Білім алушы студенттер арасында түрлі конкурстарға қатысып, жетістіктерге жетіп жүргендері қаншама

ХХІ ғасырда білімін үздіксіз дамыта алмаған елдің тығырыққа тірелері анық. ҚР Президенті Н. Ә. Назарбаев Қазақстан үшін тактикалық әрі стратегиялық дамудың басым міндеттерінің бірі ретінде білім беру жүйесін ақпараттандыру бағытында прогрессивті саясат жүргізудің маңызын атап өткен.

Білім беру сапасын арттыру үшін оқу үдерісін инновациялық технологиялармен байыту, оқытудың интенсивті сипатын күшейтетін құралдар мен әдіс-тәсілдерді қолдану, сондай-ақ күтілетін нәтижелерге бағдарланған оқыту арқылы жеке тұлғаның дамуын қамтамасыз ету қажет.

Кез келген өндіріс саласы өнім өндірер алдында «нені, қалай, кім үшін?» деген сұрақтарға жауап іздейді. Бұл үшін бәсекелесін, тұтынушыны жан-жақты зерттейді. Сонда ғана өнім өтімді болады.

Осы ұстанымды басшылыққа алған М. Мәметова атындағы гуманитарлық колледжінде 1997 жылы 0303002 – «Математика» біліктілігі бойынша мамандық ашылды. Облыс мектептерінде бұл мамандыққа сұраныс артып, түлектердің математика бағытында жұмысқа орналасуында қиындық болған жоқ. Сонымен қатар жоғары оқу орындарының қысқартылған бағдарламалары бойынша күндізгі және сырттай бөлімдерге мемлекеттік грантпен оқуды жалғастыру мүмкіндігі жастарды көбірек тартты.

Оқушылар математикадан терең әрі жүйелі білім алуы үшін оның өзіндік «философиясын» меңгеруі қажет. Логикалық ойлау қабілеті жоғары оқушы кез келген пәнді тез түсініп, материалды оңай игереді.

Математикадан үлгерімі жақсы оқушының басқа пәндерден де үлгерімі жоғары болатыны жиі байқалады. Себебі пәндер мазмұны әртүрлі болғанымен, игерудегі ойлау операциялары мен ой қорыту формалары ұқсас.

Сондықтан білім беру жүйесінің сапасы математикалық білімнің сапасына тікелей тәуелді деу — негізді тұжырым.

Қоғамды дамыту үшін орта мектептің негізгі міндеттерінің бірі — оқушылардың шығармашылық қабілетін толық ашып, толыққанды қоғам құруға күшін жұмсайтын сауатты, қабілетті тұлға қалыптастыру.

Бұл үшін математика мұғалімінен тек іргелі және арнайы математикалық білім ғана емес, педагогикалық қызметке шығармашылықпен қарайтын, іскерлік белсенділік танытатын және өз білімін үздіксіз жетілдіретін қабілет те талап етіледі. Осындай мұғалім ғана қоғамдағы жедел өзгерістерге тиімді бейімделе алады.

Қоғам талаптарына тез бейімделетін маман даярлау үшін ұжым шығармашылықпен жұмыс жүргізіп, студенттерді түрлі конкурстарға қатыстырып, нәтижеге қол жеткізіп келеді.

Бүгінде колледждің оқу-материалдық және оқу-техникалық базасы жаңа үлгідегі компьютерлермен, интерактивті тақталармен жаңартылып, білікті оқытушылар қатары артты.

Қазіргі таңда математика мамандығына дәріс беретін ұстаз-математиктер қатарында О. А. Жәутіков атындағы физика-математика мектебінің түлегі Қ. Жұмағұлов, сондай-ақ колледждің 2001 жылғы түлегі, мемлекеттік грант иегері, магистр Г. Сәрсен бар.

Қазіргі таңда математиктердің алдындағы басты проблемалардың бірі — оқушылардың математика пәнінен үлгерімінің төмендігі. Бұл мәселенің негізі мектептен басталатынын студенттерге жүргізілген сауалнама мен бақылау жұмыстарының нәтижелері де аңғартады.

Көптеген оқушылар дайын үлгідегі стандарт есептерді шығара алғанымен, ойлауды талап ететін есептерде қиындыққа тап болады және математикалық қателіктерге жиі жол береді. Қателік көбейген жерде білім сапасы артады деу — ойлантарлық жағдай.

Оқушылар білімінің төмендігі кейде жалған түсінік пен қате тұжырымдардың «беріктеніп» кетуінен болуы мүмкін. Қате тұжырым практикада жиі қайталанса, уақыт өте келе «нақты» сияқты қабылданатын әдетке айналады.

Мұның себептері ретінде оқулық мазмұнының күрделілігі, бағдарламадағы жүйеліліктің жеткіліксіздігі, сондай-ақ кейбір мұғалімдердің әдістемелік дайындығының әлсіздігі аталады. Демек, сапаны әр мұғалім ең алдымен өзінен бастауы керек.

Елбасы «Қазақстан – 2050» стратегиясында Қазақстанды әлемнің дамыған 30 елінің қатарына қосу міндетін қойды. Бұл мақсатқа жету үшін дұрыс ой қорыта алатын және сауатты экономикалық есеп жүргізетін мамандар қажет.

Мұндай мамандар — ел үшін қайтарымсыз байлық. Ал сол байлықты қалыптастыратындар — біздер, яғни мұғалімдер. Сондықтан жауапкершілікті терең сезініп, үздіксіз ізденісті тоқтатпау маңызды.