Ақпаратты оқу

Сабақтың мақсаты

Бұл сабақта Windows ортасында ақпаратты сақтау, оқу және нысандарды іздеу ережелері қарастырылады. Оқушылар «Сақтау» және «Сақтау ретінде» командаларының айырмашылығын меңгеріп, сондай-ақ Пуск → Поиск арқылы кеңейтілген іздеу алгоритмімен танысады.

Білімділік

Ақпаратты сақтау ережелері, «Сақтау» және «Сақтау ретінде» командалары, сондай-ақ нысандарды іздеу тәсілдерімен таныстыру.

Дамытушылық

Ойлау қабілетін, логикалық-абстрактілі ойлауды және компьютерлік сауаттылықты дамыту.

Тәрбиелілік

Ұқыптылыққа, тиянақтылыққа, жауапкершілікке және жылдамдыққа баулу.

Сабақтың түрі

Аралас сабақ.

Көрнекі құралдар

Компьютер
Оқулық
Жұмыс дәптері

Сабақтың өту барысы

1 Оқушыларды ұйымдастыру
2 Үй тапсырмасын тексеру
3 Жаңа тақырыпты түсіндіру
4 Компьютермен жұмыс
5 Сабақты бекіту
6 Үйге тапсырма беру

I. Ұйымдастыру кезеңі

Оқушыларды түгендеу, сыныптың назарын сабаққа аудару.

II. Үй тапсырмасын тексеру

1) Нысандарға қандай амалдар қолдануға болады?

Көшіру, орын ауыстыру, жою, атын өзгерту.

2) Бірнеше нысанды қалай ерекшелейміз?

Егер нысандар қатар орналасса, Shift пернесін басып тұрып ерекшелеуге болады. Ал нысандар әртүрлі жерде орналасса, Ctrl пернесі қолданылады.

3) Алмасу буфері дегеніміз не?

Алмасу буфері — Windows нысандарын уақытша сақтауға арналған жедел жадтың арнайы аймағы. Көшіру үшін әдетте екі команда орындалады: Көшіру және Кірістіру.

4) Қоржынды қолданбай нысанды қалай жоямыз?

Нысанды Қоржынға жібермей жою үшін Shift + Del пернелер тіркесімі қолданылады. Бұл әдіс қауіпті, себебі файл бірден жойылады.

III. Білімді жан-жақты тексеру

Кроссворд шешу арқылы негізгі ұғымдарды қайталау.

1. Байттардың белгілі бір атауы бар тізбегі — файл.

2. Жарық қаламымен басқарылатын құрылғы — тышқан.

3. Ақпаратты қағазға шығаратын құрылғы — принтер.

4. 8 биттен тұратын өлшем бірлік — байт.

5. ОЖ жүктелгеннен кейін ашылатын аймақ — экран.

6. Дыбыстық ақпаратты жеткізу құралы — радио.

7. Мәтіндік және графиктік ақпаратты бейнелеу құрылғысы — монитор.

8. Кіші әріпті үлкенге (және керісінше) ауыстыратын перне — Shift.

9. Экранда жыпылықтап тұратын белгі — меңзер.

10. Телефон желісі арқылы ақпарат алмасуға арналған құрылғы — модем.

11. Оң жақтағы символды өшіру пернесі — Del.

12. Принтермен жұмыс істеуге қажет бағдарлама — утилита.

IV. Мақсат қою кезеңі

Windows қосымшаларында ақпаратты сақтау, оқу және нысандарды іздеу ережелерімен танысу.

V. Жаңа сабақ

Нысанды бумадан жылдам іздеу

Ізделетін нысан орналасқан буманы ашып, нысан атауының бірінші әрпіне сәйкес пернені басыңдар. Бұл тәсіл тек нысанның қай бумада екенін нақты білетін жағдайда тиімді.

Кеңейтілген іздеу (Пуск → Поиск)

Егер нысанның нақты қай бумада орналасқанын білмесеңдер, кеңейтілген іздеуді қолданыңдар. Файлдың немесе буманың атауын Бас мәзірдегі іздеу жолына енгізіңдер. Сұраныс бойынша табылған нәтижелер терезенің жоғарғы бөлігінде көрсетіледі.

Ақпаратты сақтау

Windows қосымшаларының көбінде ақпаратты сақтау мен оқудың ортақ ережелері бар. Құрылған суретті немесе құжатты файлға алғаш рет сақтау үшін «Сақтау» немесе «Сақтау ретінде» командасын таңдап, файлдың атауы мен сақталатын орнын көрсетіңдер.

Файлмен жұмыс істегенде оны жиі сақтап отыру қажет. Егер файл бұрыннан сақталған болса, «Сақтау» командасы әдетте қосымша терезе ашпай-ақ өзгерістерді бірден жазады.