Нәтижесін айту
Сабақтың тақырыбы
Міржақып Дулатұлы — «Шешенің балаларын сүюі» өлеңі.
Сабақтың типі
Жаңа тақырыпты меңгерту.
Қолданылған технология
Оқу мен жазу арқылы сын тұрғысынан ойлауды дамыту.
Көрнекілік
Электронды презентация, интерактивті тақта.
Сабақтың мақсаттары
Білімділік
М. Дулатұлының өмірі мен шығармашылығының қыр-сырын меңгерту; өлеңге жан-жақты талдау жасай отырып, тақырыбын ашу.
Дамытушылық
Оқушыларды өз бетінше әрекеттендіру арқылы сын тұрғысынан ойлауын және жазылым дағдысын дамыту.
Тәрбиелік
Оқушыларды ананы сүюге, құрметтеуге, қастерлей білуге тәрбиелеу.
Ұйымдастыру кезеңі
- Амандасу, сынып оқушыларының қатысуын белгілеу.
- Оқушылардың назарын сабаққа аудару.
- Интерактивті тақта арқылы «Бес арыс» тұлғаларын көрсету: А. Байтұрсынов, М. Дулатов, М. Жұмабаев, Ш. Құдайбердиев, Ж. Аймауытов.
Талқылау сұрақтары
Неліктен «Бес арыс» деп атайды?
Ұлт руханиятына өлшеусіз еңбек сіңірген қайраткерлер шоғыры ретінде.
А. Байтұрсынов туралы қысқаша
Қайда туғаны, кім екені, шығармаларының ерекшелігі туралы сұрақтар арқылы еске түсіру.
Жаңа тақырып: Міржақып Дулатұлы
Бүгін біз «Бес арыстың» көрнекті өкілі Міржақып Дулатұлымен танысамыз. Мақсат — ақынның өмірі мен шығармашылығын хронологиялық кесте арқылы жүйелеп түсіну, оқып, есте сақтауға дағдылану.
Өлеңмен танысу: «Шешенің балаларын сүюі»
Өлең ана мейірімін, баланың қуанышы мен қайғысын бірге көтеретін шексіз махаббатты бейнелейді.
Кім сендерді, балалар, сүйетұғын, Қуанышыңа қуанып, қайғыңа күйетұғын. Түн ұйқысын төрт бөліп, кірпік қақпай, Шешең байғұс дамылсыз жүретұғын. Кім сендерді, балалар, тербететін, Еркелетіп, ойнатып, сергітетін? Жалқау болсаң, балалар, жаман болсаң, Қамқор анаң көз жасын көлдететін.
Өлеңнің мазмұнын ашу және талдау
- 1 Өлеңді мәнерлеп оқу.
- 2 Жаңа сөздердің астын сызып, мағынасын түсіну.
- 3 Синонимі мен антонимі бар сөздерді табу.
- 4 Әр шумақты оқып, мазмұнын аудару және талдау.
Түйін
Өлеңде ана баласы жақсы болса қуанып, жетістігіне мақтанады; баласы жалқау не қателік жасаса, қамығып, ренжиді. Ана баласы үшін түн ұйқысын бөліп, қайта-қайта оянып, дамыл таппайды. М. Дулатұлы ананың балаға деген мейірімін, жауапкершілігін және шексіз махаббатын жыр етеді.
Тақырыпты өмірмен байланыстыру
Мерекелік байланыс
Алда келе жатқан 8 Наурыз мерекесіне орай оқушылар өз аналары туралы ой бөлісіп, жылы лебіздерін жеткізеді. Электронды презентация арқылы «Ана» тақырыбы тереңдетіледі.
Шығармашылық жұмыс (топтық жұмыс)
Мақсат — аналарға арнап шығармашылық сыйлық әзірлеу. Жұмыс үш топқа бөлініп орындалады.
«Ақындар» тобы
Бес жолды өлең құрастыру.
Тірек сөздер
Ана, мереке, қуаныш.
«Шешендер» тобы
Ана туралы мақал-мәтелдер айту және сол мақал-мәтелдермен сөйлем құрастыру.
«Жазушылар» тобы
Ана туралы еркін жазу (шағын ойтолғау).
Бекіту сұрақтары
- Бүгін кімнің шығармашылығымен таныстық?
- Өлең қалай аталады?
- Өлеңнің негізгі идеясы қандай?
- Өлеңде кімнің портреті берілген?
- Портреттің сипаты қандай?
Білімді тексеру және бағалау
- Тест орындау, көршімен ауыстырып тексеру.
- Нәтижесін шығару және бағалау.
Үй тапсырмасы
«Шешенің балаларын сүюі» өлеңін жаттау.