Қазақша рефераттар

Әдептілік әлеміне бару барысында балаларға әдептілік ұғымының мағынасын ашу

Аягөз қалалық №6 бөбекжай-балабақшасы

Тәрбиеші: Адильханова Айгерім Бейсенғазықызы

Тақырып

«Әдепті бала — ақылды бала» (тәрбие сағаты)

Көрнекіліктер

  • Тақырыпқа байланысты суреттер
  • Әдептілік туралы мақал-мәтелдер
  • Дидактикалық ойын

Мақсаты

  • Балаларға әдептілік туралы мағлұмат беру.
  • Әдепті болуға үйрету, ойлау қабілеті мен шығармашылығын дамыту.
  • Әдептілік ұғымының мағынасын ашу арқылы әдептілік әлеміне жетелеу.
  • Адалдыққа, мейірімділікке, кішіпейілділікке тәрбиелеу.
  • Мақал-мәтел арқылы есте сақтау қабілетін арттыру.

Сабақтың барысы

Шаттық шеңбері

Біз әдепті баламыз,

Айтқан тілді аламыз.

Үлкендерге жол беріп,

Біз ақылды боламыз!

Тақырыпты таныстыру

Балалар, бүгінгі тәрбие сағатының тақырыбы — «Әдепті бала — ақылды бала». Әдептілік — адамға жарасатын көркем мінез. Ол үлкенді сыйлаудан, кішіні құрметтеуден, сыпайы сөйлеуден және әркімге ізет көрсете білуден басталады.

Сыпайы сөздер: үлгі жағдаяттар

Жағдаят 1

Апаң базардан алма әкеліп, ең үлкенін әрі жақсысын саған таңдап берді. Мұндайда не деу керек?

Балалар: «Рахмет, апа!» деу керек.

Жағдаят 2

Көшеде ойнап жүріп, байқамай досыңды қағып кеттің. Мұндайда не деу керек?

Балалар: «Кешіріңіз!» деу керек.

Жағдаят 3

Көшеде апайыңды кездестірдің. Ұмытуға болмайтын сөз қандай?

Балалар: «Сәлеметсіз бе?» деу керек.

Сергіту сәті

Енді біз демаламыз,

Айналаны шоламыз.

Қол-аяқты кезекпен,

Оңға-солға созамыз.

Күн шыққанда сүйсініп,

Бәйшешектей иіліп,

Біз тынығып аламыз.

Жиі-жиі жаттығып,

Үлкен кісі боламыз.

Сурет бойынша әңгіме (тәрбиешінің сұрақтары)

Жағдаят: Автобуста бір бала атаға орын бермеді. Бұл дұрыс па?

Жауап: Жоқ, дұрыс емес. Үлкендерді сыйлау керек, автобуста үлкендерге орын берген дұрыс.

Жағдаят: Бір бала үлкенге орын берді. Бұл дұрыс әрекет пе?

Жауап: Иә, дұрыс. Бұл — әдептіліктің белгісі.

Жағдаят: Үстел басында бір бала барлық тәттіні өз алдына үйіп алды. Бұл дұрыс па?

Жауап: Жоқ, дұрыс емес. Кішіпейіл болып, өзгелермен бөлісе білу керек.

Жағдаят: Дүкеннен қайтып келе жатқан апаның сөмкесін бір бала көтерісіп келеді. Бұл дұрыс па?

Жауап: Дұрыс. Бұл бала — әдепті, мейірімді бала.

Біздің топтағы балалардың бәрі әдепті болуға ұмтылады. Балабақшада балдырғандар ақылды, білімді, тәрбиелі болып қалыптасады. Өскенде егемен еліміздің толыққанды азаматы боласыңдар.

Мақал-мәтелдер

  1. Әдепті бала — арлы бала, Әдепсіз бала — сорлы бала.
  2. Сіз деген — әдеп, Біз деген — көмек.
  3. Басыңа іс түссе, Жақсы көмек етеді, жаман күліп кетеді.

(Тәрбиеші мақал-мәтелдердің мағынасын түсіндіріп береді.)

Дидактикалық ойын: «Жақсы мен жаман»

Шарты: Балалар жақсы және жаман әдеттерді ажыратып, өз ойларын айтып береді.

  • Үлкенге орын беру
  • Амандасу
  • Көмектесу
  • Кешірім сұрау

Қорытынды

Бүгін біз әдептілік туралы көп нәрсе үйрендік. Әдепті адам сыпайы сөйлеп, үлкенді құрметтеп, кішіні қадірлейді. Ол жамандықты жақсылыққа айналдырып, өз ақылдылығын ісімен көрсете біледі.