Досыңды алдама, оған адал бол
Шынайы дос — асыл қазына. Ал «Доссыз адам — тұзсыз тағам» деген сөз өмірдің қарапайым да терең ақиқатын еске салады: тұзсыз ас дәмсіз болса, доссыз өмір де мәнсіз, сәнсіз көрінеді.
Мақсаты
Достық туралы терең түсінік қалыптастырып, балаларды адалдыққа, шынайылыққа және өзара сыйластыққа тәрбиелеу. Пікір алмасу арқылы оқушылар арасында достық сезімді күшейту.
Күтілетін нәтиже
- Достық ұғымын саналы түсіну.
- Досқа адал болу, қайырымдылық пен шыншылдыққа бейімделу.
- Балалар арасында сыйластық пен достық қарым-қатынасты нығайту.
Көрнекілігі
Интербелсенді тақта, маркер, плакат.
Жоспары
- 1 Кіріспе сөз: «Дос деген кім?»
- 2 «Мен айтайын...» жаттығуы
- 3 «Өз пікірім...» жаттығуы
- 4 «Сөйлемді аяқта» тренингі
- 5 Қорытынды
Барысы
1) Кіріспе сөз: «Доссыз адам — тұзсыз тағам»
Балаларға тұзсыз тағамның дәмі туралы ойландыру арқылы мына тұжырымға әкелеміз: доссыз адам да дәл сондай — өмірінің мәні де, сәні де көмескіленеді.
Талқылау сұрағы
«ДОС» сөзін күннің шуақтары сияқты жарқырата түсетін қандай қасиеттермен толықтырар едің?
Ортақ ұран
Дос болайық бәріміз,
Жарассын достық әніміз.
Иықтасып жүрейік,
Қиындықта бәріміз.
Ассоциация құру: «Дос деген кім?»
- Сыр бөлісетін адам
- Мені жақсы түсінетін адам
- Көмекке әрдайым дайын адам
- Қандай жағдай болмасын бірге болатын адам
- Сенімді адам
2) «Мен айтайын...» жаттығуы
Төмендегі сұрақтар арқылы балалардың достық туралы ойы тыңдалады, түсінігі тереңдетіледі.
Талқылау сұрақтары
- Достық дегенді қалай түсінеміз?
- Досың бар ма? Ол кім?
- Достық — шынайы сезім бе, әлде жай ұғым ба?
- Достық жасқа байланысты ма?
- Қыз бала мен ер баланың арасында достық бола ма?
- Жақсы дос пен жаман дос қандай болады?
- Досың қиындыққа тап болса, не істейсің?
Жақсы достың мінезі
3) «Өз пікірім...» жаттығуы
Бұл бөлімде «Достық» тақырыбындағы шағын әңгіме оқылады. Оқушылар мұқият тыңдап, ой қорытып, пікірлерімен бөліседі.
Әңгіме: «Достық»
Әйтімбет деген сөзге шешен кісі болыпты. Бірде оның замандастары: «Достық нешеу?» — деп сұрақ қояды. Сонда Әйтімбет шешен:
«Достықтың екі түрі болады: бірі — адал достық, екіншісі — амал достық».
«Енді оны қалай ажыратуға болады?» — дегендерге: «Адал достық өмірлік нұсқа болады, амал достықтың ғұмыры қысқа болады», — деп жауап берген екен.
Талдау
Оқушылардың пікірлері тыңдалып, адал достық пен амал достықтың айырмашылығы нақты мысалдармен талқыланады.
4) «Сөйлемді аяқта» тренингі
Екі топқа сөйлемдер беріледі. Әр оқушы өз ойымен жалғастырып, қысқа әрі нақты жауап ұсынады.
1-топ
«Әрбір адамға дос керек, өйткені…»
2-топ
«Сыйластық бар жерде…»
5) Қорытынды
- Қиын кездерде бір-біріңе көмек көрсетіңдер.
- Досыңды алдама, оған адал бол.
- Досыңды қорлама.
- Досыңмен қызықты сәттерді бірге бөлісе біл.
- Досыңның кемшілігін кешіре біл: кемшіліксіз адам болмайды.
Нағыз достық — тек бірге күлу емес, бірге өсу, бір-біріне тірек болу. Досты бағалау — өзіңді де бағалау.