Тренинг жоспары
Тренинг–сабақ
Мен таңдаған өмір...
Бұл тренинг–сабақ оқушыларға «өмір» ұғымын тереңірек түсіндіруге, өмірде кездесетін түрлі жағдайларды талқылауға және өз мақсаттарын айқындауға бағытталған.
Мақсаты
Оқушыларға өмір ұғымын түсіндіру арқылы, өмірде кездесетін әртүрлі жағдайлар туралы мағыналы ақпарат беру.
Күтілетін нәтиже
Балалардың өмірге деген құштарлығын арттыру, қызығушылығын ояту және өзін тануға ынталандыру.
Қатысушылар
Тренингке 3 топ қатысады: әр сыныптан 8 оқушыдан. Қалған оқушылар көрермен әрі топтарды бағалаушы ретінде қатысады.
Соңында ең жоғары белсенділік танытқан топ анықталып, мадақталады.
Тренинг ережелері
Жылы әрі қауіпсіз орта қалыптастыру үшін төмендегі ережелер сақталады:
- 1 Тыңдау әдебін сақтау
- 2 Өз пікірін ашық білдіру
- 3 Ашық әрі көңілді болу
- 4 Белсенділік таныту
- 5 Сыйластық сақтау
- 6 «Мен» қағидатын ұстану
- 7 «Мұнда және қазір» қағидасында болу
Тренинг жоспары
Кіріспе сөз (психолог сөзі)
Әрбір адам — өмірге келген қонақ. Өмірдің мәнді, мағыналы, мазмұнды өтуі үшін қысқа ғұмырда адамдардың бір-біріне сыйластықпен қарағанына не жетсін.
Жан-жағымызға мұқият қарасақ, айналамызда тіршілік қайнап жатады: адамдар еңбек етеді, жұмысқа барады, жұмыстан қайтады, демалады, қонаққа барады, алға қойған мақсаттарына жетіп, жаңа мақсаттар қояды.
Кейбіреулер өмірдің қуанышы мен қиындығын қатар өткереді. Ал кейбірі не үшін өмір сүріп жүргенін түсінбей, қиындықты қалай еңсеруді білмей, торығуы мүмкін. Бұл — өмір.
Қалтарысы мен сынағы көп осы өмірде адам өзіне де, өзгеге де мейіріммен қарап, ізгі ниетпен жақсылық жасай білуі қажет. Қиындықты жеңу жолын табу, мақсатқа жету — әркімнің өз қолында.
Бүгінгі тренингтің өзегі: өзіміз таңдаған өмірімізді мәнді ету — әрқайсымыздың жауапкершілігіміз. Тренинг барысында өмірді де, өзімізді де тануға қадам жасаймыз.
«Ойланып көрейік» жаттығуы
Мақсаты
Өмір туралы түсініктерді дамыту.
Уақыты
5 минут.
Нұсқау
Қатысушылар іштей екі топқа бөлінеді. Төмендегі сұрақтарға жауап нұсқасын таңдап, өз таңдауларын дәлелдейді.
Адам не үшін өмір сүреді?
- •Үлгілі отбасы құру үшін
- •Білім алу үшін
- •Қоғамға және өз ортасына пайда келтіру үшін
- •Үлкен дәулетке қол жеткізу үшін
- •Өзін өзгелерге таныту үшін
Өмірден өз орнын табу деген не?
- •Жоғары атаққа ие болу
- •Материалдық дербестік пен мол дәулетке жету
- •Тату әрі берік отбасы құру
- •Адал достарыңның көп болуы
- •Өзің сүйген адамның сүйіктісі болу
Үлкен табысқа жету үшін қандай қасиеттер керек?
- •Еңбекқор, адал, әділ болу
- •Қабілетті, дарынды болу
- •Өзін және өз мүмкіндіктерін жақсы білу
- •Адамдармен тіл табыса білу
«Менің өмірім...» жаттығуы
Бұл бөлім сұрақ-жауап форматында өтеді. Мақсаты — күнделікті өміріміздегі қызығушылықтар арқылы қазіргі өмір салтын байқап, өзіміз туралы ойлану.
Сұрақтар
- Қандай телесериалдарды білесің?
- Қандай компьютерлік ойындарды білесің?
- Сәнге айналып жатқан ұялы телефондар және олардың түрлері туралы не айта аласың?
- Компьютердің қандай түрлерін білесің?
- Қазіргі өмірде «мына затсыз өмір сүре алмаймын» деп нені айтар едің?
«Айдар тағу» жаттығуы
Бұл тапсырмада қатысушылар өз өнерін ортаға салады. Қазақта: «Өнерлі болсаң, өнерің тасысын» деген сөз бар. Кейде жастардың бойынан біз күтпеген, бұрын байқамаған қабілеттер ашылады. Сол себепті әр сынып оқушылары өз өнерін көрсетеді.
«Күлкі — К витамині» тренингі
3 топ «Мен таңдаған өмір...» тақырыбында 3 әзіл көрініс ұсынады. Мақсат — көңіл көтеру ғана емес, топтық жұмыс пен еркін сөйлеуді дамыту.
Қорытынды
Тренингтің қорытынды сөзі:
Мен өмірді сүйемін!
Өмір мені қолдайды!
Өмірім өз қолымда!
Тыңдағандарыңызға рақмет. Сау болыңыздар!