Тетікбөлшек эскизі

Сабақ туралы қысқаша мәлімет

Сабақтың тақырыбы

Тетікбөлшек эскизі

Сабақтың түрі

Тәжірибелік сабақ

Қолданылатын әдістер

Көрнекілік әдіс, баяндау, салыстыру, талдау, іздену.

Пәнаралық байланыс

Сызба геометриясы, математика.

Сабақтың мақсаттары

Білімділік мақсаты

Баяндау арқылы эскиз туралы толық мәлімет беру; тетікбөлшекке қарап эскиз салуды үйрету; білім деңгейін тереңдету.

Дамытушылық мақсаты

Логикалық ойлауды дамыту, графикалық сауаттылық пен шығармашылық ойлауды арттыру, қарапайым дағдыларды қалыптастыру, өз бетімен жұмыс істеуді ұйымдастыру.

Тәрбиелік мақсаты

Сызба мәдениетін қалыптастыру; ұқыптылыққа, тазалыққа, адамгершілікке тәрбиелеу; еңбекке баулу; эстетикалық тәрбие беру; пәнге қызығушылықты арттыру.

Көрнекілік құралдар

1 Интерактивтік тақта
2 Көрнекі бұйымдар, сызбалар, тетікбөлшектер
3 Оқулықтар, миллиметрлік қағаз (миллиметровка), торкөз дәптер
4 Сызу аспаптары мен құралдары, өлшеу құралдары

Сабақтың құрылымы

I. Ұйымдастыру бөлімі

Оқушылармен амандасу.
Оқушыларды түгелдеу.
Жұмыс құралдарын тексеру, кезекші тағайындау.

II. Үй тапсырмасын тексеру

Графикалық жұмысты тексеру.
Өткен материалды қайталау.

III. Жаңа сабақ

Тетікбөлшек эскизі тақырыбын түсіндіру.

IV. Тәжірибелік жұмыс

Тетікбөлшек эскизін орындау.

V. Білімді бекіту

Жаңа сабақты пысықтау (сұрақ-жауап).
Сызбада берілген көріністер бойынша жетіспейтін көріністі тұрғызу.

VI. Қорытындылау

Оқушыларды бағалау.
Үй тапсырмасын беру.

Техникалық диктант (үй тапсырмасын тексеру)

Өткен материалды қайталау үшін қысқа сұрақтар қойылып, кейін дұрыс жауаптарымен салыстырылады.

Сұрақтар

Осьтік және центрлік сызықтар үшін қандай сызық түрі қолданылады?
H жазықтығында алынған проекция қалай аталады?
Аксонометрияда тікбұрышты изометрияда осьтер қалай орналасады?
Фронталь проекция жазықтығы қандай осьтермен анықталады?
Нәрсені қиюшы жазықтықпен ойша қиғанда алынатын фигура қалай аталады?
Екі ұшында да бұрандасы бар цилиндр тәрізді стержень қалай аталады?
Қима мен тіліктің айырмашылығы неде?
Алты қырлы басы мен стержені бар бекіту тетікбөлшегі қалай аталады?
Ең көп тараған бұранда түрі қайсы?
Стандартты бұрандалы бекіту тетікбөлшектерін атаңыз.

Дұрыс жауаптар

Жіңішке нүктелі үзілме сызық.
Горизонталь проекция.
120° бұрышпен.
OX және OZ осьтерімен.
Қима.
Шпилька.
Қима — тек қию жазықтығындағы фигура; тілік — қиюдан кейін көрінетін ішкі пішіннің кескіні.
Болт.
Метрикалық бұранда.
Болт, винт, шпилька, гайка.

Эскиз туралы түсінік

Эскиз — пропорцияны сақтай отырып, көз мөлшерімен қолмен орындалатын жұмыс. Өндірісте эскиз көбіне бір реттік қолдануға арналған конструкторлық құжат ретінде жасалады.

Эскизде нәрсе өзара перпендикуляр жазықтықтарға тікбұрыштап проекциялау әдісімен кескінделеді және, әдетте, сызу аспаптарын қолданбай салынады. Эскизде тұрақты масштаб сақталмайды.

Эскиз күнделікті тәжірибеде және түрлі пәндерде кең қолданылады. Мысалы, физика мен химия сабақтарында лабораториялық құралдар мен аспаптардың эскизін салу қажет болады. Геометрияда есеп шығаруға кіріспес бұрын, шарттағы фигуралардың эскизін (техникалық суретін) салу есепті түсінуді жеңілдетеді. Эскиздер жалпы техниканы меңгеруге де ықпал етеді.

Практикалық кеңес

Эскизді миллиметрлік қағазға немесе торкөз дәптерге салу ыңғайлы. Сызықтарды жұмсақ қарындашпен жүргізген дұрыс.