Қосымшалардың жалғануын түсіндір
Сабақ туралы мәлімет
Пән / Сынып
Қазақ тілі, 3-сынып
Тақырып
Түбір мен қосымшаның жазылуы
Мақсат
Қосымшалардың жуан және жіңішке жалғану емлесін меңгерту.
Күтілетін нәтиже
- Түбір мен қосымша туралы білімін еске түсіре отырып, қосымшалардың жуан және жіңішке жалғануын ажырата алады.
- Жаттығулар орындау барысында талдау жұмыстарын жүргізіп, сөз құрамына талдай алады.
- Бір-бірін тыңдап, құрметтеуге үйренеді; төрт түлік малға сипаттама бере алады.
Бағалау құралдары
Екі жақты түсіндірме күнделік
Жұпта және топта талқылау арқылы бағалау.
Семантикалық карта
Түсіну деңгейін нақтылау және бекіту.
Синквейн
Ойды жинақтап, қысқа әрі мәнді жеткізу.
Сабақ барысы
I. Психологиялық дайындық
Оқушылар үш топқа бөлінеді. Хормен төмендегі шумақты айтады:
Біздер тату баламыз,
Гүл-гүл жайнап жанамыз.
Біздер бүгін баламыз,
Өсіп алға барамыз.
Сын тұрғысынан ойлаймыз,
Бір-бірімізді тыңдаймыз.
II. Қызығушылықты ояту
Екі жақты түсіндірме күнделік әдісі қолданылады: оқушылар жұпта және топта талқылайды, әр топтан бір оқушы өз ойымен бөлісіп оқиды.
III. Мағынаны тану
1) Көркем жазу және жұмбақ шешу
Оқушылар жұмбақты оқып, шешуін табады:
Иір-иір денесі,
Сахараның кемесі,
Ащы шөптер тамағы,
Шөлге шыдап бағады.
Жауабы: Түйе
Үлгі сөздер: түйе, түйеші, түйелер, талдар, тарақты.
«Түйе — малдың төресі» деген тіркес арқылы сабақтың негізгі ойы ашылады: бүгінгі тақырып — түбір мен қосымшаның жазылуы.
2) Ой шақыру
Сұрақ: «Түйе туралы не білеміз?»
Оқушылар түйе туралы білетіндерін ауызша айтып, сыныппен бөліседі.
Назар аударатын тұс
Жауаптардан сөз құрамын аңғарту: түбірді табу, қосымшаның жуан/жіңішке жалғануын байқау.
3) Оқулықпен жұмыс (3-жаттығу)
Оқушылар түйе туралы мәтінді оқиды. Одан кейін тапсырмалар топ бойынша орындалады.
1-топ
- Сөйлемді көшіріп жазу.
- Асты сызылған сөзді сөз құрамына талдау.
- Қосымшалардың жалғануын түсіндіру.
2-топ
- Өркеш, кеңсірік сөздерімен сөйлем құрастыру.
- Сөздердің мағынасын түсіндіру.
3-топ
- Сөйлемді көшіріп жазу.
- Асты сызылған сөзді сөз құрамына талдау.
- Қосымшалардың жалғануын түсіндіру.
Үш оқушы тақтада жұмыс жасап, өз талдауларын сыныпқа түсіндіреді.