Өлеңді мәнерлеп оқуға дағдыландыру.
- Өлеңдердің тәрбиелік мәнін түсіндіру.
- Қазақ халқына, тілге, Отанға сүйіспеншілікті күшейту.
Көрнекілігі
- Ақын портреті.
- Слайдтар және кітап көрмесі.
- Ақын туралы пікірлер, плакатқа жазылған өлең үзінділері.
- Техникалық құралдар: мультимедиялық проектор, аудио аппаратура.
Эпиграф және кештің ашылуы
Кеш мазмұны эпиграфтан басталып, Мұқағали портреті таныстырылады. Одан кейін жүргізушілер поэзияның жүрекке жақын құдіретін сөз етеді.
1-жүргізуші
Қайырлы кеш, қадірлі ұстаздар мен қымбатты оқушылар! Бүгін біз ақиық ақынымыз Мұқағали Мақатаевтың «Жырлайды жүрек» атты поэзия кешіне жиналып отырмыз.
Поэзия! Менімен егіз бе едің?
Мен сені сезесің бе? Неге іздедім?
Алауыртқан таңдардан сені іздедім,
Қарауытқан таңдардан сені іздедім.
Сені іздедім кездескен адамдардан,
Бұлақтардан, бақтардан, алаулардан,
Сені іздедім жоғалған замандардан.
2-жүргізуші
Қарасаз, қара шалғын, өлеңде өстім,
Жыр жазсам, жұртым, елеңдестің.
Өлсе өлер, Мұқағали Мақатаев,
Өлтіре алмас, алайда, өлеңді ешкім.
Ақынның өзі айтқандай, оның өлеңі — өзі өмірден өтсе де, өшпей, ұрпақтан ұрпаққа жалғасып келе жатқан мәңгілік мұра.
Ақын тұлғасына арналған тебіреніс
Иә, Мұқағали — ғажайып, ақиық, сыршыл, гуманист ақын. Ол бізге көрінбейтін сиқыр бояулардан, бізге естілмейтін құпия дыбыстардан қуат алатын жұмбақ әлем іспетті.
Ақын өлеңдерін оқыған сайын ақиқатқа жақын рух, сезім мен сананың бірлігі жүрекке ұялайды. Хан Тәңірінің биік шоқтығындай болған Мұқағали аға! Жатқан жеріңнен, туған топырағыңнан тұрып, бір сәт болса да оралып, арамызда болғандай сезілсең!
Сахналық көрініс
Сахнаға Мұқағали бейнесіндегі оқушы шығады.
Бүгін менің туған күнім, ой, пәлі-ай!
Мына адамдар неге жатыр тойламай?!
Банкет жасап берер едім өзім-ақ,
Тәңірдің бір жарытпай-ақ қойғаны-ай.
Мына дүние неге жатыр үндемей,
Алаулатып тойдың шоғын үрлемей?
Құшақ-құшақ гүл шоқтарын лақтырып,
Мынау шапан, мынау атың — мін демей.
Мынау жұртқа жақпады ма әлденем?!
Бекер өмір сүргенім бе әлде мен?
Халқым, сенің қасиетіңді білем деп,
Босқа өмірім өтті ме екен әуремен?!
Айтамын деп қуанышың, мұңыңды,
Басқа арнаға бұрдым ба әлде жырымды?!
Мен бәрібір өзіңменен бір болам,
Өзегіңнен тепсең-дағы ұлыңды.
Көрініс аяқталған соң оқушы сахнадан шығады.