Қазақша рефераттар

Сұрақтарға жауап беру, күз мезгілін бейнелейтін сурет құрастыру

Сабақ туралы қысқаша мәлімет

Маңғыстау облысы, Бейнеу ауданы, Бейнеу гимназиясы мемлекеттік мекемесі. Бастауыш сынып мұғалімі — Бегжанова Санжан Мертеқызы.

Пән

Дүниетану

Тақырып

Күз

Мақсаты

Күз мезгілінде табиғатта болатын өзгерістер туралы білім беру және күздің астық, жеміс-жидек, көкөніс жинау кезеңі екенін түсіндіру. Күзгі ауылшаруашылық еңбегінің түрлерімен таныстыру.

Дамытушылығы

  • Ойлау қабілетін дамыту.
  • Сөздік қорын молайту.
  • Танымдық белсенділігін арттыру.
  • Өздігінен жұмыс істеп, қорытынды шығаруға машықтандыру.

Тәрбиелілігі

  • Байқағыштыққа баулу.
  • Еңбек сүйгіштікке тәрбиелеу.
  • Қоршаған ортаға қамқор болуға үйрету.
  • Табиғатты сүюге және құрметтеуге жетелеу.

Құралдар, әдістер және байланыс

Көрнекіліктер

  • Видеопроектор
  • Суреттер
  • Венн диаграммасы
  • «Анар теру» ойыны

Әдіс-тәсілдер

  • Сұрақ-жауап
  • Түсіндіру
  • Салыстыру
  • Бақылау

Пәнаралық байланыс

  • Ана тілі
  • Математика
  • Өмірмен байланыс

Сабақтың құрылымы

I. Ұйымдастыру

  1. Оқушылармен сәлемдесу.
  2. Оқушылардың назарын сабаққа аудару.

II. Психологиялық дайындық

Табиғат күлімсіреп күніменен,
Ән айтар бұлбұл сайрап түніменен.
Көркіне көз тоймайды табиғаттың,
Сұлулықты сүйе біл шыныменен.

Бұл жұмыс «Өзін-өзі тану» пәнінің элементі ретінде оқушылардың өзіне деген сенімін арттырып, табиғатты сүйіп, құрметтеуге тәрбиелеуге бағытталады.

III. Қайталау: «Күн көзін бұлт баспасын» ойыны

Ойын шарты: берілген сұрақтарға жауап бере отырып, экраннан күлімдеген күннің бейнесін толық шығару.

Қойылатын сұрақтар

  1. Өсімдік қандай топтарға бөлінеді?
  2. Өсімдік мүшелерін ата.
  3. Тұқым деген не?
  4. Көкөністерді ата.
  5. Суретте жылдың қай мезгілі бейнеленген?

Мақсат: өткен тақырыптар бойынша білімді тексеру және табиғатқа деген қызығушылықты күшейту. Соңғы сұрақ арқылы жаңа тақырыпқа шығу: күз.

IV. Жаңа сабақ

Сабақтың мақсаты хабарланып, оқушылардың бастапқы түсінігін анықтау үшін бағыттаушы сұрақтар қойылады.

Талқылау сұрақтары

  1. Қазір жылдың қай мезгілі?
  2. Күз айларын ата.
  3. Күз айларында қандай мерекелер бар?
  4. Күз айларында табиғатта қандай өзгерістер болады?
  5. Күзде нелер пісіп-жетіледі?
  6. Адамдар күз мезгілінде қандай жұмыстар атқарады?
  7. Жануарлардың күзгі тіршілігі туралы не білеміз?

Қосымша түсіндіру: өсімдіктерді бұтақ арқылы көбейту жолдары туралы қысқаша мәлімет беріледі.

V. Сергіту сәті

Қоюланып қара бұлт,
Жауар жаңбыр себелеп.
Жапырақтар жайылып,
Бұға қалды көбелек.

VI. «Бақылау күнделігі»

Ауа райын шартты белгілер арқылы белгілеу. Бұл тапсырма оқушылардың бақылау дағдысын қалыптастырып, табиғат құбылыстарын жүйелі түрде тіркеуге үйретеді.

Шығармашылық және ойын арқылы бекіту

VII. «Анар теру» ойыны

Мақсаты: оқушылардың ойлау қабілетін дамыту, ана тілі пәнімен пәнаралық байланыс орната отырып шығармашылық жұмыс жүргізу.

Тапсырмалар

  1. «Күзгі жапырақ» өлеңін жатқа айту.
  2. Күз туралы өлеңді жатқа айту.
  3. Ұйқасын тап: «Күз болғанда атырап, сарғаяды … (жапырақ)»

Жұмбақтар

  • Аспай піскен, қайнамай түскен.

    Шешуі: Жеміс

  • Қалың киім ұнатады, шешіндірсең жылатады.

    Шешуі: Пияз

  • Жаздай інге тығылып жатқан қызыл түлкіні, құйрығынан суырып әкелді әкем бір күні.

    Шешуі: Сәбіз

Қорытынды ой: күз мезгілінде жапырақтар сарғаяды, күн салқындайды. Күзден кейін қыс келеді.

VIII. Венн диаграммасы: «Күз» және «Қыс»

Салыстыру жұмысының мақсаты — күз бен қыстың ортақ белгілері мен ерекшеліктерін анықтау, «күздің бір күні қыстың бір айын асырайды» деген ойды түсіндіру. Яғни, күзде аянбай еңбек етсең, қыста қиналмайсың.

Күзге тән

  • Егін, жеміс-жидек, көкөніс жиналады.
  • Жапырақ сарғаяды, түсе бастайды.

Ортақ белгілер

  • Күн салқындайды.
  • Ауа райы құбылмалы болады.

Қысқа тән

  • Аяз күшейеді, қар түседі.
  • Табиғат тынышталады.

Қорытынды, бағалау және үй тапсырмасы

IX. Қорытынды тапсырмалар

Сұрақтарға жауап беру және күз мезгілін бейнелейтін сурет құрастыру.

  1. Халық күзді не себепті «Жомарт күз» деп атаған?
  2. Неліктен «Алтын күз» дейді?
  3. «Қара күзде» табиғат қандай болады?
  4. Бұталардағы өзгерістер туралы әңгімеле.

X. Үйге тапсырма

«Алтын күз» тақырыбына сурет салу.

XI. Бағалау және мадақтау

Бағалау: геометриялық фигуралар арқылы бағалау.

Рахмет! Ұнадыңдар, балалар!
Құштарсыңдар білімге.
Аяқтадым мен сабақты,
Рахмет айтам сендерге.