Қазақша рефераттар

Ананың қолы жұмсақ

Сабақтың барысы

  1. 1 Ұйымдастыру кезеңі
  2. 2 Шаттық шеңбері

Шаттық шеңбері

Мұғалім балалармен амандасып, шаттық шеңберін құруды ұсынады. Оқушылар бір-бірімен сәлемдесіп, төмендегі қимыл-қозғалыстармен мәтінді бірге айтады:

  • Үлкенге де сіз!

    Оң қолын алға созады.

  • Кішіге де сіз!

    Сол қолын алға созады.

  • Баршаға жанды құрметтеп,

    Екі қолын кеудеге қояды.

  • Бас иеміз біз!

    Бас иеді.

Өлеңмен кіріспе

Мұғалім Е. Өтетілеуовтің «Нағыз адам боламын» өлеңін оқып береді. Оқушылар мұғалімге ілесіп бірге қайталайды.

Бүгін титтей баламын,

Әлі-ақ жігіт боламын.

Сонда, мүмкін, мен ғалым,

Әлде шофер боламын.

Ел сыйлайтын мұғалім,

Әлде шахтер болармын.

Сонда ұста, не артист,

Не дәрігер болармын.

Әлде, әлде... Білсеңдер,

Жалғыз ғана талабым:

Ер жеткенде, ел сенер

Нағыз адам боламын!

Е. Өтетілеуов

Әңгімелесу

Мұғалім оқушыларды сабақ тақырыбына бағыттау үшін әңгімелесу жүргізеді. Төмендегі сұрақтар қойылады:

  • Ата-анаң сенің қандай болғаныңды қалайды?
  • Өзің кімге ұқсағың келеді?
  • «Нағыз адам» дегенді қалай түсінесіңдер?

Мұғалімнің қорытынды сөзі

Ата-анамыз әрдайым жақсы адам болғанымызды қалайды және ақыл-кеңес береді. Біз ақылды, көркем мінезді адамдарға ұқсағымыз келеді. Өзіміз де мейірімді, адал, білімді болып өсуге талпынамыз.

Жаңа ақпарат

Сыныппен бірге адам өміріндегі ең қымбат ұғымдарды сұрақ-жауап арқылы талқылауға болады:

Не тәтті?
Ананың сүті тәтті.
Не жұмсақ?
Ананың қолы жұмсақ.
Не қатты?
Атаның жүрегі қатты.
Кім жақын?
Тату болса — ағайын жақын, ақылшы болса — апайың жақын. Бауырмал болса — інің жақын, алдыңа тартқан адал асың жақын, қимас жақын — қарындасың.
Не қымбат?
Алтын ұяң — Отан қымбат, құт-береке — атаң қымбат, аймалайтын — анаң қымбат, асқар тауың — әкең қымбат.
Дүниеде не қымбат?
Адам қымбат.
Адамға не қымбат?
Бала қымбат.

Мәтінмен жұмыс

Сабақтың тақырыбын тереңірек ашу үшін оқушыларға Ж. Жұмаханованың «Кім боласың?» мәтіні ұсынылады. Алдымен мәтінді мұғалім мәнерлеп оқиды, кейін оқушылар өздігінен оқып шығады. Соңында мазмұн бойынша сұрақтарға жауап береді:

  • Атасы немересіне «адам бол» дегенде нені меңзеді?
  • Сендер «адам бол» дегенді қалай түсінесіңдер?

Сергіту сәті

Балалар саусақ жаттығуын жасап, өлеңді бірге айтады:

Кел, санайық екеуміз:

Бас бармағым — әкем,

Балан үйрек — апам,

Орта терек — ағам,

Шылдыр шүмек — мен,

Титтей бөбек — сен.

Бір үйде біз нешеуміз?

Бір үйде біз бесеуміз.

Қорытынды ой

«Адам деген ардақты ат» — әр баланың бойына мейірім, адалдық, сыйластық, білімге құштарлық сияқты асыл қасиеттерді сіңіруге бағытталған тәрбие өзегі. Нағыз адам болу — өзіңді жетілдіру, өзгеге құрметпен қарау және қоғамға пайдалы болуға талпыну.