Қазақша рефераттар

Күн мезгілдерін ретімен орналастыр

Сабақ туралы қысқаша мәлімет

Сабақ

Мектепалды даярлық сыныбы

Ертегілер елінде: «Бауырсаққа көмек»

Сабақ түрі

Қорытынды бақылау сабағы

Пәндер: сауат ашу, математика, қоршаған орта.

Мақсаты

1) Білімді бекіту

Жыл бойы алған білім, білік, дағдыларын пысықтау: дыбыс пен әріп, дауысты және дауыссыз дыбыстар, 10 көлеміндегі сандар, табиғат туралы түсініктерді жалпылау және оқушылардың білім деңгейін анықтау.

2) Дамытушылық

Баланың тілін, ой-өрісін және логикалық ойлау қабілетін дамыту.

3) Тәрбиелік

Ойын сөз арқылы жүйелі жеткізуге, ұйымшылдыққа, мейірімділікке тәрбиелеу.

Әдіс-тәсілдер, көрнекілік және ойындар

Әдіс-тәсілдері

  • Көркем сөз
  • Сұрақ-жауап
  • Ертегі кейіпкерлері арқылы тапсырма орындау

Көрнекілігі

  • Сандар сәулесі
  • Әліпби
  • Ертегі кейіпкерлерінің бейнелері
  • Суреттер

Дидактикалық ойындар

  • «Көршісін ата»
  • «Ретімен орналастыр»
  • «Орныңды тап»
  • «Сөз қуаласпақ»

Сабақтың барысы

1) Ұйымдастыру кезеңі

Психожаттығу, амандасу-сәлемдесу.

Арайланып таң атты,
Алтын сәуле таратты.
Жарқырайды күніміз,
Жарқырайды даламыз.
Қайырлы күн, балалар!
Қайырлы күн, қонақтар!

Балалар бір-бірінің қолынан ұстап, алақан жылуы арқылы жылы лебіз айтып, сабаққа назар аударады. Одан кейін орындарына жайғасады.

Бүгін біз бәріміз жақсы білетін «Бауырсақ» ертегісінің желісімен жұмыс жасаймыз. Бауырсақ бізден көмек сұрап келді. Көмегіміз — жыл бойы қоршаған әлем, сауат ашу және математика пәндерінен алған білімімізді көрсету.

Оқушыларға сабақ барысында ұпай жинауға арналған фишкалар беріледі (Бауырсақ бейнесіндегі белгілер). Ұпайы көп оқушы жоғары нәтиже көрсетеді.

2) Қоршаған әлем: Қоянның тапсырмасы

Бауырсақ атасы мен әжесінен қашып, жолға шығады. Кенет алдынан қоян шығады. Қоян аш, Бауырсақты жегісі келеді. Егер қоянның шарттарын орындасақ, ол Бауырсақты босатады.

Сұрақтар

  • Қазір жылдың қай мезгілі?
  • Көктем мезгілінің белгілері қандай?
  • Табиғат дегеніміз не?
  • Табиғат нешеге бөлінеді?

Тапсырмалар

  • Жұмбақтарды шешіп, жыл мезгілдерін атау (суреттерін ілу).
  • Жыл мезгілдерін ретімен орналастыру.
  • Күн мезгілдері бойынша жұмбақтарды шешу.
  • Күн мезгілдерін ретімен орналастыру.
  • Бір жылда неше ай бар? Айларды ретімен айту.
  • Бір аптада неше күн бар? Апта күндерін ретімен айту.

3) Математика: Аюдың тапсырмасы

Қоянның тапсырмалары орындалған соң, Бауырсақ әрі қарай жүреді. Алдынан аю кездеседі. Аюдың шарты — математикалық білімді көрсету.

Санау

  • 10 көлеміндегі сандарды тура және кері санау.
  • 5-тен 10-ға дейін өсу ретімен санау.
  • 8-ден 3-ке дейін кему ретімен санау.

Тура санау

1 2 3 4 5 6 7 8 9 10

Кері санау

10 9 8 7 6 5 4 3 2 1

Сандармен жұмыс

  • Кеспе цифрларды өсу және кему ретімен орналастыру.
  • «Көршісін ата» тапсырмасы: 5, 2, 4, 8, 6 сандарының көршілерін айту.
  • «Орныңды тап» ойыны.

Есеп және кеңістік

Аю бал жейтін ожаулар сатып алған, бірақ санын білмей тұр. Көмектесейік:

Барлығы нешеу?

Жасыл ожау — 4, сары ожау — 2.

4 + 2 = 6

Жасыл ожау нешеу?

6 − 2 = 4

Сары ожау нешеу?

6 − 4 = 2

  • Кеңістікті бағдарлау: пішіндер қай жерде орналасқан? (оң жақ жоғары, сол жақ төмен және т.б.).
  • Геометриялық пішіндердің айырмашылықтарын атау.

4) Сергіту сәті

Жұмбақ есеп арқылы қысқа сергіту жұмысы орындалады.

5) Сауат ашу: Қасқырдың тапсырмасы

Аю да риза болып, Бауырсақты босатады. Бауырсақ домалап келеді, бірақ алдынан қатігез қасқыр шығады. Қасқыр сауат ашудан білімді тексергісі келеді.

Негізгі сұрақтар

  • Қазақ әліпбиінде неше әріп бар? Неше дыбыс бар?
  • Дыбыс пен әріпті қалай ажыратамыз?
  • Дыбыстар нешеге бөлінеді?
  • Дауысты және дауыссыз дыбыстарды қалай ажыратамыз?

Жұмбақ және талдау

Орман ішінде үйі,
Айлы түнде жиі ұлиды.
Торай тартуда тапқыр,
Таптыңдар ма? Ол — қасқыр.

  • «Қасқыр» сөзін буынға бөлу. Неше буын?
  • Әр буындағы дыбыс санын анықтау.
  • Барлығы неше дыбыс? Неше дауысты, неше дауыссыз?
  • Сөзге дыбыстық талдау жасау.
  • «Қасқыр» сөзімен сөйлем құрау.

Үлгі сөйлем

Қасқыр орман кезіп жүр.

  • Сөйлем неше сөзден тұрады?
  • Сөйлем қандай әріптен басталады?
  • Сөздердің арасы қалай жазылады?
  • Сөйлем соңына қандай тыныс белгісі қойылады?

Қорытынды ретінде «Сөз қуаласпақ» ойыны ойналады.

6) Қорытынды

Қасқыр да тапсырмаларға риза болып, Бауырсақты босатады. Бауырсақ қуанып жолын жалғастырады. Кенет алдынан түлкі шығады.

Түлкінің сұрағы:

Бүгін сабақта сендер не істедіңдер?

Оқушылар өз жауаптарын айтады: тапсырмалар орындады, білімдерін көрсетті, бір-біріне көмектесті.

Сабақ соңында оқушылар ұпайларын санайды. Жоғары ұпай жинағандар белгіленеді. Бауырсаққа: «Ақылды бол, енді ата-анаңнан қашпа», — деп ақыл айтылады.