Бала - өмірдің жалғасы, отбасының жеміс берер гүлі
Тақырыбы: Мен және жанұям
Бұл кештің өзегі — отбасы мүшелерінің арасындағы бауырмалдықты, қайырымдылықты және достық қарым-қатынасты нығайту. Үлкенді сыйлау, кішіге қамқор болу, сыпайылық пен ілтипаттылықты бойға сіңіру — тәрбиенің басты бағыты. Сонымен бірге балаға ұлттық тәрбие құндылықтарын танытып, елінің қамын ойлайтын, ата-анасын және жора-жолдасын қадірлей білетін азамат қалыптастыру көзделеді.
Мақсаты
- Отбасы мүшелері арасындағы сыйластық пен бауырмалдықты қалыптастыру.
- Үлкенді құрметтеуге, кішіге қамқор болуға, әдептілікке тәрбиелеу.
- Ұлттық тәрбиені насихаттап, жан-жақты тұлға қалыптастыру.
- Дамыта оқытуға негізделген тапсырмаларды ата-анамен бірлесе орындау.
Әдісі
- Сұрақ-жауап.
- Пікір алмасу.
- Өз ойын көпшілік алдында еркін жеткізу.
Көрнекілігі
Төсбелгілер, үлестірмелі кестелер, даналық сөздер, компьютер, баяндамалар, плакаттар.
Түрі
Ата-ана мен бала арасындағы сыйластықты күшейтуге бағытталған бірлескен кеш.
Ерекше ой
Отбасы — кішкентай ғана шағын мемлекет. Оның аты — Жанұя. Бұл «мемлекет» бақытты, тату, өнерлі, үлгілі болғанда ғана берекесі артады.
Нақыл сөздер
1. Анаң — асыл қазынаң, әкең — асқар тау.
2. Ата-ананың міндеті — тәрбиелеу және жақсылықты үйрету.
3. Бала — біздің болашағымыз.
4. Бала әкеден ақыл, анадан мейірім алады.
5. Бала — өмірдің жалғасы, отбасының жеміс берер гүлі.
6. Балаға сіңірген ата-ана еңбегін бала өмір бойы ақтап бола алмайды.
Балаға деген махаббатқа ешбір махаббат теңесе алмайды. Ол — адам өмір бойы сусындайтын махаббат.
Ғабиден Мұстафин
Кештің барысы
Қайырлы күн, құрметті ұстаздар, ата-аналар, шәкірттер! Бүгін біз керемет, ғажайып әлемге саяхат жасаймыз. Қалай ойлайсыздар, ол қандай әлем болуы мүмкін?
Ол — бір өзі кішкентай ғана шағын мемлекет. Ал ол мемлекеттің аты — Жанұя. Бүгінгі басқосуымыз осы «мемлекет» туралы өрбиді: отбасы қандай болуы керек? Бақытты, тату, өнерлі, үлгілі.
Сонымен, ата-ана мен бала бірлескен «Мен және жанұям» атты кешімізге қош келдіңіздер.
Өлең жолдары
Жақсыдан жаман туады,
Бір аяқ асқа алғысыз.
Жаманнан жақсы туады,
Адам айтса нанғысыз.
Тәрбиелік өзек
Отбасы — адамзат бесігін тербеткен қасиетті ұя, ал баланың ең алғашқы ұстазы — ата-ана. «Ұяда не көрсең, ұшқанда соны ілерсің» деген даналық отбасылық тәрбиенің маңызын айқын көрсетеді. Бала қыран болу үшін, оны самғататын ата да, әке де қырандай биік болуы керек.
Ата-ана орны
Әр отбасында ата-ананың орны бөлек: бала әкеден — ақыл, анадан — мейірім алады. Әке — отбасының асыраушысы, қамқоршысы, тірегі. Ана — отбасының ұйытқысы, жылуы мен шуағы. Жақсы ана үйге береке дарытып, жанұясын бақытқа бөлейді.
«Бала — адамның бауыр еті» деген сөз бекер айтылмаған. Сондықтан әр ата-ана баласының білімді, мәдениетті, тәртіпті, әдепті болғанын қалайды. Бала — өмірдің жалғасы, көз қуанышы, шаңырақ иесі. Қай халық болса да үмітін ең алдымен ұрпағынан күтеді.
Тәрбиенің бастауы — ата-бабадан қалған ақыл-өсиет пен даналық сөздер. Кештің ашылу құрметіне «Анашым» әні орындалады.
Сайысты бастау
I стратегия: топқа бөлу. Сайысқа қатысатын оқушылар I топ — «Ұландар» дөңгелек үстеліне жайғасады. Ата-аналар II топ — «Ардақтылар» үстеліне отырады. III топ — әділқазылар. Әділқазылар құрамына бір оқушы ата-анасымен бірге қатысады.
«Ұландар» тобына
Балам менің бал бөбегім,
Өмірімнің жалғасы.
Ол үшін мен ой толғанам,
Шегінбе, сен қалмашы.
«Ардақтылар» тобына
Ей, ардақтылар ата-аналар,
Келші бүгін жарысайық.
Біздерменен бақ сынасып,
Әперші ұпай өз балаңа.
Әділқазылар тобына
Әділқазы болды менің,
Досым ата-анасымен.
Сендік саған, жан жолдасым,
Әділдікпен бағалашы.