Ақпараттық технологияны балабақша тәрбиешілеріне меңгерту жолдары

Елбасының «Жаңа әлемдегі жаңа Қазақстан» атты жолдауында еліміз бойынша әлемдік стандарттар деңгейінде сапалы білім беру қызметін көрсету қажеттігі атап өтіледі. Сондай-ақ ақпараттық технологиялар мен ақпаратты таратудың жаңа нысандарына бағытталған мамандандырылған білім беру бағыттарын құру, онлайн оқыту тәжірибесін дамыту және оқу теледидарын құру қажеттілігі көрсетілген.

Бәсекеге қабілетті білім кеңістігін құруға бағытталған қазақстандық білім беру реформасының басты мақсаттарының бірі — инновациялық технологияларға сүйене отырып, баланың бойында шығармашылық ойлауды дамытуға мүмкіндік жасау. Мұндай күрделі міндеттерді шешуде мектепке дейінгі мекемелердің орны ерекше: баланың келесі білім сатыларындағы нәтижелі дамуының берік іргетасы дәл осы балабақшада қаланады.

Қазіргі кезеңде білім беру ұйымдарында оқыту процесін ізгілендіру бағытында көптеген жұмыстар жүргізілуде. Ғылыми тілмен бұл құбылыс инновациялық процесс немесе педагогикалық жаңалықтарды енгізу деп аталады.

Инноватика ұғымы латынның in-novus сөзінен шыққан және «жаңарту», «өзгерту», «жаңашылдық» мағыналарын білдіреді. Яғни, педагогикада жаңа әдістерді, тәсілдерді, құралдарды, бағдарламаларды пайдалану — сапалы өзгерістерге бастайтын жол.

Бүгінде интерактивті бағдарламалық мүмкіндіктер, қозғалмалы объектілер құруға арналған векторлық және графикалық құралдар кеңінен қолданысқа еніп отыр. Осындай мүмкіндіктердің бірі — мультимедиялық оқулықтарды балабақшада жүйелі пайдалану.

Мультимедиялық оқулықтарды қолдану оқу іс-әрекеттерін жоғары деңгейде ұйымдастыруға жағдай жасайды. Мұндай жағдайда тәрбиеші әр сабақта көрнекіліктерді қайта-қайта ауыстыруға уақыт жоғалтпайды, ал оқу материалы құрылымды әрі ықшам түрде ұсынылады. Бұл — уақытты тиімді пайдаланудың нақты жолы.

Мектепке дейінгі жастағы балалар әдемі түстерге, ойыншықтарға, суреттерге, яғни көркемдікке бейім келеді. Кез келген оқу іс-әрекетінде тартымды иллюстрациялар мен графикалық тәсілдер арқылы ақпараттық-коммуникациялық технологияларды пайдалану тек танымдық белсенділікті арттырып қоймай, логикалық ойлау дағдыларын қалыптастыруға және шығармашылықпен еңбек етуге жағдай жасайды.

Қоғамды ақпараттандыру жағдайында педагогтердің ақпараттық-коммуникациялық технологияларды қолдану саласындағы біліктілігін көтеру — негізгі міндеттердің бірі. Қазақстандағы білім беруді дамытудың 2011–2020 жылдарға арналған мемлекеттік бағдарламасы жобасында педагог кадрлардың мәртебесін арттыру, мансаптық өсуін қолдау, оқыту және кәсіби біліктілігін үздіксіз дамыту, сондай-ақ еңбегін мемлекеттік қолдау мен ынталандыру мәселелеріне айрықша мән берілген.

Қоғам талабы — жалпыға бірдей білім және өмір бойы білім алу.

2006 жылы Атырау қаласындағы №4 кәсіптік мектептің Аққыстау филиалында ЭВМ мамандығы бойынша оқып, төртінші дәрежелі ЭВМ операторы куәлігін алдым. 2012 жылдың 27 ақпаны мен 3 наурызы аралығында Атырау облыстық кадрлардың біліктілігін арттыру және қайта даярлау институтында «Қашықтықтан оқыту негіздері» тақырыбында біліктілікті арттыру курсынан өттім.

Қазақстан Республикасының «Білім туралы» Заңының 8-бабында білім беру жүйесінің басты міндеттерінің бірі ретінде оқытудың жаңа технологияларын енгізу, білім беруді ақпараттандыру және халықаралық ғаламдық коммуникациялық желілерге шығу көрсетілген. Сондықтан білім беру жүйесінің қазіргі даму кезеңі оқыту үдерісін технологияландыру мәселесін алдыңғы қатарға шығарып отыр.

Осы бағытта өткізген ашық сабақтарымды, дөңгелек үстелдерімді және тәрбиелік шараларымды www.45.minut республикалық ұстаздар сайтына жариялап, сайт сертификатына ие болдым. Бұл мен үшін үлкен қуаныш әрі маңызды жетістік болды.

Мен жұмыс істейтін «Балбөбек» балабақшасының ақпараттық технологиялармен жабдықталуы қазіргі талапқа толық сай емес. Дегенмен осы жағдайда да нәтижелі жұмыс істеудің тиімді жолдарын қарастырып, бірқатар ұйымдастыру шараларын қолға алдым.

Мәтін жалғасы: Word файлы түрінде және «Балабақшада оқыту мен тәрбиелеу үдерісінде ақпараттық технологияның рөлі» тақырыбындағы презентацияда.