Қазақша рефераттар

Сұлулық деген табиғаттың көркі

Сауат ашу (1-сынып)

Сабақтың тақырыбы: «Мен және табиғат. Г дыбысы мен әрпі».

Оқу мақсаттары

  • 1.7 Тыңдалған материал бойынша өз пікірін айту.
  • 1.8 Берілген тақырыпқа әңгіме құрап айту.
  • 1.9 Сөздерді, дыбыстарды орфоэпиялық нормаларға сай дұрыс айту.

Сабақ мақсаттары

Барлығы
Жаңа білімді меңгереді.
Көбі
Тақырыпты түсініп, тыңдап, жетекші сұрақтар арқылы талқылайды.
Кейбірі
Алған білімін өмірде қолдана алады.

Жетістік критерийлері

  • Айтылған сөздер мен сөйлемдердің көпшілігін дұрыс қайталай алады.
  • Нақты сөйлеу арқылы мәселені түсінгенін көрсете алады.

Құндылықтар

Оқушыларды бір-біріне құрмет көрсетуге тәрбиелеу.

Пәнаралық байланыс және АКТ

  • Пәнаралық байланыс: өнер, ана тілі.
  • АКТ: аудиожазба, таныстырылым, видеоролик.
  • Тілдік тақырып: «Мен және табиғат. Г дыбысы мен әрпі».

Сабақтың басы (5 минут)

Ынтымақтастық атмосферасын қалыптастыру: балалар қол ұстасып, алақан арқылы жүрек жылуын сезінеді және өлеңді бірге айтады.

«Шаттық шебері»

Өсеміз біз күліп-ойнап, Он саусақтың саласындай. Өсеміз біз күліп-ойнап, Бір адамның баласындай.

Сабақтың ортасы

Миға шабуыл (8 минут)

Үш топқа арналған сұрақ-жауап арқылы оқушылардың бұрынғы білімі белсендендіріледі.

1-топ

  • Иә Сөздер буынға бөлінеді.
  • Жоқ Жылқының төлі — бота.
  • Иә Сөз дыбыстардан тұрады.

2-топ

  • Жоқ Жан-жануарлар сөйлей ала ма? Олар тек дыбыс шығарады. Сөйлеу адамға тән.
  • Иә Тіл — сөйлеу үшін қажетті мүше.
  • Иә Жуан дауысты дыбыстар: а, о, ұ, ы.

3-топ

  • Иә Сиырдың төлі — бұзау.
  • Жоқ Ит інде тұрады.
  • Иә Дауыссыз дыбыс кедергіге ұшырап шығады.

Тақырыпқа кіріспе: Табиғат

Табиғат та бір кітап — Тамаша ғой бүгін сен Табиғатқа жүгінсең. Құлақ түріп, көз тігіп, Төңірекке үңілсең, Еріп бұлттың ырқына, Жоқ болады бір күн ай... Табиғат та бір кітап, Оқи алсаң, шіркін-ай!

Табиғат — бізді қоршаған орта. Демек, адам табиғатсыз өмір сүре алмайды.

  • Адам өміріне не қажет?
  • Адам өзіне қажетті жағдайларды қайдан алады?

Тірі табиғатқа өсімдіктер, құстар, жануарлар, адам жатады.

Анамызды қалай жақсы көрсек, табиғатты да солай сүйе білуіміз керек. Табиғаттың көркі — оның сұлулығы: гүлдер, аңдар, ағаштар, құстар — бәрі де табиғат әсемдігін танытады.

Жұмбақ

Жұпар иісі еседі, Жайнап бақта өседі. Қай әріптен басталған, Аты не, кім шешеді?

Жауабы: Гүл.

Видеоролик арқылы талдау

  • «Гүл» дегенде бірінші қандай дыбыс естіледі? Г

  • Г дыбысы дауысты ма, дауыссыз ба?

    Ол — дауыссыз. Дауыссыз дыбыс айтылғанда ауа кедергіге ұшырап шығады.

Оқылым №1

Мәтінді мәнерлеп оқып, сұрақтардың мағынасына назар аударамыз.

Маса неге шағады? Жұлдыз неге ағады? Бұлт неге ауады? Жаңбыр неге жауады?

Қайталау

Бүгінгі сабақтың негізгі тірек ұғымдары: «Мен және табиғат», «Г дыбысы мен әрпі».