Қазақша рефераттар

Терезе элементтері

Сабақ туралы мәлімет

Сабақтың тақырыбы

Терезе. Терезе элементтері.

Сабақтың типі

Жаңа сабақты меңгерту.

Сабақтың түрі

Көрсете түсіндіру, практикум элементтері бар.

Сабақтың әдісі

  • Тірек-сызбалар
  • Тест сұрақтары
  • Сәйкестендіру тесті

Көрнекілігі

  • Компьютер құрылғылары
  • Интерактивті тақта

Сабақтың мақсаты

Білімділік

Windows терезелерімен, терезені көрсету нұсқаларымен, терезені басқару тәсілдерімен және терезелердің мүмкіндіктерімен таныстыру.

Тәрбиелік

Терезе құрылымы мен элементтерін меңгерте отырып, компьютермен жұмыс кезінде жауапкершілікке, ұқыптылыққа және тазалыққа тәрбиелеу.

Дамытушылық

Windows терезелерінің мүмкіндіктері арқылы көру және есту арқылы есте сақтау қабілетін дамыту, пәнге қызығушылықты арттыру.

Сабақтың барысы

Бұл бөлімде сабақ кезеңдері жүйелі түрде берілген: ұйымдастыру, үй тапсырмасын тексеру, жаңа түсінік беру, бекіту және қорытындылау.

I. Ұйымдастыру кезеңі

  1. Сәлемдесу, оқушыларды түгендеу.
  2. Оқушылардың құрал-жабдықтарын тексеру.
  3. Оқушылардың назарын сабаққа аудару.

II. Үй тапсырмасын тексеру

Қайталау сұрақтары арқылы алдыңғы тақырып бойынша білім деңгейі анықталады.

  1. ОЖ дегеніміз не?
  2. Компьютерді қалай іске қосамыз?
  3. Компьютерді қалай өшіреміз?
  4. Windows объектілерін атаңдар.
  5. Windows-тің басқару элементтерін атаңдар.
  6. Команда дегеніміз не?
  7. Тінтуірдің сол жақ батырмасы қандай қызмет атқарады?
  8. Есептер тақтасы дегеніміз не?
  9. Ақпарат тасымалдаушыларды атаңдар.
  10. Ақпарат дегеніміз не?
  11. Дербес компьютер пернетақтасында қанша перне бар?
  12. Алғашқы электронды машина ENIAC қай жылы және қай университетте жасалды?

III. Жаңа түсінік беру: «Терезе» ұғымы

Windows ортасының негізгі ұғымдарының бірі — терезе. Терезе — жақтаулармен шектелген экранның төртбұрышты аумағы; оның ішінде объектілер орналасатын жұмыс аймағы және басқару элементтері болады.

Активті терезе

Жұмыс жүріп жатқан терезе активті терезе деп аталады. Ол басқа терезелерден ерекшеленіп, әдетте ең жоғары қабатта орналасады, ал есептер тақтасындағы батырмасы басулы күйде көрінеді.

Терезені белсендіру тәсілдері

  • Терезенің кез келген жерін тінтуірмен шерту.
  • Есептер тақтасындағы сәйкес батырманы шерту.

Бұл әрекет терезелер арасында ауысу деп те аталады.

Терезенің негізгі элементтері

«Менің компьютерім» қапшығының терезесін мысалға ала отырып, терезенің негізгі элементтерін қарастырайық.

Шекаралар (жақтаулар)

Терезенің төрт жағындағы жақтаулар шекаралар деп аталады. Көп жағдайда олардың өлшемін өзгертуге болады.

  • Нұсқағышты шекараға апарыңдар: ол қос бағдаршаға айналады.
  • Содан кейін тінтуірді қажетті бағытқа тартыңдар (оңға/солға/жоғары/төмен).
  • Ені мен биіктігін бірге өзгерту үшін бұрышынан созыңдар.

Тақырып жолы

Терезенің ең жоғарғы бөлігінде терезе атауы орналасқан жолақ болады. Ол тақырып жолы деп аталады. Тақырып жолын тінтуірмен іліп алып, терезені экранның басқа жеріне жылжытуға болады.

Жүйелік мәзір белгішесі

Тақырып жолының сол жағында жүйелік мәзір белгішесі орналасады. Оны шерткенде терезені басқаруға арналған қарапайым командалар тізімі ашылады (жылжыту, өлшемін өзгерту және т.б.).

Жабу батырмасы

Тақырып жолының оң жағында Жабу (X) батырмасы орналасады. Ол құжатты/қапшықты жабады немесе қолданбаның жұмысын аяқтайды.

Балама тәсіл: Alt + F4 пернелерін басу.

Жималау, жаймалау және қалпына келтіру батырмалары

Жималау (Minimize)

Терезені жұмыс үстелінен алып тастап, есептер тақтасында тек батырмасын қалдырады. Қолданба ашық күйінде қалып, жұмысын жалғастыра береді.

Қайта ашу: есептер тақтасындағы батырманы шерту немесе Alt + Tab арқылы ауысу.

Жаймалау (Maximize)

Терезені экранның толық өлшеміне дейін үлкейтеді.

Басқа тәсіл: тақырып жолын екі рет шерту арқылы да жаймалауға болады.

Қалпына келтіру (Restore)

Терезені аралық қалыпқа келтіреді: терезе экранда қалады, бірақ өлшемі толық экраннан кіші болады. Бұл бірнеше терезені қатар орналастыру үшін ыңғайлы.

Егер терезе толық экранда тұрса, тақырып жолын екі рет шерту оны бұрынғы өлшеміне қайтарады.

Мәзір жолы

Тақырыптың төменгі жағында командалар атаулары жазылған көлденең жолақ орналасады. Бұл — мәзір жолы.

Мәзір — берілген терезеде орындауға болатын командалар тізімі. Команданы ашу үшін атауын шертіңдер, кейін ашылған тізімнен қажеттісін таңдаңдар.

Құрал-саймандар тақталары

Көптеген терезелерде жиі қолданылатын командаларға жылдам қол жеткізу үшін батырмалар мен белгішелерден тұратын құрал-саймандар тақталары болады.

Батырманың міндетін білу үшін оның үстіне нұсқағышты апарып, сәл күтіңдер — түсіндірме жазуы (қалқымалы кеңес) шығады.

Мысал: «Сақтау» батырмасы құжатты дискіде файл ретінде сақтайды.

Айналдыру жолақтары

Егер терезе мазмұны толық көрінбесе, айналдыру жолақтары (тік және/немесе көлденең) арқылы экранда көрсетілмей тұрған бөлікті көруге болады.

V. Жаңа түсінікті тексеру

Компьютермен практикалық жұмыс арқылы тексеру.

VI. Жаңа сабақты бекіту

Сәйкестендіру тесті және 8 сұрақтан тұратын тест тапсырмасы арқылы қорытындылау.

VII. Сабақты қорытындылау: сөзжұмбақ

Төмендегі сөздер бойынша сөзжұмбақ орындалады.

Тәуелсіз Теңге Рәміз Бәйтерек Атазаң Елтаңба
  1. Біз қандай мемлекетпіз?
  2. 1993 жылғы тәуелсіздігіміздің белгісі.
  3. 1992 жылғы маусымда қабылданған тәуелсіздігіміздің белгісі.
  4. 2002 жылы Астанада салынған егемендігіміздің белгісі.
  5. 1995 жылы 30 тамызда қабылданған құжат.
  6. Мемлекеттік рәміздердің бірі.

VIII. Оқушылардың еңбегін бағалау

Оқушылардың сабаққа қатысуы, практикалық жұмысты орындауы және тест нәтижелері бойынша бағалау жүргізіледі.

IX. Үй тапсырмасы

  1. «Терезелер» тақырыбын оқу, конспект жасау.
  2. «Терезе» сөзіне сөзжұмбақ құрастыру.