Қызыл түсті топқа арналған сұрақтар

Сабақ тақырыбы

Өмірімізді сақтайтын — бағдаршам

Мақсаты

Балаларды жолда жүру ережелерімен таныстыру.
Жол белгілерін ажырата білу дағдыларын қалыптастыру.
Жол ережесін білудің маңызын түсіндіру.
Есте сақтауға үйрету, жол қауіпсіздігіне тәрбиелеу.
Өз өмірін қорғай білуге дағдыландыру.

Көрнекіліктер

Бағдаршам макеті.
Жол ережелеріне қатысты суреттер.
Слайд арқылы теледидардан көрсетілім.
Ақ қағаз, түрлі түсті қарындаштар және т.б.

Әдіс-тәсілдер

Айту, түсіндіру.
Көрсету.
Сұрақ-жауап.

Сабақтың барысы

Ұйымдастыру кезеңі

Шаттық шеңбері

Армысың — Алтын Күн,

Армысың — Көк аспан,

Армысың, жан досым,

Жылуыма жылу қос.

Міне, менің қолым бос,

Жарқырасын күніміз!

Жыл мезгілі туралы сұрақ-жауап

Қазір жылдың қай мезгілі?: Күз мезгілі.
Күз айларын атаңдар.: Қыркүйек, қазан, қараша.
Қазір күздің қай айы?: Қыркүйек.
Күздің ерекшеліктері қандай?: Күн салқындайды, ағаш жапырақтары сарғайып жерге түседі, құстар жылы жаққа ұшады, адамдар жылы киінеді.

Жұмбақ және жаңа тақырыпқа кіріспе

Жұмбақ

Үш көзі бар қаз-қатар,

Кезек-кезек ашады.

Үшеуінен байқасам,

Үш түрлі нұр шашады.

Жауабы: бағдаршам.

Диалог

Бағдаршамды қай жерден көреміз?: Көліктер жүретін жолдан, жол қиылысынан көреміз.
Бағдаршамның қызметі қандай?: Жол қозғалысын реттейді.
Қай жолмен жүреміз?: Жиек жолмен (тротуармен) жүреміз.
Жиек жол болмаған жағдайда ше?: Жер асты өткелімен немесе арнайы жаяу жүргінші өткелімен өтеміз.
Қоғамдық көлікке қай жерден отырамыз?: Аялдамадан.

Бағдаршам туралы тақпақтар

Диас

Ашса кезек үш көзін,

Айтты деп ұқ үш сөзін:

Тоқта, сақтан, жол ашық!

Жүрме жолға таласып.

Қызыл көзін жаққанда,

Сақтық жасап, баспа алға.

Әсем

Қызыл жанса — тоқтағын,

Көрдің жұрттың тосқанын.

Сары жанса — дайындал,

Айналаңа қарап ал.

Жасыл жанса — тыңдағын,

Жолың ашық, жүр дағың.

Аңсаған

Мен көшеден өтерде,

Бағдаршамға қараймын.

Қоймаған ғой бекерге,

Жәрдемшісі ол талайдың.

Қысқаша мәлімет: бағдаршам тарихы

Алғашқы нұсқа

Бағдаршам алғаш рет теміржол бойында пайда болған. Оны ойлап тапқан адамның есімі тарихта нақты сақталмаған.

Электрлі бағдаршам

1914 жылдары АҚШ қалаларында екі түсті (қызыл, жасыл) электрлі бағдаршам қолданылды. 1918 жылдан бастап үш түс кеңінен енгізілді.

КСРО-дағы алғашқысы

Кеңес Одағында бағдаршам алғаш рет Мәскеу қаласының көшелері қиылысында орнатылған.

Бағдаршам жол қиылыстарынан қауіпсіз өтуге көмектеседі және жаяу жүргіншілерді жол-көлік оқиғаларынан сақтайды. Жолдан өтерде әрдайым мұқият болу керек: белгіленбеген жерден жүгіріп өтуге болмайды.

Үш түс нені білдіреді?

Қызыл

Көліктер тоқтайды. Жаяу жүргінші күтіп тұрады.

Сары

Дайындық белгісі: қозғалыс өзгеретінін білдіреді.

Жасыл

Жол ашық: көліктер жүреді, жаяу жүргіншіге рұқсат берілгенде ғана өтеді.

Маңызды ереже

Бағдаршам бар жерде жаяу жүргінші өткелі — ақ жолақтар болады. Көшеден әрдайым сол жермен өтіңдер.

Қауіпсіздік

Көшеде және жол үстінде доп ойнауға, шанамен сырғанауға болмайды. Жол қиылысында ерекше абай болыңдар.

Топтық ойын: «Қай топ данышпан?»

Бағдаршам балалардың білімін ойын арқылы тексергісі келеді. Үш топқа бөлінеміз: қызыл, сары, жасыл.

Қызыл топ сұрақтары

Алғашқы бағдаршамда неше түс болды?
Ол қандай түстер еді?
Қазіргі көшедегі бағдаршамда неше көз бар?
Олар қандай түстер?

Сары топ сұрақтары

Суреттен нені көріп тұрсыңдар?
Көліктердің аттарын атаңдар.
Бағдаршамның қызметі қандай?
Адамдар қай жолмен жүруі керек?

Жасыл топ сұрақтары

Бағдаршам жолдың қай жерінде орналасады?
Алғашқы бағдаршам қайда орнатылған?
Оны ойлап тапқан адамның есімі белгілі ме?
Біздің ауданымызда бағдаршам бар ма?

Сергіту сәті

Қызыл жанды

Қозғалмай тұру.

Сары жанды

Қол шапалақтау.

Жасыл жанды

Бір орында жүріс жасау.

Қорытынды және шығармашылық тапсырма

Балалар жолда жүру ережелерімен танысты, бағдаршамның адам өмірін қорғаудағы маңызын түсінді. Алғашқы бағдаршамның екі түсті болғанын, қазіргі бағдаршамның үш түсті көзден тұратынын білді.

Тапсырма:

Болашақта қандай бағдаршам болғанын қалайсыңдар? Қиялдарыңдағы үлгіні ақ қағазға түрлі түсті қарындашпен салып көріңдер. Соңында әр бала өз суретін таныстырып, қысқаша әңгімелеп береді.