Сақиналар ойыны
Тренинг жоспары
Бұл тренинг МАДС балаларының өзара сенімін күшейтіп, күнделікті ортада мәдениетті әрі жылы қарым-қатынас орнатуына бағытталған. Ойындар мен шағын тапсырмалар арқылы балалар өздерін еркінірек танытып, айналасындағылардың ерекшеліктерін байқай білуге үйренеді.
Ұйымдастыру кезеңі
Тренингтің өту барысымен қысқаша таныстыру: ережелерді келісу, қауіпсіз әрі қолдаушы орта қалыптастыру, әр балаға өзін еркін сезінуге мүмкіндік беру.
I. Сәлемдесу
Мақсаты
Балаларды біріктіру, өзара сенім атмосферасын құру және амандасу мәдениеті туралы түсінік қалыптастыру.
Өткізу барысы
Балалар шеңберге тұрып, амандасу сөздерін әуендетіп айтады.
Диалог үлгісі
Психолог: Сәлеметсіздер ме, балалар?
Балалар: Сәлеметсіз бе, апай?
Барлығы: Қайырлы таң! Барлық жақсылық өзімізге. (Психолог та, балалар да қолдарын жоғары қаратып жайып, кейін көкіректеріне қояды.)
II. Танысу
Өткізу барысы
Балалар шеңбер бойымен тұрып, ойыншықты бір-біріне береді. Әр бала өз есімін және үйде ата-анасы еркелетіп айтатын атын атайды. Әңгімелесу арқылы балаларға қай есім ұнайтыны анықталып, тренинг барысында сол есімдер қолданады.
III. «Шеңберді бұзып кір» ойыны
Мақсаты
Өзіне сенімділікті арттыру, ұяңдықты жеңуге көмектесу және балалар ұжымына еркін кірігуге ықпал ету.
Нұсқау
Қарым-қатынас жасауда қиналатын баланы ортаға шығарады. Қалғандары қол ұстасып, шеңбер құрып тұрады. Бала жүгіріп келіп, шеңберді «бұзып» ішке кіруге тырысады.
IV. «Жақын және таныстар» ойыны
Мақсаты
Ойын арқылы аңғарымпаздықты дамыту, бір-бірінің ерекшеліктеріне мән беруге үйрету.
1) Ең ұзын және ең қысқа
Екі бала бақылаушы болады да, қалғандарына арқасымен тұрады. Қалған балалар бір сызық бойына бойларына қарай тұрады. Жүргізуші бақылаушыларға кезекпен сұрақ қояды:
- Осы жерде ең бойы ұзын кім?
- Ең қысқасы кім?
- Ең ұзынынан ең қысқасына дейін ретімен атап беріңдер.
Содан кейін жаңа жүргізушілер мен жаңа ойыншылар таңдалады.
2) Көз бен шаш түсі
Жүргізуші қасындағы бақылаушыдан ойыншылардың көзінің және шашының түсін еске түсіріп, айтып беруді сұрайды.
3) Киімдері: түстері мен бөлшектері
Жүргізуші балаларға назар аудартатын сұрақтар қояды, мысалы:
- Ішімізде кімнің сырт киімінде түйме бар? Жұлдызша бар ма? Металл бөлшектері бар ма?
- Бүгін кім қызыл, ақ немесе сары түсті киім таңдады?
- Кімнің киім үлгісі ұқсас?
V. «Сақиналар» ойыны
Өткізу барысы
Ойыншылар дөңгеленіп отырады. Екі қолымен байланған жіпті ұстайды, жіптің ортасына сақина өткізіледі. Ойыншылар сақинаны кезекпен алақандарына жасырып, қолдарын жүргізеді. Жаңа жүргізуші сақинаның кімнің қолында екенін табуы керек.
Сақина табылған бала жүргізуші болады. Егер жүргізуші таба алмаса, өлең айтып береді.
VI. Сергіту сәті
Мақсаты
Музыка қосып, балаларды екі қатарға тұрғызып, кезекпен биге шақыру арқылы жағымды эмоция қалыптастыру және көңіл күйді көтеру.
VII. Рефлексия
Сабақты қорытындылау
Балалардан бүгінгі тренингтің ұнаған-ұнамағанын сұрау, олардың пікірін тыңдау және ой бөлісуге үйрету.
Сұрақ:
Балалар, сендерге бүгінгі сабағымыз ұнады ма? Не ерекше есте қалды?