Кештің жүрісі
Мақсаты
Оқушыларды Шәмші Қалдаяқовтың өмірі мен өнерімен таныстыру; Шәмші секілді бір-ақ рет өмірге келетін ұлы тұлғаның шығармашылығын қадірлеуге, өнерін сүюге және құрметтеуге тәрбиелеу.
Кештің құрылымы
- Шәмші қалай «Шәмші» атанды?
- Шәмші әндерінің тарихынан.
- Көрермендер арасынан «Ең үздік әнші» сайысы.
Жүргізушінің сөзі
Сәлеметсіздер ме, құрметті ата-аналар, ұстаздар және оқушылар! Мектебіміздің оқушылары дайындаған «Ән аға немесе Шәмшімен сырласу» атты кешімізге қош келдіңіздер.
Көрініс: Қамыс күркедегі қуаныш
Татардың гармонін, қазақтың қобызы мен домбырасын құйқылжыта тартатын сері Қалдаяқтың қамыс күркесінде 1930 жылы бір сәби дүниеге келеді.
Диалог
1-оқушы
Сүйінші, сүйінші! Оу, Қалдаяқ, ұлды болдың!
2-оқушы
Рас па? Менің де ұлды болатын күнім бар екен ғой. Сенен ештеңе аямаймын — бәрі сенікі!
Бала жылайды.
1-оқушы
Мен сені Шәмшид патшаның атымен атағалы жүр едім. Бірақ мынау патшаның өзінен гөрі әншіге көбірек ұқсайды екен.
3-оқушы
Оу, Қалдаяқ! Балаң адамдардың емес, әннің патшасы болса да, тақияңа тар келмес.
1-оқушы
Айтқаның келсін! Шәмшид болсын!
Қасындағылар: Аумин! Айтқаның келсін!
Олар шығып кетеді.
4-оқушы
Дәл сол сәттен кейін отыз жыл өткен соң «Шәмшид» аталған сол бала Шәмші Қалдаяқов болып, бүкіл Қазақстанға танылып, вальстің королі атанарын әлгі адамдар білген жоқ.
Музыкалық нөмір
Вальс: «Ақ бантик»
Алғашқы әннің әуені
Жүргізуші: Шәмшінің алғашқы әндерінің бірі — «Қайықта» әні орындалады.
Жеке орындаушы.
Ананың ақ тілегі
Иә, Шәмшид есімі Шәмшіге айналып, композиторлық даңқы шартарапқа тараған шақта, анасы ауыр дертке шалдығып, Алматыдағы Шәмшіні шақыртады.
Көрініс
Анасы көзін ашып сөйлейді.
Анасы: Шәмшіжан, келдің бе? Балам, жас кеттім деп өкінбеймін. Жазмыш маған келін көруді, немере сүюді бұйыртпапты. Жалғыз тілегім — сен аман бол. Салған әнің айтылмай жатып үзілмесін.