Атамекен және Туған жер топтары
Атамекен – мақтанышым!
Бұл сабақ туған жерге деген сүйіспеншілікті күшейтуге, елдің бірлігі мен тыныштығын қадірлеуге, табиғатқа қамқорлық жасауға бағытталған.
Сабақтың барысы: ұйымдастыру кезеңі
Сыныпта баяу әуен ойнап тұрады. Тәрбиеші оқушылармен амандасып, көңіл күйлерін сұрайды: «Сәлеметсіңдер ме, балалар! Көңіл күйлерің қандай?»
Бүгінгі сабақ ерекше көңіл күймен басталады: интерактив тақтада Ескендір Хасанғалиевтің «Атамекен» әнінің бейнебаяны көрсетіліп, балалар қосылып орындайды.
Әннен кейінгі әңгіме
Назерке: «Ғазиз, мынау қандай керемет ән!»
Ғазиз: «Иә, бұл — біздің ата-мекеніміз, Қазақстан туралы ән.»
Айжол: «Бұл ән біздің әнұранымыз сияқты ғой!»
Тәрбиеші: «Дұрыс айтасыңдар. Бұл әнде ата-мекеннің тұтастығы, елдің ынтымағы мен бірлігі, қоғамдағы тыныштық ерекше сезіледі. Ән адам рухын көтеріп, жүрекке жігер береді».
«Атамекен» ұғымы туралы
Тәрбиеші оқушыларға ой тастайды: «Атамекен деген сөзді қалай түсінесіңдер?» Балалар өз пікірлерін ортаға салады. Осылайша сабақтың негізгі тақырыбы айқындалады: бүгінгі әңгіме Қазақстан — туған жер, атамекен туралы.
Қазақстан туралы қысқаша мәлімет
Кең байтақ далалы жеріміз — ақ көңіл, қонақжай еліміз. Қазақы рух аңқып тұрар әр өңірден. Қазақстан жер көлемі бойынша дүние жүзінде 9-орында тұр.
Еліміздің жер қойнауы қазынаға толы: табиғи байлықтары мол. Қазақстанда жүздеген ұлт тату-тәтті өмір сүріп жатыр.
Тәуелсіздік жылдарынан бері еліміздің дамуына бағытталған игі бастамалар жүзеге асып келеді. Соның бір көрінісі — 2017 жылы Астана қаласында өткен халықаралық ЭКСПО көрмесі. Көрменің тақырыбы — «Болашақ энергиясы». Бұл шара Қазақстанның экономикалық және технологиялық дамуын әлемге танытқан маңызды оқиға болды.
Негізгі бөлім: топтық жарыс
1) «Атамекен» тобы
ТапсырмаТақтаға дөңгелек пішін ілінеді. Ортасына сұрақ жазылады: «Туған жер бізге не береді?» Оқушылар түрлі суреттерді таңдап, оны күн сәулесі сияқты жан-жағына орналастырады.
Мысалдар
- Ас-ауқат, сусын
- Киім-кешек
- Ауа, тыныс
- Білім, болашақ
- Дәрі-дәрмек
- Қазба байлық
Жағымсыз құбылыстарды (соғыс, төбелес, алауыздық, ұрыс-керіс) таңдамау арқылы оқушылар туған жердің берері — игілік пен тыныштық екенін ажыратады.
2) «Туған жер» тобы
ТапсырмаТақтаның ортасына ұзын ағаш пішіні ілінеді. Сұрақ: «Біз туған жер табиғатына не бере аламыз?» Оқушылар табиғатты қорғауға қатысты суреттерді таңдап, гүлдің күлтелерін құрастырады — нәтижесінде гүл бейнесі пайда болады.
Негізгі идея
Табиғатты қорғау, тазалық сақтау, аялы алақанмен қамқор болу — туған жерге берер ең үлкен сый. Артық, мағынасы сәйкес келмейтін суреттер «қоқыс шелегіне» тасталып, дұрыс таңдау жасау дағдысы қалыптасады.
Мақал-мәтелді жалғастыру
«Атамекен» тобы
- Ел мен жер —егіз
- Ел іші —алтын бесік
- Жері байдың —елі бай
«Туған жер» тобы
- Елің —панаң
- Жерің —анаң
- Жері байдың —елі бай
Шығармашылық тапсырма: сурет салу
Оқушыларға өз туған ауылының (не туған жерінің) суретін салу тапсырылады. Жұмыстар көрсетіліп, талқыланады және бағаланады.
Ән орындау
«Ән мен күйді төгілтіп, інжу-маржан шашайық. Қонақтарды таңдантып, өнерден күмбез жасайық!» — осы тілектің жалғасы ретінде балалар бәрі бірге «Менің елім» әнін орындайды.
Қорытынды
Еліміздің тәуелсіздігі тұғырлы, еңсесі биік болсын десек, атамекенімізді қастерлейік. Сендер — жас өрендер — халқымыздың бағына тігілген көк туды желбіретіп, нық ұстауға тиіссіңдер.
Ол үшін ата-баба мұрасына адал болып, ата-ана үмітін ақтап, елге қызмет ететін азамат болып қалыптасуға бүгіннен бастап қадамдарыңды нық басыңдар.
Сабақтың аяқталғаны хабарланады.
Жұманазарова Табиға
Қаскелең қаласы, облыстық зерде бұзылыстары бар балаларға арналған мектеп-интернат тәрбиешісі